Esikeel 3
3
1Ndin anye amambo miin ate, “Ayịn awo, ta se unaa fiin ke iso, ta ikpañwed ami; ndin kaa ketañ ikọ nọ nditọ Isrel.” 2Ntom ke ami ñkekʌppọ inua mmi, ndin anye amannọ miin ikpañwed ado nọ nta.
3Ndin anye amambo miin ate, “Ayịn awo, ta ikpañwed a-ami unọọhọ fiin mi nọ uyọhọ fiin idịb.” Ndin ami mmaata anye, ndin anye amaanịññe nte adanakwọọk ke inua mmi.
4Ndin anye amambo miin ate: “Ayịn awo, kaa ndin bịne nditọ Isrel idahami nyʌñ ketañ ikọ mmi nọ ammọ. 5Awo udọññọ fiin nọ aka abịne mbon ndukpakka ikọ ye asen usem, ado udọñ nọ abịne nditọ Isrel; 6awo udọññọ fiin ibo aka abịne uwak mbon ndukpakka ikọ ye asen usem, i-ikọ ammọ imuunwañake fiin, nọ afo umuukoppo se ammọ etañ. Ke akpanikọ akpedo ñkudọñ fiin utom nnọ ammọ, ammọ ekpaekekpañ utọñ unọ fiin. 7Ado nditọ Isrel ibeeñeke idem adikpañ utọñ unọọ fiin sia ammọ ibeeñeke idem adikpañ utọñ innọọ miin, sia afịd nditọ Isrel esọñ esịd enyʌñ esọñ iwuod. 8Ado ami ñyaanam afo asọñ ido anyʌñ asọñesịd nte ammọ. 9Ami ñyaanam akpọiso mfo aba nte itiad se isọọñ ikan, asọọñ akan itiadikañ. Kuubaak ammọ, kuunyʌñ udịkke ke ntak ammọ, akpesʌkado a-ammọ edooho mbon nsọñiwuod.”
10Ndin anye amambo miin ate, “Ayịn awo, nekke kpañ utọñ nyʌñ ben afịd ikọ se ntañ unọ fiin sịn ke esịd mfo. 11Kaa idahami bịne mbon mfo se eketañ efep ke abio nyʌñ ketañ ikọ nọ ammọ. Bo ammọ ate, ‘Se Abọọñ Andikara abo ado ami,’ me ammọ ekpañ utọñ me ikpañña.”
12Akem Sịbidịd amambenne miin ke anyọñ, ndin ami mmaakop akpọsọñ uyom ke edem mmi nte ubọọñ Abọọñ akedakkake ke itie a-anye akedaaha. 13Akedo uyom mme mba mme aduuwem ñkpọ ado ekedutuaiya ye uyom mme wiil ado ke ñkañ ammọ, ataa akpọsọñ uyom. 14Sịbidịd ado ndin amambenne miin ke anyọñ anyʌñ aben adakka, ndin ami mmaadakka ñkaa ye idiọọkesịd ye iyadesịd sịbidịd mmi, akpọsọñ ubọk Abọọñ amaanyʌñ andoro miin ke idem. 15Ami mmaadisịm mbon eketañña efep ke abio, e-ekedʌññọ ke Tel Afif akpere Inyañ Keba. Ndin do, ke itie a-ammọ ekedʌññọ, ami mmaatie ke atu ammọ usen itiaba ke ataa mbʌññọ esịd.
Utom Esikeel nte Awoukpeme
16Ke utịd usen itiaba ado, ikọ Abọọñ amaadinsịm miin ate: 17“Ayịn awo, ami mmunịm fiin nte awoukpeme nnọ mbon Isrel; ke ntoro kop ikọ se ami ntañ nyʌñ dat ado dʌt ammọ utọñ. 18Ke ini ami mbooho awo ibak, ‘Ke akpanikọ afo uduutreke adikpa,’ ndin afo udʌttọ ammọ utọñ, unyʌññọ usio uyio nọ ammọ esịññe idem ekpọñ idiọọk usʌñ ammọ, nọ ato do enịm uwem ammọ, idiọọk awo ado ayaakpa ke ntak idiọọkñkpọ amọ, ndin ami ñyaayem iyiib ammọ nto ubọk mfo. 19Ado adieke afo adʌttọ awo ibak utọñ, ndin ammọ ikpọññọ ibak uwem me ndiọi usʌñ ammọ, ammọ eyaekpa ke ntak idiọọkñkpọ ammọ; ado afo ayaanyaaña idem mfo.”
20“Ñko, adinen awo amaawuọ akpọñ usʌñ eti ido ammọ anyʌñ anam idiọọk, ndin ami mben ñkpọ iduọ nnịm ammọ ke iso, ammọ eyaekpa. Sia afo umuunọọhọ ammọ item, ammọ eyaekpa ke ntak idiọọkñkpọ ammọ. Awo idiitoiyoke ndinen ñkpọ a-awo ado akenamma, ndin ami ñyaayem iyiib ammọ nto ubọk mfo. 21Ado adieke afo anọọhọ adinen awo item ate ke anam idiọọkñkpọ ndin anye inyʌññọ inam idiọọkñkpọ, ke akpanikọ ammọ eyaedu uwem sia ammọ emaekop item, ndin afo ayaanyʌñ anyaaña idem mfo.”
22Ubọk Abọọñ amandoro miin ke idem do, ndin anye amambo miin ate, “Dakka da, wuọ kaa unaisọñ, ndin ami ñyaatañ ikọ unọ fiin do.” 23Ndin ami mmaadakka nda ñnyʌñ ñwuọ ñka unaisọñ. Ndin ubọọñ Abọọñ mmọdo akeda do, nte utọ ubọọñ ami ñkekịtte ke mben Inyañ Keba, ndin ami mmaaduọ ñkʌp iso ke isọñ.
24Ndin Sịbidịd amandʌk miin idem anyʌñ ambenne miin adaaha ke ukod. Anye amaatañ ikọ ye ami ate: “Kaa, yịt usʌñ sịn idem mfo ke ufọk mfo. 25Ndin afo, ayịn awo, eyaubọp ke udʌk; eyaubọp mbaak afo udukan uwuọ udʌk atu awo. 26Ami ñyaanam edeme mfo adiana ke nsịñ mfo mbaak afo adop uyio, mbaak afo udunyʌñ unọọ ammọ ikpan sia ammọ edo mbon nsọñiwuod. 27Ado ami mmaatañ ikọ ye afo, ami ñyaukʌppọ fiin inua ndin afo ayaabo ammọ ate, ‘Se Abọọñ Andikara atañ ado ami.’ Awo akeedodo a-adiikpañ utọñ yak ammọ ekpañ utọñ, ñko awo akeedodo a-adiisịn adikpañ utọñ yak asịn; sia ammọ edo mbon nsọñiwuod.
Currently Selected:
Esikeel 3: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
