Esikeel 4
4
Naña Ukanna Yeruselem Ñkʌk Adiiba
1“Idahami, ayịn awo, dat itiad aduañ keed, nịm anye ke iso mfo nyʌñ nam nduud abio Yeruselem ke idem amọ. 2Ndin kanna anye kʌk: Daaha atañ kanna anye kʌk, bọp akọ nọ adọọk akesịm anye, wuuk mme nnaaekọñ kanna anye nyʌñ bon ñkpọ uwuut ndibene kanna anye. 3Ndin dat ako ukwak ufrañ ñkpọ, nịm nte ndibene ukwak ke ufọọd mfo ye abio ado nyʌñ wọññọ iso mfo se anye. Eyaekanna abio ado ekʌk, ndin afo ñko ayaakanna anye akʌk. Ami adiido idiọọñọ inọ mbon Isrel.
4“Umauma, naa ke ñkañ ubọk ufiin mfo nyʌñ ben idiọọkñkpọ ufọk Isrel dot ke idem mfo. Afo anie adibiom idiọọkñkpọ ammọ ke adaña ibad usen se afo anaa ke ñkañ mfo. 5Ami mmunọ fiin ukem ibad usen asañake akekem ye ibad isua se ammọ ekenam idiọọkñkpọ. Ke ntoro afo ayaabiom idiọọkñkpọ ufọk Isrel ke usen ikie ita mme anaañ mme duob (390).
6“Ke afo umaukweeñe ami, maana suuk naa, isañ anyem naa ke ñkañ ubọk nnasia, nyʌñ biom idiọọkñkpọ ufọk Yuda. Ami mmunọ fiin usen aba (40) adinam ntoro, usen keed ada anọ isua keed. 7Kanna iso mfo wọt Yeruselem e-emaekekanna ekʌk nyʌñ tat ubọk mfo nyan tañ prọfesi baña anye. 8Ami ñyaubọp fiin ke udʌk mbaak afo udukan ukanna idem tutu afo akweeñe mme usen ubiọọñọ mfo.
9“Dat abakpa ye baali, akọti ye nsama, miled ye speel; dọñ ammọ ke ikịm keed nyʌñ kama ammọ nam uyo nọ idem mfo. Afo anie adita uyo ado ke usen ikie ita mme anaañ mme duob (390) a-afo anaaha ke ñkañ mfo. 10Domo ndidia sekel edịb#4:10 A-adooho ñkpọ nte kram 230. sio se afo uduudia ke usen ke usen nyʌñ dia anye ke akem ini. 11Ñko domo mmọọñ mbaak hin keed#4:11 A-adooho ñkpọ nte lita 0.6. ke itie itiokeed nyʌñ nwọñ anye ke akem ini. 12Dia ndidia ado nte akpediaha efiak uyo baali keed; sañ anye ke iso mbon awo, kama uduañ awo bara ikañ.” 13Abọọñ amaabo, “Ke utọ usʌñ ami ke nditọ Isrel ediidia ndedeghe ndidia ke atu mme idịd se ami ndiibịn ammọ ndọñ.”
14Ndin ami mmaabo nte, “Idooho ntoro, Abọọñ Andikara! Akenam ami nsappake idem mmi. Tọọñọ ke uyịn mmi tutu idahami akenam ami ndiaha ñkpaikpa ñkpọ me se unam ikọd awot. Akenam ndedeghe unam ndomokeed idʌkkọ inua mmi.”
15Anye amaabo ate, “Afọn, ami ñyaanam afo akama uduañ enañ asañ uyo mfo utu ke akama uduañ awo.”
16Anye ndin amambo miin ate: “Ayịn awo, ami ñyem adisuuhọ ibad ndidia se iba ke Yeruselem. Mme awo ediidia udodomo ndidia ke ñnyeñidem enyʌñ enwọñ udodomo mmọọñ ke iduọesịd, 17sia ndidia ye mmọọñ eyaenana. Idem ayaanekke akpa ammọ abaña keed ye aken enyʌñ etak eto ke idiọọkñkpọ ammọ.”
Currently Selected:
Esikeel 4: ICB
Highlight
Copy
Compare
Share
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
