ROM 8

Tana toka lo huirana na Tanungwe noi God

1Vae hika a tangaloi tikei kwara ne areki lavikita hinea tau hariki lui Jisas Kraes*, ne viti kwara tana kwali na kakadiki, 2huri a huirana na Tanungwe Kokona u kwiribibikita hinea tau hariki lui Jisas Kraes, mo vaikita tamo ahi. Vae hikani a huirana na Tanungwe Kokona u kasatukuhiau tina huirana na hatiki hinea mo vai kwara ne laviau vaki lo mateana. #a Rom 7.23,24; b Rom 3.27 3I God u areki na hatiana ba hinea lo doridori na tangaloi, mo viti kwara vae ne magarakinia. A Tangwata* noi God he gui lavi na hatiana tea, huri a lengalengahuri hati nona tangaloi rau magaraki na huirana na Tangwata hi ba. Vae i God u areki na hatiana hi ba. Mo hokaki Natuna vohoki, vae lolona mo vanamai, a tarabehina mo hoki na tarabehida, a tarabehi na vaivai hati. I Natuna hi mo vanamai kwara ne mate ne lavi na noda hatiana letiu. #a Bol 13.38; 15.10; b Sione 1.14; Vil 2.7; Hib 2.17; 4.15 4I God u vai hokinia hi kwara vae i kita tana vai doluaki na kinau hinea a Tangwata u viti kwara u bakoto kwara tana vaira. Hikani a doridori rahe karea tea hinea tau lengaia kwara tana vai, vae tahe vaira tea, vae tau vai na kinau hinea a Tanungwe Kokona u lengaia. #Gal 5.16,25 5A tangaloi hinea rau tuku vai na hatiki hinea aira siboga rau lengaia kwara rana vai, a hatiki hi u kwiribibi na domidomiga. Vae aira hinea rau tuku vai na kinau karea hinea a Tanungwe Kokona u lengaia kwara rana vai, vae a Tanungwe Kokona u kwiribibi na domidomiga. 6Diko a lengalengahuri hati u kwiribibi na domidomi na tangaloi, vae ne mate luna. Vae diko a Tanungwe Kokona u kwiribibi na domidomi na tangaloi, vae ne ahi luna, vake a magemuana ne eno maia. #Rom 6.21; 7.5; 8.13 7Hokinia lolona a lengalengahuri hati u kwiribibi na domidomi na tangaloi, a tangaloi hi u kwareki a tavaluivuro noi God. Tigwaravu he vai na kinau tea hinea a Tangwata noi God mo viti. Nehe vai lavira te vohoki. #a Sem 4.4; b Mat 12.34; Sione 8.43; 12.39 8A tangaloi aira hi rau vai na hatiki hinea aira siboga rau lengaia, ranahe vai lavi na kinau te vohoki hinea kwara i God ne lagwa luna.

9Vae hika i kamu tulu he vai na hatiki tea hinea i kamu sibomiu tulu lengaia. Vae tulu vai na kinau hinea a Tanungwe Kokona u lengaia, huri a Tanungwe hi noi God u toka lumiu. Ihe tea hinea a Tanungwe noi Kraes u tikei luna aia hete tangaloi noi Kraes. #a 1 Kor 3.16; b 1 Kor 12.3 10Vae huri i Kraes u toka lumiu u kareaki kwara a tarabehimiu hokinia rau mate ba kina hatiana, vae a Tanungwe noi God u vaikamu tulu mo ahi huri i God u vaikamu tulu mo bakoto lo nakona. #Gal 2.20; 1 Pita 4.6 11A Tanungwe noi God hinea mo rakati Jisas tina mateana u toka lumiu, vae huri hi tulu mo ahi. Vae i God hinea mo rakati Jisas tina mateana ne vai na tarabehimiu rana ahi vake, lalahi na nona Tanungwe hinea mo toka lumiu.

12Rabela. Vae huri na kinau hi, u taritarisa kwara tana toka hokinia a Tanungwe Kokona u lengaia, vae tana hatu vai na hatiki hinea i kita siboda tamo lengaia. #Rom 6.7,18 13Diko tulu tuku vai na hatiki hinea i kamu sibomiu tulu lengaia, vae tulu ne mate kinia. Vae diko lo huirana na Tanungwe Kokona tulu ne gui na hatiki lumiu, vae tulu ne ahi. #Gal 6.8

I kita i raranatu i God

14Aira hi a Tanungwe noi God u turukinira, rau kwareki i raranatu i God. 15A Tanungwe hi i God u betea ba lakwakamu, hete kwara ne vaikamu tulu ne kwareki tangaloi* boloki vuroki noi God kwara tulu ne mataku kinia. U bete na Tanungwe hi huri kwara ne vaikamu tulu ne kwareki i raranatu i God. Vunu lo huirana na Tanungwe hini tau tuku kware doro i God tau viti “!Mama, Tamagu!” #a 2 Tim 1.7; b Gal 4.5-6; d Mak 14.36 16A Tanungwe hi noi God u hariki lolo domida kwara ne viti matangwasaraki kwara i kita i raranatu i God. #2 Kor 1.22 17I kita tau kwareki raranatuna, vae huri hi tana lavi na karekarea hinea i God mo tau terekakinira huri na bulana tangaloi. Tana bulu tabulutaki mai Kraes* lo nona karekarea hinea i God mo tau terekakinira kwara a nona. Vunu huri tau bulu mai Kraes lo nona rongoana hati, vae tana bulu maia vake, tana toka maia lo nona karekarea lolo taetae.

A kinau karekarea vae rana vanamai te taroki

18A nogu domidomi aia hika. Lolona tamo toko domidomi huri na ahiana karea hinea lolo taetae kwara vae i God ne bete lakwakita, doluaki na kinau hinea lo taroki hika ramo toko vaikita tamo rongo hati haburu luga, rau hoki na kinau vuroki vohoki. #2 Kor 4.17 19A varamana mana kinau doluaki hinea i God mo taura, rau hugu tara na taroki hi, huri rau lengaia haburu kwara rana taga kwara i God ne matangwasaraki raranatuna. #Kol 3.4 20A domidomi noi God huri na varamana hika, kwara a kinau savia hinea mo taura luna, vae rana toko madamada. Hete doridori na varamana kwara aia kwehi, vae i God vohoki aia u lengaia kwehi. Vae i God u domi kikilaki kwara vae lo taroki a kinau vano hi, vae ne vaira rana bohi. #Jen 3.17-19; 5.29; Pri 1.2 21Lo taro hika aia hokinia kwara a varamana u tuku kwali na kakadiki, huri tigwaravu savi na kinau luna rau tuku madamada kehe. Vae i God u tau na nona domidomi lo rani hi, vae ne tirakinira tina hatiki hi, hokinia ne tiraki raranatuna tina hatiana savia, vae aira vunu rana hagwe na tokaana karea na taetae. #a 2 Pita 3.13; b 1 Sione 3.2 22Vae vaki na hika, i kita tau kikilai kwara a kinau vano hi savia i God mo taura, rau rongo hati haburu hoki na vavine hinea a lolona mo kadia kina natu. #2 Kor 5.2-4; Gal 5.5 23Vae hete a kinau aira vano hi kehekeheki hinea i God mo taura ramo toko rongo hati kwehi. I kita hi a Tanungwe Kokona mo vai na nona bolokiana tomua halaradu luda ba, i kita vake tau tuku rongo hati kwehi. Lolona tamo toko hugu tara kwara i God, vae ne tabuikita kwara tana kwareki i raranatuna, hokinia ne kasatukuhikita tina hatiki savia tana materi tina kaigwaruda doluaki, vae lo taro hi tau rongo hati lolo domida radu nga. 24I God u vakahikikita ba, huri a domida u huira luna. Vae diko tau lavi na kinau hinea tomuaki a domida u huira luna, vae tanahe domidomi te luna taliku. Hete tangaloi kwara a domina ne huira huri na kinau hinea u lavia ba. #2 Kor 5.7 25Vae diko tau tau na domida u huira lui God huri na kinau hinea he vanamai te radu nga, vae tana hugu tarae kina domi bua.

26Lo halaki hokinia nga, a Tanungwe Kokona vake u hago maikita, huri a noda huirana tikei. Tahe kikilai tea kwara tana tiutangaroa kworohokinia, vae a Tanungwe Kokona sibona aia u rongo hati maikita mo tiutangaroa noda lakwai God, vae a leo tikei hinea u taritarisa kwara ne viti huri na leona. 27I God hinea u tuku taga tilolo domi na tangaloi, u kikilai na domidomi nona Tanungwe Kokona, huri a Tanungwe hi u tiutangaroa lakwai God huri na tangaloi noi God u taritarisa luna hi i God mo lengaia. #Sam 139.1; 1 Kor 4.5

I God ne bete na nona kinau karekarea lakwakita

28Tau kikilai na kinau hika ba. I God u tuku boloki lo vataha na kinau hinea rau tuku vanamai lo noda tokaana kwara ne tabekita hi tau lagwa maia. #8.28: Lo duviki kairuaki na ves hi a Buku Kokona tuaki hinea a tangaloi rau ulira tuai rau viti hikwe kwara, I God u tuku boloki maikita kwara vataha na kinau rau tuku vanamai lo noda tokaana vae rana mulemai kina kinau karea lakwakita hinea tau lagwa maia. I kita hi i God mo kwarekita lo hala hinea mo mataia. #Eves 1.11; 3.11 29Tuai lo tinatinakakiki i God u mataikita mo vaikita tamo kokona, kwara vae vaki takuni tana mulemai tana hoki Natuna hi, i Jisas Kraes*. I God u vai kwehi huri kwara vae i Natuna hi ne kwareki Nakoi-natu lakwai ratuana hinea rau rusa. #Kol 1.18; Hib 1.6 30Vae hikani i God u kwarekita hinea u mataikita ba. I kita hi mo kwarekita, u vaikita tau kwareki tangaloi bakoto ba lo nakona. I kita hinea tau bakoto ba lo nakona, vae tau bulu maia lo nona ahiana karea.

I God u vosangi na nona lagwaana lalahi Jisas Kraes

31?Tau tuku domidomi lo kinau vano hika, vae tana viti kworoho? I God aia maikita, vae a tangaloi tikei kwara ne gui lavikita. #Sam 118.6 32I God he uti Natuna vohoki te kikita, vae u tirakinia mo mate kwara ne vakahikikita doluaki. Mo tiraki Natuna vohoki kwara ne vakahikikita, vae kareaki nehe uti na kinau te kikita, aia ne hokoraki vunuhira lakwakita. #Sione 3.16 33?Ihe hi ne viti lai kwara, “A tangaloi hinea i God mo mataira rahe bakoto tea”? I God sibona aia u viti ba kwara tau bakoto lo nakona. #Aes 50.8 34A tangaloi tikei kwara ne areki lavikita, huri i Kraes*, aia hi mo mate, vunu mo maraka taliku vaki lo ahiana, u hugu lo matuai God, vae aia u tuku kwahakwaha mai God hurikita. #a Sam 110.1; b 1 Sione 2.1

35A tangaloi tikei kwara ne kwahekikita tina lagwaana noi Kraes. Diko i kita tau rongo hati, diko a taro madi lakwakita, diko a tangaloi rau vai bulakikikita, vae venaha. Diko u marakatikita, diko tau kakaravika, diko i kita lo hala na mateana, diko a tangaloi rau kwohi mateikita, vae a kinau vano hi ranahe kwaheki lavikita tea ti Kraes. 36Hikani hoki na Uliuli* Kokona mo viti kwara,

“God.

Tigwaravu, vataha na rani,

a tangaloi rau vanamai

ramo ua matemateikami ratuaki

huri na hinamu.

A tangaloi rau tagaikami hoki na sivsivi

hinea kwara rana kwohira.” #Sam 44.22; 2 Kor 4.11

37Vae venaha. I Kraes hinea u lagwa maikita haburu u vaikita tamo gui savi na kinau vano hi tigwaravu. #Sione 16.33

38I nau nu kikilai ba kwara a kinau tikei vohoki kwara ne kwaheki lavikita tina lagwaana noi Kraes. Diko tau mate diko tau ahi, vae nehe kwaheki lavikita tea tina nona lagwaana. A kaihora tina taetae diko a hugwe na hatiki lolo mahaleki, diko a huirana lolo mahaleki, vae ranahe vai lai tea. A kinau hinea rau vanamai ba diko kwara rana vanamai te lo taroki, vae ranahe kwaheki lavikita tea tina nona lagwaana. 39A kinau aulu sea tina mahaleki diko tavuti na varamana, vae ranahe vai lai tea. Kareaki a kinau hinea i God mo taura, vae hete kwara te katukwale ne kwaheki lavikita tina lagwaana hinea i God mo vosangi lakwakita lalahi Jisas Kraes, a noda Hugwe*.

Currently Selected:

ROM 8: HWT

Highlight

Copy