ROM 9
9
I God u matai na gwaloana noi Isrel ba tuai
1I nau a tangaloi katukwale noi Kraes* hinea nahe kurakura tea. A Tanungwe Kokona u hugwe koroau, vae nu kikilai lo tarabehigu vake kwara nahe kurakura tea. 2A domigu u mava haburu, vake tigwaravu nu rongo hati haburu 3huri na gwaloana noi Isrel* vano hikani, hinea rau kwareki ratuagu hinea i kami hoki na bela bakotoki. Kwara vae i God ne kwaheki laviau ti Kraes kwara ne vai na hala na tangaloi aira hi rana bulu mai Kraes, vae i nau nu lagwa diko na va sala vae a tangaloi aira vano hi rana ahi. #Eks 32.32 4A gwaloana noi Isrel vano hi i God u mataira mo tabuira kwara ki raranatuna. Mo vosangi na nona hahaviada lakwara kwara rana kikilai kwara aia maira. Mo vai na leo harikiana maira kwara rana kwareki a bulana tangaloi aia ne kwareki noga God, vake mo bete na Tangwata* lakwara. I God mo vosangira kina hala bakoto kwara rana kaluhakinia luna, mo vai na tulikileo u rusa lakwara kwara ne tagahurira ne karea. #Eks 4.22; Dut 7.6; 14.1-2 5Aira rau gwalo vanamai lui ratubumai aira hinea a tangaloi noi God tuai. Vake i Kraes aia katukwale tiura, u vanamai lo gwaloana hi, vae aia i God, u lakua karakara sileti na tangaloi doluaki, vae tana toko tabe hakeki na hinana tigwaravu vaki tuai. #9.5: Lo hala kairuaki a domidomi na leo hi lo duviki kairuaki na ves hi aia hokinia hika kwara Vake i Kraes aia katukwale tiura, u vanamai lo gwaloana hi. I God u lakua karakara sileti na tangaloi doluaki, vae tana toko tabe hakeki na hinana tigwaravu vaki tuai. Io, kareaki. #a Mat 1.1-16; Luk 3.23-38; b Sione 1.1; d Sam 41.13; Rom 1.25
6Nahe viti tea kwara a leo i God u sovi, huri hete gwaloana noi Isrel savia hinea rau kwareki a gwaloana noi Isrel bakotoki noi God. #a Nam 23.19; b Rom 2.28 7Vake lo halaki hokinia hi hete tubutubu i Evraham savia hinea rau kwareki raranatu i God bakotoki, I God u viti lakwai Evraham kwara, “A tubutubumu bakotoki rana vanamai ti Aesik kehekeheki.” #Jen 21.12 8A leo hika a domianaki kwara a raranatu hi rau vora lo hala na voraana kehekeheki, aira hete i raranatu i God. A sakwarigi vano hi rau vora hokinia hi lo tulikileo hinea i God mo taua, aira a tubutubu i Evraham bakotoki. #Gal 4.23 9I God u tau na nona tulikileo lakwai Evraham lo leo hika, hinea mo viti kwara, “Lo taroki bakotoki vae na mulemai taliku, i Sera ne hagovi na natu a ngwera.” #Jen 18.10,14
10Vae a leoki hi he rovo te takwa-hi. I raranatu i Rebeka kairua, i rarua a natu malava, i tamagaru katukwale, aia hi i tubumai i Aesik. #Jen 25.21 11-12Vae i God u lengaia kwara ne matai na natu kairuaki lo nona domidomi kehekeheki. Lolona hi raru he vora te radu nga, raru he vai na kinau te kwara u karea, vake raru he vai na kinau te kwara u hati, vae i God mo kwaha mai Rebeka. Mo viti “I natumu a natu tomua, vae ne boloki lakwai natumu hi vaki takuni.” A kinau hikani u vosangi kwara diko i God u matai na tangaloi he kwarera te huri na kinau ramo vai, vae u kwarera huri na nona domidomi kehekeheki. #Jen 25.23
13Hika hokinia a Uliuli* Kokona mo viti kwara,
“I nau nu matai Sekov,
vae i Iso hetea.” #Mal 1.2-3
I God u tuku vai kinau rau bakoto kehe
14?Karea, vae tana viti kworoho? ?Tana viti kwara i God u vai kinau rahe bakoto tea? Hetea. U vai kinau rau bakoto kehe. #Dut 32.4 15U viti lakwai Mosis ba kwara,
“Diko nu lengaia kwara na hakavi na tangaloi tea,
vae na vai hokinia hi.
Diko nu lengaia kwara na vai tabetabeki na tangaloi tea,
vae na vai hokinia hi.” #Eks 33.19
16Hokinia i God u matai na tangaloi hete huri kwara a tangaloi hi u lengaia, diko hete huri na kinau hinea mo vai, vae huri na hahakaviana noi God kehekeheki. #Eves 2.8 17Lo Uliuli Kokona i God u viti lakwai Vero kwara, “Lo kinau aia hika vohoki nomo tauko komo mulemai kina hugwe lakua. Komo mulemai kina hugwe lakua huri kwara na boloki lumu, ne kwareki a kaivosangi na nogu huirana, vake kwara ne vai na tangaloi savia lo varamana rana kikilai na hinagu.” #Eks 9.16 18A leo hika a domianaki kwara, lolona i God mo lengaia kwara ne hakavi na tangaloi, u vai hokinia hi u lengaia. Vake hokinia u lengaia kwara ne vai na tangaloi a gwatuga rana madi, u vai hokinia hi. #Eks 4.21; 7.3; 9.12; 14.4,17
I God a lologutena eia, vake a hahakavina eia
19Nu domi kwara tuaki tikamu vae rana uduhuri kiau kwara, “?Diko ne hokinia hi, vae kwara kworohokinia i God ne viti kwara, ‘A tangaloi hika a nona hatiana eia’? ?Ihe tangaloi hi ne vai lai kwara ne tu koro na kinau hi i God mo lengaia?” 20Vae rabela, i kamu a tangaloi vohoki. Tulu he taritarisa tea kwara tulu ne kwaha darami God hokinia hi. A laha tano nehe uhi lavi na tangaloi tea hi mo kihia kwara, “?Kworoho komo vaiau hokinia hika?” #Aes 29.16; 45.9 21Tagaia. A tangaloi hinea u tuku kihi na laha tano, aia u taritarisa kwara ne dumuki na tanoki hokinia hi u lengaia. Diko a tano katukwale, vae u lengaia kwara ne kihi na laha tano kairua luna, ne kihi banikinia kairuaki huri kanikani lalakua kehekeheki, kairuaki huri hahalakwai haro nga lolona, a tangaloi hi aia u taritarisa kwara ne vai hokinia hi. #Jer 18.6
22Vae i God u vai hokinia hi vohoki. U lengaia kwara ne vosangi kwara u lologute kina doridori na tangaloi hinea rau tuku vaivai hati, vake u lengaia kwara ne vai na tangaloi savia rana kikilai kwara a nona huirana eia. Hikani mo vai na domina mo bua huri na tangaloi aira hinea mo lologute kinira, aira hinea u taritarisa kwara rana va sala. #Jer 50.25 23Vake u lengaia kwara ne vosangi na nona ahiana karea na taetae tivarea, hinea u karea haburu. U lengaia kwara ne bete na nona ahiana hi lakwakita hinea mo hakavikita, mo vaikita tamo rarai kwara tana lavi na ahiana karea hi. #Eves 1.3-12 24I kita hini i God u kwarekita ba, tuai ratuaki tikita a gwaloana noi Isrel*, vunu ratuaki a tangaloi tavalavarea. 25Lo buku* nona tangaloi* duruduruki i Hosea i God u viti kwara,
“A tangaloi hinea tuai aira hete bulagu,
vae na kwarekinira kwara
‘A bulagu tangaloi.’
Vake a tangaloi aira hi
hinea tuai nohe lagwa te maira,
vae na kwarekinira kwara
‘A bulagu tangaloi hinea nu lagwa maira haburu.’ #Hos 2.23
26Vake lo tanotanoki bakotoki hi
hinea tuai nu viti lakwara kwara,
‘I kamu hete bulagu tangaloi,’
vae takwahini na kwarekinira kwara
‘I raranatugu, i nau i God Tatoka.’ ” #Hos 1.10
27A tangaloi duruduruki i Aesaea mo kwahakwaha huri na gwaloana noi Isrel mo viti
“Diko a gwaloana noi Isrel rau rusa haburu
hoki na one na tahi,
vae a Hugwe i God ne vakahikinira te kukwehu tiura.
28A Hugwe i God nehe vaivai ta tuai tea,
vae ne vai kadi na tangaloi savia lo varamana
ne taritarisa lo vitivitiki.” #Aes 10.22-23; Hos 1.10
29A kinau hika u taritarisa lo leo i Aesaea hinea mo viti terekakinia tuai. Mo viti
“Kwara vae diko i God
hinea u hugwe koro na kinau doluaki
he tiraki tea kwara a noda vakabela tuaki rana ahi,
vae tana kwali na kakadiki
hoki na tangaloi
lo gwatugwatui-vanua lalakua Sotom maia Gomora vohoki.” #Aes 1.9
A gwaloana noi Isrel u rusa rahe rongo kikilaki na Roro Karea te noi Jisas Kraes
30?U karea, vae i kita tana viti kworoho? Tana viti hokinia hika. A tangaloi tavalavarea tina gwaloana noi Isrel* rahe vai tea kwara rana kwareki tangaloi bakoto lo nako i God tomua, vae i God u vaira rau bakoto ba lo nakona huri rau hauhuri lui Kraes*. #Rom 10.20 31Vae a gwaloana noi Isrel hinea i God u mataira ba u bolokinira haburu lo kinau hinea kwara vae rana kwareki tangaloi bakoto lo nako i God, vae rahe vai lai tea huri rahe vai vunuhi na kinau tea hinea a Tangwata mo viti. #Rom 10.2-3 32?Vae kworohokinia rahe vai lai tea? Rahe vai lai tea huri u bolokinira haburu, vae rahe hauhuri tea kwara ne madi lui God, rau vai kwara rana huri na doridori karea kehekeheki. Rau tatu lo “vatu na tatutatu”, #Aes 8.14 33hoki na Uliuli* Kokona u viti huria ba kwara,
“Tulu tagaia.
I nau nu tau na vatu katukwale
lo gwatuivanua Serusalem,
kwara vae a tangaloi rana tatu luna,
a vatu hi vae rana sovi luna.
Vae aira hinea rau hauhuri luna,
ranahe maemae tea.” #Aes 28.16; Rom 10.11; 1 Pita 2.6,8
Currently Selected:
ROM 9: HWT
Highlight
Share
Copy
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
