ROM 7

A tavaluileo lo lakiana

1Rabela. A kinau hika na vitia lakwakamu tulu kikilaia ba. I kamu vunu tulu kikilai na hala na tangwata. A tangwata u hugwe koro na tangaloi hinea u ahi radu nga. 2A kaivosangiki aia hoki na vavine hinea u laki, u hugu lo tangwata tavuti tuana ngwarasea lolona u ahi radu nga. Vae diko i tuana ngwarasea u mate tiua, a tangwata na lakiana hi raru mo hugu luna, u rovo tiua. 3Vae diko u hugu mana tangaloi dolua vake lolona hi i tuana ngwarasea u ahi radu nga, a vavine hi u veveki rera ki tuana ngwarasea. Vae diko i tuana ngwarasea u mate tiua, vunu a tangwata na lakiana he hugwe koroa tea. Vae diko ne laki mana tangaloi dolua he veveki rera te ki tuana ngwarasea tomua.

4Rabela. I kamu hokinia vake. Tulu hariki lui Kraes*, vae tulu kwareki a duvi na tarabehina, vae hokinia hi tulu mate ba haragoki maia. Hika a Tangwata* he hugwe lai te korokamu, vae i kamu a tangaloi noi Kraes hinea i God mo rakatia tina mateana. Hikani lo noda tokaana tana vai na bolokiana noi God. #Kol 2.14 5Tuai tamo toko huri na doridori na tangaloi kehekeheki, vae lo taro hi a Tangwata hi mo vaikita tamo lengai na lengalengahuri hati hinea a domi u lengaia. Vae huri hi, tamo toko vai na kinau aira hi rau hati, a mateana luga. #Rom 5.21; 8.6,13 6Vae hika a Tangwata he gwarubibikita tea taliku. Aia hokinia tau mate ba tiua, a nona huirana tikei. Hika tau boloki noi God lo hala karagwa hinea tau rongohuri na nona Tanungwe, vae nehe hokinia te tuai tamo rongohuri na Tangwata hinea ramo ulibibia. #a Rom 8.2; b Rom 6.4

A hala na Tangwata mana hala na vaivai hati

7?Vae i kita tana viti kworoho? ?Tana viti kwara a Tangwata* u hati? Hetea. A Tangwata aia u vaiau nomo kikilai kwara a vaivai hati aia hoki na havakinau. Kwara vae a Tangwata he viti te kwara, “Ko hatu lengahuri na kinau nona tangaloi dolua,” vae nanahe kikilai tea kwara u hati nomo vai kwehi. #Eks 20.17; Dut 5.21; Rom 13.9 8Vae a hatiana mo hagwe na hala kwara ne vaiau na lengahuri na kinau vatahae nona tangaloi dolua, luna hi mo vaiau nomo domidomi lo korokoro hi. Mo vai kwehi huri diko a korokoro tikei, a hatiana a huiranaki u tikei. #Rom 5.13 9Tomua, lolona hinea nohe kikilai na tangwata te radu nga, nu ahi. Vae a korokoro mo vanamai, a hatiana mo maraka, a huiranaki mo eia, nomo galo lo tangwata, 10vunu nomo mate kinia. A korokoro hi mo maravuti kwara ne vai na tangaloi rana ahi, vae lugu u vaiau hokinia nu mate nga. #Lev 18.5 11Vae a hatiana mo hagwe na hala mo sineau lo korokoro, mo vai mateiau kinia. #Jen 3.13; Hib 3.13

12Hokinia a Tangwata aia a kinau kokona hinea i God mo taua, vunu a korokoro aia vake u kokona, u bakoto, u karea. #1 Tim 1.8 13?Vae lo leogu aira vano hi nu viti kwara a Tangwata u vai mateiau? Hetea. A Tangwata u karea. Vae a hatiana aia u vai mateiau. Aia u lalahi na Tangwata hinea u karea kehe nga mo vai mateiau, kwara ne vosangi ne matangwasara kwara a hatiana u hati haburu. Hikani a hatiana u lalahi na korokoro, vae huri hi a korokoro u matangwasarakinia kwara a hatiana u hati vakevake. #Rom 5.20

A domidomi gwatu kairua raru vireve lolo domi na tangaloi

14Tau kikilai kwara a Tangwata*, i God u taua. Vae i nau a tangaloi na varamana, a nogu huirana tikei. I nau hoki na tangaloi hinea u boloki vuroki tavuti na masi, a hatiki u hugwe koroau. #Sam 51.5; Sione 3.6 15Nahe kikilai tea kwara kworohokinia nomo toko vai na kinau hika, huri a kinau hi nu lengaia kwara na vai, vae nahe vaia tea, vunu a kinau hinea nu begu kinia, nu vaia. 16Lolona nu vai na kinau hinea nahe lengaia tea kwara na vai, hi u vosangi kwara nu daraki luna kwara a Tangwata aia u bakoto. 17Vae hete i nau vohoki nomo toko vai na kinau hika, vae a hatiki aia hi mo toka lugu. 18Nu kikilai kwara a vaivai karea he toka te lugu. A domianaki kwara hete doridorigu kwara na vaivai karea, huri i nau a tangaloi na varamana. Kareaki a nogu domidomi aia kwehi kwara nana vaivai karea, vae hetea, nahe vai lai tea. #Jen 6.5; 8.21 19A kinau hi u karea hinea nu lengaia kwara na vai, vae nahe vaia tea, aia vae a hatiki hinea nahe lengaia tea kwara na vai, nu vaia. 20Diko nu vai na hatiki aia hi nahe lengaia tea kwara na vai, hi u vosangi kwara hete i nau kwara nu vai na kinau vano hi, vae a hatiki aia hi mo toka lugu.

21Hokinia nu taga kwara a hatiki u boloki lugu. Lolona nu lengaia kwara na vai na kinau hinea u karea, vae tigwaravu nu tuku va domia kwara na vai na hatiki kehe. 22Lolo domigu nu lagwa haburu mana Tangwata noi God. 23Vae nu taga kwara a doridorigu u dolua. A doridorigu u vai vuro vovohi na Tangwata noi God, vae lolo domidomigu nu lagwa mana Tangwata hi. A huirana na hatiki u tuku gwaruau kina doridorigu hinea rau hati. #Gal 5.17; Sem 4.1; 1 Pita 2.11 24I nau nahe rongo karea tea vohoki. ?Ihe ne vakahiki laviau tina doridorigu hi rau hati vae ramai laviau vaki lo mateana? 25Vae nu lagwa haburu mai God mo lalahi na noda Hugwe* i Jisas Kraes* mo vakahiki laviau. Karea, a doridorigu aia kwehi. I nau sibogu lolo domidomigu kehekeheki nu huri na Tangwata noi God, vae lo doridorigu nu huri na hatiki. #1 Kor 15.57

Currently Selected:

ROM 7: HWT

Highlight

Copy