REVELESEN 17
17
A vavine tu huri hala
1Hikani katukwale tina kaihora tina taetae hi kaibitu ramo kwali na laha kaibitu, mo vanamai mo kwaha maiau. Mo viti “Ko vanamai, vae na vosangiko kina rongoana hati hi hinea a vavine tu huri hala vae ne hagwea. A vavine hi a domianaki kwara a gwatuivanua lakua hinea mo tu garagarani mana kwai rusa. #Jer 51.13; Rev 17.15 2A hugwe lalakua rusa na varamana rau vai doridori hati ba mana vavine hi, a tangaloi lo varamana vake rau vai doridori hati maia, hokinia rau torongi haburu kina mena waen.” #Aes 23.17; Jer 51.7; Rev 14.8; 18.3
3Hikani a Tanungwe Kokona mo hivo tilugu, a nona huirana mo kwiribibiau, vae a kaihora tina taetae mo laviau vaki lo vanua vuroki. Nomo tagai na vavine mo hugu hivoulu lo boboroa ovi u memea vohoki. A boboroa ovi hi a hinana rau eno vataha na tarabehina, a hina vano hi aira a leo hati vovohi God. A boboroa ovi hi a gwatuna kaibitu a gwalana hangavulu. #Rev 13.1; 17.7-12 4A vavine hi mo lugwaki na lugwana hinea u kara dodoka hoki na lugwa na hugwe lakua, vake u kara hoki na dai. Mo vakavulae kina kinau savia hinea rau vaira kina kol, vake kina vatu vilavila, mana perel*. Lo kabana u hagovi na laha hinea rau kihia kina kol u kukwere kina kinau rau hati, hinea rau hogora vohoki, aira a kwai na nona vaivai hati. #a Esik 28.13; Rev 18.16; b Jer 51.7 5Vunu lo raena a hina katukwale, a leo tavuniki, a domianaki kwara, “A gwatuivanua lakua hi Babilon, a retahi na ravavine tu huri hala savia, vake a retahi na doridori savia hinea rau hati lo varamana.” 6Hikani nomo taga kwara a vavine hika u torongi haburu, huri u inumi na dai na tangaloi noi God, mana dai na tangaloi hinea ramo mate a tangaloi ramo kwohikwohira, huri rau tuku kwiribibi na hina i Jisas.
Lolona hinea nomo tagai na vavine hika, nu idila haburu. #Rev 18.24; 19.2 7Hikani a kaihora tina taetae mo uduhuri kiau mo viti “?Kworoho komo idila haburu? Nari viti na domiana na leo tavuniki hika lakwako huri na vavine hi, mana boboroa ovi hi a vavine mo hugu hivoulu luna, hinea a gwatuna kaibitu, a gwalana hangavulu. 8A boboroa ovi hi komo tagaia, tomua u ahi, vae hika he ahi tea. Vae nehe tuai tea, ne ngwalua tina kwalu bua hinea a kwotoki tikei, vae ne vano ne va magarakiana. A buku katukwale u eno, a hina na tangaloi savia hinea rau ahi, i God u ulira luna. A hina vano hi u ulira tuai ba, a varamana u tikei radu nga. Vae a tangaloi savia lo varamana hinea i God he uli na hinaga te lo buku hi, rana tagai na boboroa ovi hi, vae rana idila haburu, huri hi tomua u ahi, vae hika he ahi tea, vae ne mulemai taliku. #a Dan 7.3; Rev 11.7; 13.1; b Eks 32.32,33; Sam 69.28; Dan 12.1; Vil 4.3; Rev 3.5; 13.8; 20.12,15; 21.27
9“Kona lavi na lolorani na kikikila mana domi sea vae kona rongo kikilaki na leo hika. A gwatu na boboroa ovi hi kaibitu, aira hi a vuti kaibitu, hinea a vavine hi mo hugu luga. Vake aira a hugwe lalakua kaibitu. 10A hugwe lalakua hi, kailima rau sovi ba, kaionoki u hugwe koro na tangaloi radu nga, vake kaibituki he vanamai te radu nga. Lolona vae ne vanamai ne hugwe koro na tangaloi nehe tuai tea. 11Vake a boboroa ovi hinea tomua u ahi, vae hika he ahi tea, aia vae ne kwareki a hugwe lakua kaikwaluki, aia katukwale vake tina hugwe lalakua hi kaibitu. Vake aia vae ne vano ne va magarakiana.
12“Hikani a gwala hi hangavulu komo tagaira, aira a hugwe lalakua hangavulu hinea rahe tinakaki te radu nga kwara rana hugwe koro na tangaloi. Vae rana hago huirana kwara rana bulu katukwale mana boboroa hi kwara rana hugwe koro na tangaloi a mahaoki gwanugwanu vohoki lo rani katukwale. #Dan 7.24 13A hugwe lalakua hi hangavulu a domidomiga katukwale vohoki, vae a noga huirana mana noga bakotoana kwara rana hugwe koro na tangaloi rana bete lakwa na boboroa ovi hi. 14Vae rana vai vuro mana Sivsivi* Kelekele. A Sivsivi Kelekele hi, aia a Hugwe* na hugwe savia, vake aia a Hugwe Lakua koro na hugwe lalakua savia. Aia mana nona tangaloi hinea u kwarera ba u mataira ba, vake aira ramo huria rau karohuri, rana vai vuro mana hugwe lalakua hi hangavulu, rana guira.” #Dut 10.17; Dan 2.47; 1 Tim 6.15; Rev 19.16
15Hikani a kaihora tina taetae mo kwaha maiau taliku mo viti “A kwai vano hi komo tagaira, hinea a vavine mo hugu luga, aira a tangaloi na ureure rusa, aira a vao lakua, a tangaloi mataroi rau vanamai lo leo gwatu na rusa. 16A gwala na boboroa ovi hika hangavulu komo tagaira mana boboroa ovi hi, vae rana bega kina vavine tu huri hala hi, rana lai savi na kinau tiua hi a nona, rana tirakinia ne tu vuroki. Vae rana kani na tarabehina, rana huraia kina kabu. #Lev 21.9; Rev 18.8 17I God u tau a domidomi ba tilolo domiga kwara rana vai hokinia hi u lengaia. A domidomiga katukwale, vae a noga huirana kwara rana hugwe koro na tangaloi rana bete lakwa na boboroa ovi hi, tarisaki hi a leo hinea i God mo vitira rana mule luna.
18“A vavine hika komo tagaia aia hi a gwatuivanua lakua hinea u hugwe koro na hugwe lalakua savia lo varamana.”
Currently Selected:
REVELESEN 17: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
