REVELESEN 18

A gwatuivanua lakua Babilon u mule ki kinau vuroki

1Takuni tina kinau vano hika nomo tagai na kaihora tina taetae katukwale vake, mo vanamai tina taetae mana huirana lakua. Aia mo vavarama mo kwaka vataha na mahagweki lo varamana. 2Mo kware karakara mo viti “A gwatuivanua lakua Babilon u sovi ba, i God u magarakinia vohoki. U mulemai ki tanotano na vui mana tanungwe hati hinea a domiga rau hogora. Aia a tanotano na manu hinea rahe karea tea, rau tuku kani a biki boni. #a Aes 21.9; Jer 51.8; Rev 14.8; b Aes 13.21; 34.11; Jer 50.39 3Aia hoki na vavine hati hinea u vai na tangaloi lo ureure savia ramo inumi na mena waen hinea aia hoki na doridori hati mana vavine. A hugwe lalakua savia lo varamana rau vai doridori hati ba mana vavine hi. Vake a tangaloi na bihubihu savia lo varamana ramo mulemai ki tangaloi hugwe kina doridorina hika hinea u lengai na kinau vatahae.” #Aes 23.17; Jer 51.7; Rev 14.8; 17.2

4Hikani nomo rongo na leo katukwale vake u vanamai tina taetae, mo viti kwara,

“!A nogu tangaloi,

tulu ngwalua tiua!

Tulu hatu bulu maia

lo nona doridori hati

hinea mo toko vaira.

Tulu hatu bulu maia

vae tulu mo hagwe na kakadiana maia. #Aes 48.20; 52.11; Jer 50.8; 51.6,9,45; 2 Kor 6.17

5A nona doridori hati u vutikiana

u maravuti lolo taetae.

I God u kikilai

savi na nona doridori hati ba. #Jen 18.20-21; Jer 51.9

6Tulu vai lakwae ne taritarisa

hokinia hinea mo vai

lakwa na tangaloi.

A kinau vano hi mo vai lakwara,

tulu gele lakwae vakairua tiluna.

Tulu lilingi na mena waen

tilolo nona laha,

a waen hinea u huira karakara.

A huiranaki ne huira

sileti na waen hinea mo bete lakwakamu

kwara tulu ne inu. #Sam 137.8; Jer 50.15,29; 2 Tes 1.6

7Hokinia a vavine hi u lagwalagwa

u vai na nona kanikani u havutia

vae i kamu tulu ne tau a taro hati lakwae

hinea ne rongo hati haburu.

Tulu vai suria,

huri aia sibona u tuku viti kwara,

‘I nau a hugwe lakua,

nu hugu lo hagehagelegu.

I nau hete gwati,

i tuagu ngwarasea tikei

kwara na tangi huria,

nanahe kikilai na rongoana hati tea.’ #Aes 47.7-9

8Huri na kinau vano hi

vae a rongoana hati lalakua savia

rana kihia lo rani katukwale vohoki.

Vae ne lenga, ne rongo hati,

ne marakatia.

Vunu a kabu ne kaoa,

huri a Hugwe i God aia u huira

hinea ne vai kadia kina nona sanguniana.” #a Lev 21.9; Rev 17.16; b Jer 50.34

9A hugwe lalakua koro na varamana rau vaivai hati mana vavine hika Babilon, ramo bulu maia lo nona taro na hahavuti, vae rana ngara huria. Lolona rana tagai na kabuiahu na kabuna ne kaoa, vae rana ngara haburu huria. #Esik 26.16; 27.30-35 10Rana tu vakahao tiua, huri rau mataku kwara vae aira vake rana rongo hati maia, vae rana ngara, rana viti kwara,

“Keu rongo hati,

keu hahakavi haburu.

I nigo Babilon,

i nigo a gwatuivanua lakua

ku hahaburuka.

Vae lo mahaoki gwanugwanu vohoki

a kakadiana u vanamai tilumu.” #Esik 26.17; Dan 4.30

11A tangaloi na bihubihu hike lo varamana aira vake, vae rana ngara haburu huri na vavine hika, huri vae a tangaloi ne tikei kwara ne voli na noga vivilagoki. #Esik 27.36 12A tangaloi ne tikei kwara rana voli noga kol, a silva, a vatu karekarea, mana perel*. A tangaloi ne tikei kwara rana voli noga lugwa karekarea hinea rau lotu vohoki, rau kara dodoka hoki na lugwa na hugwe lakua, rau kara hoki na dai, vake a lugwa hi a silika. A tangaloi ne tikei kwara rana voli na vikai mataroi hinea rau doludolua, rau tu lo vanuaki vake, vake a kinau vano hi ramo kihira kina livo na eleven*, mana vikai hi a mataiki aulu vohoki, mana bras, mana aean, mana vatu hi rau madi vohoki. #Esik 27.12,13,22 13A tangaloi ne tikei kwara rana voli na rau karekarea vano hika, a sinamon*, mana rau tuaki hinea rau vai hinaka rau boniboni, vake a insen*, a mir*, mana vraginsen* hinea rau boniboni karea. A tangaloi ne tikei kwara rana voli na mega waen, a kaga oel, a kaga vulaoa, mana uit*. A tangaloi ne tikei kwara rana voli bulaga buluki, a sivsivi, a osi, a kat, mana bulaga tangaloi hinea rau tuku hokakinira kwara rana boloki vuroki. Vake a tangaloi ne tikei kwara rana voli na mauriana na tangaloi vano hi. 14A tangaloi na bihubihu vae rana ngara, rana viti

“!Ii! !Keu rongo hati haburu!

A kinau karekarea savia hika,

hinea a domimu mo eno luga

rau sala.

A kamu kinau karekarea rusa

mana vulavulamu savia

rau titikeiki tiuko ba,

vake konahe hagwera te taliku.”

15A tangaloi na bihubihu vano hika hinea ramo mulemai ki tangaloi hugwe huri na boloki ramo vai mana vavine hi, vae rana tu vakahao tiua, huri rau mataku kwara ramai rongo hati maia huri u rongo hati haburu. Rana ngara haburu, #Esik 27.36 16rana viti

“!Ii, keu rongo hati haburu

huri na gwatuivanua lakua hi!

Tuai u lugwaki na lugwana karekarea

hinea rau lotu vohoki,

rau kara dodoka

hoki na lugwa na hugwe lalakua,

rau kara hoki na dai.

Tuai u vulavulaki na kinau vano hi

rau kihira kina kol,

a vatu karekarea, mana perel. #Esik 28.13; Rev 17.4

17Vae lo mahaoki gwanugwanu vohoki,

a nona kinau savia hi rau karekarea

rau titikeiki.”

A kavten na aga savia mana tangaloi ramo huri na aga, mana boskuru, mana tangaloi tuaki hinea rau boloki huri kaivoliga lo aga, rau tu vakahao. #Esik 27.27-29 18Rau tagai na kabuiahu na kabu hi mo kao na gwatuivanua hi, ramo ngara karakara ramo viti “A gwatuivanua tikei kwara u lakua hoki na gwatuivanua hika.” #Esik 27.32 19Hikani ramo rasu a gwia tilo gwatuga, rau vosangi hokinia hi kwara rau rongo hati haburu. Rau ngara haburu, ramo viti

“!Ii, keu rongo hati haburu

huri na gwatuivanua lakua hi!

A tangaloi a agaga eia

rau vano laliki lolo karata,

ramo mulemai ki tangaloi hugwe

kina nona mane.

Vae lo mahaoki gwanugwanu vohoki,

a nona kinau savia rau titikeiki.” #Esik 27.30-34

20Vae a bolo dolua eia u viti kwara,

“I kamu lolo taetae,

ne havutikamu

huri na vavine hika

i God u magarakinia.

I kamu a tangaloi noi God savia,

mana kaihora* kokona

mana tangaloi* duruduruki,

ne havutikamu,

huri i God u bete na sanguniana

lakwa na vavine hika

huri na kinau savia

hinea mo vai lakwakamu.” #Dut 32.43; Sam 96.11; Aes 44.23; 49.13; Jer 51.48

21Hikani a kaihora katukwale tina taetae u huira, mo lavi na vatu dongwolingwoli u lakua, mo vohokinia tilolo karata. Mo viti “I nigo Babilon, i nigo a gwatuivanua lakua, vae i God ne vohokinigo tegetano ne huira hokinia hika, vae a tangaloi ranahe tagaiko te taliku lo taroki. #Jer 51.63-64; Esik 26.21 22Hikani lo vanuamiu, a tangaloi ne tikei kwara ne saruki na gita, diko te tangaloi kwara ne kaho. Vake a tangaloi ne tikei kwara ne horoki na bue, diko te tangaloi kwara ne horoki na tavui. A roro na kinau vano hi rana he rongora te taliku. A tangaloi hinea rau haburu lo kihikihi kinau rana tikei. A roro na vatu hi mo toko vai vurivuri na uit* mo mulemai kina vulaoa, ne tikei. #Aes 24.8; Esik 26.13 23A laeti ne tikei kwara ne kwaka, vake a dilao na tangaloi na lakiana mai vavinehina hinea raru mori laki hi nga, vae ne tikei. Tuai, a nomu tangaloi bihubihu aira rau sileti na tangaloi bihubihu lo varamana. Vae komo sina na tangaloi na ureure savia kina nomu novo hati, komo kwiribibira tavuti na nomu huirana.” #a Jer 7.34; 16.9; 25.10; b Aes 23.8; d Aes 47.9

24A gwatuivanua lakua hika Babilon, a kakadiki u kihia huri a dai na tangaloi duruduruki mana dai na tangaloi noi God u eno luna. Kareaki a dai na tangaloi doluakinira hinea a tangaloi ramo kwohi mateira lo varamana, vae u eno lo gwatuivanua lakua hi Babilon. #Jer 51.49; Esik 24.7; Rev 6.10; 17.6; 19.2

Currently Selected:

REVELESEN 18: HWT

Highlight

Copy

Compare