REVELESEN 10
10
A kaihora tina taetae a nona buku kelekele eia
1Hikani nu tagai na kaihora lolo taetae hinea a nona huirana eia mo hivo tina taetae. A taenalangi ramo kalu korokoroa, vake a nuenue mo hari dalidali na gwatuna. A nakona u kwaka hoki na mataniaho, vake a garuna rau sea hoki na kabu mo luamea bakotoki tagaulu. 2U hagovi na buku* kelekele lo kabana rau vukeria ba. Mo tau na matuai garuna lo tahi, a ngwairina auta. 3Hikani mo kware karakara, nu rongo na leona hoki na laeon hinea mo toko ngara laliki. Lolona hi mo ngara kwehi, a gwatuhari mo dalagwoa vakaibitu kwara ne darakinia. 4A gwatuhari mo dalagwoa vakaibitu hi, nomo vai kwara na uli na leo hi mo vanamai tiua. Vae nomo rongo na dilao mo tangi tina taetae mo viti “Ko kwiribibi na leo hi tavuniki lolo domimu hinea mo vanamai tina gwatuhari hika, ko hatu ulibibira.” #Dan 8.26; 12.4,9
5Hikani a kaihora tina taetae hi nomo tagaia mo tu a garuna kairuaki lo tahi, kairuaki auta, mo hokaki na matuai kabana u tihu vaki lolo taetae. #Dut 32.40; Dan 12.7 6Vunu mo hahariki tilui God aia hi i Tatoka nehe mate lai tea, aia hinea mo tau na taetae mana kinauki savia, vunu a tano mana kinauki savia, vunu a tahi mana kinauki savia vake. Hikani a kaihora hi mo viti kwara, “Hete kinau kwara vae ne tu koroa taliku. #Jen 14.19,22; Eks 20.11; Neh 9.6; Sam 146.6 7A kaihora tina taetae kaibituki ne horoki na bulana tavui, vae lo taro hi a domiana noi God ne mule luna. A nona domiana hi u vitia ba lakwa na bulana tangaloi boloki, aira hi a tangaloi* duruduruki, vae u eno tavuniki radu nga, vae ne mule luna hika lai nga.” #Dan 9.6,10; Amos 3.7; Sek 1.6
8Hikani a dilao hi mo kwaha maiau tina taetae mo kwaha maiau taliku, mo viti kwara, “Ko vano ko lavi na buku hi rau vukeria ba, hinea mo eno lo kaba na kaihora tina taetae hinea u tu a garuna kairuaki lo tahi kairuaki auta.”
9Vunu nomo vano vaki mana kaihora tina taetae hi, nomo uduhuri kinia kwara ne bete na buku kelekele hi lakweau. Aia mo viti lakweau kwara, “Ko lavia ko kania. Vae kona rongoa lolo kwakwamu u lulumu hoki na tovu, vunu kona rongo na tagwangimu ne kadiko.” #Esik 2.8; 3.1-3 10Hikani nomo lavi na buku kelekele hi tina kabana, nomo kania. Nomo rongoa lolo kwakwagu u lulumu hoki na tovu. Vae lolona nomo donomia mo rovo nu rongo a tagwangigu u kadiau kinia.
11Hikani nomo rongo na tangaloi mo kwaha maiau mo viti “Kona duruki na leo ti God taliku huri na tangaloi lo ureure rusa, mana tangaloi mataroi, maira hinea rau vanamai lo leo gwatu na rusa, vake mana hugwe lalakua maira.” #Jer 1.10; 25.30; Dan 3.4; 7.14
Currently Selected:
REVELESEN 10: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
