REVELESEN 11

A tangaloi na hagoleo kairua

1Hikani rau bete na mavuro lakweau, aia hoki na kaidumu gwaravu. Vunu i God mo kwaha maiau mo viti “Ko maraka ko vano ko dumuki na nogu Ingwa Kokona mana nogu voda, #11.1: Lo duviki tomuaki na kwahakwaha hi, aira Kwalaha rau viti kwara, Ko maraka ko vano ko dumuki na nogu Ingwa Kokona mana nogu kwotakwota, vake ko valuki na tangaloi hi rau kaluhakiau lolo Ingwa hi. #Esik 40.3; Sek 2.1-2 2Vae a loloiara na nogu Ingwa tavalavarea, ko tirakinia ne eno. Ko hatu dumukia huri a loloiara hi, u eno lakwa na tangaloi ba hinea rahe kikilai God tea. Rana bile rahaki na nogu Gwatuivanua Kokona a vula ngavu kaivati dongwaki kairua. #a Sam 79.1; Aes 63.18; Sek 12.3; Luk 21.24; b Rev 12.6; 13.5 3Vae nari hora na nogu tangaloi kairua, hi raru lugwaki na lugwa rau vatukira kina vulu na nani maeto hinea a kaivosangi na mateana. Vae lo rani aira hika u tari vakatukwale eviki vidolua vakairua eviki ngavu kaiono #11.3: u tari vakatukwale eviki vidolua vakairua eviki ngavu kaiono aia hi 1,260. a nogu tangaloi na hagoleo kairua hi vae raru ne duruki na leogu tivarea.”

4A tangaloi na hagoleo hi kairua i rarua hoki na vikai kairua hi a violev, vunu vake i rarua hoki na laeti kairua hi raru mo toko tu lo nako i God hinea a Hugwe Lakua u hugwe koro na varamana. #Sek 4.3,11-14 5Diko te tangaloi u vai kwara ne magarakirarua, a kabu ne ngwalua lai tina kwakwagaru ne magaraki na nogaru tavaluivuro. Lo hala hokinia hi, aira hi ramo vai kwara rana magarakirarua, vae rana mate. #2 Saml 22.9; 2 King 1.10; Sam 97.3; Jer 5.14 6Raru hago huirana kwara raru ne tu koro lavi na uha, kwara vae lo taro hi raru ne duruki na leo ti God, nehe uha tea. Vake raru hago huirana koro na kwai mauri, kwara rana bohi ki dai. Vake raru hago huirana kwara raru ne lavi na lengeana hati mataroi vanamai, rana magaraki na tangaloi na varamana. A kinau aira vano hi raru ne vai lavira vataha na taroki hokinia raru lengaia kwara raru ne vai luna. #a 1 King 17.1; b Eks 7.17,19-20; d 1 Saml 4.8

7A tangaloi na hagoleo kairua hi raru ne viti vunuhi na nogaru leo hi ne rovo hinea i God mo bete lakwararua, vunu a boboroa ovi hi ne ngwalua tina kwalu bua hinea a kwotoki tikei, vae ne vai vuro vovohirarua. Aia neri guirarua, neri kwohi mateirarua. #a Dan 7.3; Rev 13.1; 17.8; b Dan 7.7,21; Rev 12.17; 13.7 8Vae a tarabehigaru rana va saro lo hala lo gwatuivanua lakua hi, hinea tuai ramo duru na nogaru Hugwe* i Jisas tilo kaibetu eia. A gwatuivanua lakua hi tana vai lai tana kwarekinia kwara “Sotom” diko “Isiv”. #a Luk 13.34; b Aes 1.10 9Hikani a tangaloi tina ureure savia, rau gwalo vanamai lo gwatuidamu vunuhia, rau vanamai lo leo gwatu na rusa, aira a tangaloi mataroi, vae rana tagai na tarabehigaru a rani kaitolu kaivatiki duviki. Vae ranahe tirakirarua tea kwara a tangaloi rana tanomirarua. 10A tangaloi* duruduruki hi kairua raru duruki na leo ti God vae a tangaloi savia lo varamana rana rongo hati haburu kinia. Vae raru ne mate, a tangaloi vano hi ne havutira haburu. Hikani vae rana vai a kanikani hurirarua, rana hokohoko lakwai rabelaga, rana matai na kagaru mateana.

11Vae hikani lo vakatabobo hi i God u vosangia lakweau, nomo taga kwara takuni tina rani kaitolu kaivatiki duviki, i God mo bete mabugaru kwara vae raru ne ahi taliku. Hokinia raru mo maraka raru mo tu. A tangaloi vano hi rau tagairarua, rau mataku haburu. #Esik 37.5,10 12Hikani a tangaloi duruduruki kairua hi, raru mo rongo na dilao mo tangi tina taetae mo viti lakwararua kwara, “Kuru vanamai vaki hike.” A nogaru tavaluivuro ramo tagataga hurirarua, raru mo vano tagaulu lolo taenalangi vaki lolo taetae. #2 King 2.11 13Lo taro aia hi vohoki, a ruru lakua. A gwatuivanua lakua hi u makwahe gwatu hangavulu vae katukwale mo masurati, kaihikwa maeno. A valuvalu na tangaloi savia ramo mate kina ruru lakua hi, aira u tari vakaibitu. Aira hi rahe mate tea, rau mataku haburu, ramo tabe hakeki na hina i God lolo taetae. #Esik 38.19-20

14Aia hi a rongoana hati haburu kairuaki u rovo ba. Vunu kaitoluki aia radu nga ne vanamai nehe tuai tea.

A kaihora lolo taetae kaibituki u horoki na bulana tavui

15Hikani a kaihora lolo taetae hi kaibituki mo horoki na bulana tavui, vunu a dilao rusa lolo taetae ramo tangi ramo viti “Hikani a mamalukoro na varamana rau eno tavuti na huirana na noda Hugwe i God, vake tavuti na huirana na nona Vurae* hinea u mataia kwara ne kwareki a Hugwe Lakua. Vae aia ne hugwe koro na kinau savia vaki tuai, a gwereki tikei.” #Eks 15.18; Sam 10.16; 22.28; Dan 2.44; 7.14; Obad 21; Sek 14.9 16Hikani a ngwarasea* ngavu kairua dongwaki kaivati hinea ramo toko hugu lo hagehagelega koro na nako i God, ramo sovi hivo vovohia ki nakoga ramo kaluhakinia kina domi mavakiana, 17ramo viti

“Hugwe i God.

I nigo ku hago huirana

koro na kinau savia.

I nigo ku toka hika karagwa,

ku toka tuai ba.

I kami keu lai nomai lagwaana lakwako,

keu lagwakinigo

huri lalahi na nomu huirana lakua

komo tinakaki

komo hugwe koro na kinau savia. #a Amos 3.13; 4.13; Rev 1.8; 4.8; 15.3; 16.7,14; 19.6,15; 21.22; b Eks 3.14; Rev 1.4,8; 4.8; 16.5

18A tangaloi na ureure savia

rau vai nakara haburu.

Vae hika a taro na nomu lologute

u maravuti.

Hikani a taro

kwara kona kwaheki na doridori

na tangaloi hi rau mate.

Hikani a taro

kwara kona bete na kaitakwe

lakwa na nomu tangaloi boloki

hinea aira a tangaloi* duruduruki,

vake lakwa na nomu tangaloi

hinea rau domi mavakinigo,

aira hinea a tangaloi lalakua

maira hi a tangaloi haro nga.

Hikani a taro

kwara kona magarakinira

hinea ramo toko magaraki na varamana.” #a Sam 2.1; 46.6; b Dan 9.6,10; Amos 3.7; Sek 1.6; d Sam 115.13; Rev 19.5

19Vunu a Ingwa Kokona noi God lolo taetae u matakahi, a tangaloi ramo taga hokoti na Bokisi Lakua, hinea aia a Kaimatai na Leo Harikiana noi God mana bulana tangaloi. Vunu mo vila, a gwatuhari mo hari, mo ruru lakua, vake a uha mo mulemai kina vatu na aes* mo ngwangwarasuki. #a 1 King 8.1,6; 2 Kron 5.7; b Eks 19.16; Esik 1.13; Rev 8.5; 16.18; d Eks 9.24; Rev 16.21

Currently Selected:

REVELESEN 11: HWT

Highlight

Copy

Compare