HIBRU 2

A hala noi God kwara ne vakahikikita u karea haburu

1Vae huri hi i kita tana huira karakara huri kwara tana kwiribibi ne madi na leo na vitikareaki vano hi tau rongora ba, kwara vae ta hatu vano salasala tina halada. 2Tau taga ba kwara a leo hinea a kaihora tina taetae ramo lavia vanamai vaki mai ratubuda u kareaki vohoki. A tangaloi hinea rau galo lo leo hini, diko rahe rongohuria tea, rau kwali na kakadiki bakoto huria. #Bol 7.38,53; Gal 3.19 3?Vae diko tau domi bulakiki na hala hinea i God u taua kwara ne vakahikikita hinea u karea karakara, vae tana kwalao lai kworohokinia tina kakadiki? A noda Hugwe* aia hi tomua halaradu mo viti huri na hala hi lakwakita, vunu aira hinea rau rongoa ramo vosangia lakwakita kwara a hala hi u kareaki. #Hib 10.29; 12.25 4Vunu vake i God u bulu maira mo vosangi kwara a hala hini u kareaki, huri mo vai na kaivosangi mana idilakiana mana vaisea gwatu na rusa. Vunu vake mo toko hile lakwa na tangaloi a hilehile na huirana hinea a Tanungwe Kokona mo toko hile, hokinia hinea aia u lengaia. #1 Kor 12.4,11

I Jisas u tomuakikita lo hala hinea i God mo taua kwara ne vakahikikita

5I God he tau na kaihora lolo taetae tea kwara rana hugwe koro na varamana karagwa hinea vae ne vanamai. A varamana hi, aia hi tamo toko viti huria. 6A leoki lo Uliuli* Kokona u viti kwara,

“God.

I kami a tangaloi,

a kinau tikei vohoki lumai

kwara ne vaiko kona toko domihagwekami luna.

I kami a raranatu na tangaloi,

a kinau tikei lumai

kwara kona toko tagahurikami luna. #Sam 8.5-7

7Vae huri na taro gwanugwanu vohoki

i nigo ku vaikami i kami evina

sileti na kaihora lolo taetae.

Vae hikani komo tabe hakekikami,

komo bete na hina lakua lakwakami,

8komo vaikami kemo hugwe koro na kinau savia.”

A leo hini mo viti kwara i God mo vai na tangaloi ramo “hugwe koro na kinau savia” a domianaki kwara vataha na kinau savia. Vae hika tahe tagahagwe tea kwara a tangaloi rau hugwe koro na kinau savia. #1 Kor 15.27 9Vae tamo tagahagwe kwara i Jisas aia u hugwe koro na kinau savia. I God u lagwa kwara ne hago mana tangaloi kina nona domi tabetabe lakua vae huri hi mo vai i Jisas aia evina sileti na kaihora lolo taetae lo taro gwanugwanu, kwara vae ne mate kwara ne lai a tanotano na tangaloi savia. I Jisas mo rongo hati lo tarabehina tarisaki mo mate, vae huri hi tau taga kwara i God u tabe hakekinia mo bete na hina lakua lakwae. #Vil 2.8-9

10I God aia hi u tau na kinau savia, vae a kinau savia rau kwareki a nona, aia u lengaia kwara ne lavi ranatuna rusa rana bulu maia lo nona karekarea lolo taetae. Vae i God u vai u taritarisa mo tiraki i Jisas mo rongo hati lo tarabehina, kwara ne vaia ne mulemai kina tangaloi bakotoki na vakahiki tangaloi. Vae hikani i Jisas aia a kaitomuaki na tangaloi hinea i God ne vakahikinira. 11U vaira ramo ngwasara tina noga hatiana ramo kokona. Vae aia, maira hinea mo vaira ramo ngwasara, i Tamaga katukwale vohoki. Huri hi i Jisas he maemae tea kwara ne viti kwara aira i ratuana. #Mat 25.40; Mak 3.35; Sione 20.17 12U viti kwara,

“God.

Nana viti huri na bohianamu savia

lakwai ratuagu.

Na kaho kaluhakinigo

koro na nako na tangaloi savia.” #Sam 22.22

13Vunu mo viti kwara,

“I nau vae na tau na domigu

ne madi lui God.”

Vunu taliku mo viti kwara,

“I nau hike mana raranatu

hinea i God u betera ba lakweau.” #a Aes 8.17; b 2 Saml 22.3; Aes 12.2; d Aes 8.18

14A raranatu hinea i Jisas mo viti hurira aira a tangaloi hinea a tarabehiga mana daiga eia. Vae huri hi i Jisas vake mo mulemai ki tangaloi, mo hokinira bakotoki, mo bulu lo mauriana katukwale maira. U vai hokinia hi kwara vae lalahi na kana mateana ne vai magaraki na huirana nona tanungwe hati i Setano*, aia hini mo hago huirana koro na mateana. #Sione 12.31; 1 Sione 3.8; Rev 12.10 15I Setano u gwarubibi na tangaloi tigwaravu lo noga mauriana hokinia aira a tangaloi gwarugwaru vohoki, huri rau mataku kina mateana. Vae i Jisas u mate kwara ne luahi na tangaloi gwarugwaru vano hi rana materi. 16U matangwasara kwara i Jisas he hago te mana kaihora lolo taetae. Aia a Uliuli Kokona u viti kwara, “U hago maira hinea rau gwalo vanamai lui Evraham.” #Aes 41.8-9 17Vae huri hi mo vai hokinia hika. Tomuaki mo mulemai mo taritarisa hoki ratuana vano hi, kwara vae ne mulemai ki noga Hugwe na Tangaloi* Lingilingi lo nona bolokiana lakwai God. Aia a noga Hugwe na Tangaloi Lingilingi hinea u hakavira, rau hauhuri lai luna, vae huri hi mo vai na hala kwara i God ne domidomi koro na noga hatiana. #a Vil 2.7; Hib 2.14; b 1 Sione 2.2; 4.10 18Vae hikani ne hago lai maira hinea a kinau ramo toko vai rongohira, huri aia vake a kinau vano hi rau vai rongohia ba, vunu aia vake u rongo hati luga ba. #Hib 4.15

Currently Selected:

HIBRU 2: HWT

Highlight

Copy

Compare