HIBRU 1

I God u lalahi i Natuna mo kwaha maikita

1Tuai, lo hukao rusa hinea rau vano ba, i God u tuku kwaha mai ratubuda vakarusa lalahi na tangaloi* duruduruki maira lo hala mataroi. 2Vae lo taro hika hinea a varamana u garagarani kwara ne rovo, i God u lalahi Natuna mo kwaha maikita. A Natu hi, i God mo lalahia mo tau na kinau savia lo varamana maia lolo taetae. Vake i God u mataia ba kwara vae lo taro hinea a varamana ne rovo savi na kinau lo varamana rana kwareki a nona. #Sam 2.8; Mat 21.38; Sione 1.3; Kol 1.16 3Aia u vosangi na nunu na hahaviada noi God. Aia a nunu i God bakotoki hinea u vosangi na bohianana savia. U kwiribibi na varamana doluaki mana taetae doluaki ramo eno tabetabeki kina leona hinea a huirana luna. Mo vai na tangaloi ramo ngwasara tina noga hatiana, vunu mo vano mo hugu lolo taetae lo matuai God hinea u hago huirana savia. #a 2 Kor 4.4; Kol 1.15; b Sam 110.1; Mat 22.44; Mak 16.19; Bol 2.34; Eves 1.20; Hib 8.1; 10.12; 12.2

I Natu i God u lakua karakara sileti na kaihora lolo taetae

4I God u tabe hakeki i Natuna aia aulu karakara sileti na kaihora lolo taetae, hoki na hina hinea i God u betea lakwae ba u lakua sileti na hinaga. #Eves 1.21; Vil 2.9 5I God he viti te vohoki kwara te lakwa na nona kaihora lolo taetae te katukwale kwara,

“I nigo i Natugu.

Hika karagwa

nu kwareki i Tamamu bakotoki.”

Vake i God he viti huri na nona kaihora tea, kwara te katukwale lolo taetae kwara

“I nau na kwareki Tamana,

aia ne kwareki Natugu.” #a Sam 2.7; b Bol 13.33; Hib 5.5; d 2 Saml 7.14; 1 Kron 17.13

6Mo garagarani kwara i God ne hora i Natuna hinea mo vora tomua halaradu vanamai tilo varamana, mo viti na leo hika kwara,

“Savi na kaihora noi God lolo taetae

rana sovi hivo vovohia

kina domi mavakiana.” #Dut 32.43; Sam 97.7

7Vae i God u viti huri na kaihora lolo taetae kwara,

“Nu vai na nogu kaihora lolo taetae

rau hoki na langi.

Nu vaira hinea rau boloki nogu

rau hoki na kabu mo toko luamea.” #Sam 104.4

8Vae lolona mo kwaha mai Natuna mo viti kwara,

“God. I nigo a Hugwe Lakua,

vae kona hugwe koro na tangaloi

vaki tuai a gwereki tikei.

Ku hugwe koro na nomu tangaloi

lo hala bakoto. #Sam 45.6-7

9Ku lagwa mana doridori bakoto,

ku bemu kina hatiki.

Vae huri hi,

i nau a nomu God nu vuraeko,

nomo mataiko,

vake nu vaiko komo rongo karea,

huri nu tabe hakekinigo karakara

sileti rabuluimu.”

10Vunu i God mo viti vake kwara,

“Hugwe*.

Lo tinatinakakiki

i nigo ku tau na varamana,

vake ku kihi na taetae kina kabamu. #Sam 102.25-27

11A kinau aira vano hi

vae rana va titikeiki,

vae i nigo ku toka.

A kinau vano hi savia

vae rana va hati

hoki na lugwa ngwanika,

12vae te taroki

i nigo konari lulu tabetabekinira

kona taura,

hoki na tangaloi mo teri kakavuna

mo lulu tabetabekinia.

Konari kwanira

hoki na tangaloi mo kwaniki na lugwana.

Vae i nigo kwehi tigwaravu,

kohe bohi tea,

vake a mamaurianamu

nehe rovo lai tea vohoki.”

13Vae i God he viti te vohoki lakwa na nona kaihora kwara te katukwale lolo taetae kwara,

“Ko hugu hikeni lo matuagu,

ko mabu,

tarisaki hi na vai na nomu tavaluivuro

rana hugu tavutimu,

rana kwareki a nomu tangaloi boloki vuroki.” #Sam 110.1

14A kaihora lolo taetae aira a tanungwe kehekeheki, rau boloki noi God, mo toko horara laliki kwara rana hago mana tangaloi aira hinea vae ne vakahikinira. #Sam 34.7; 91.11

Currently Selected:

HIBRU 1: HWT

Highlight

Copy

Compare