1 KORIN 5
5
A tangaloi katukwale lo kwarelua u vai na doridori hati haburu
1A tangaloi rau tuku viti kwara te katukwale tikamu takwa-hi u vai na doridori hati hinea u hati haburu vohoki. A tangaloi hinea rahe kikilai God tea, mana tangaloi haro nga ranahe vai na doridori te hokinia hi. Rau viti kwara a tangaloi hi u maturu mai vavinehi i tamana vohoki hinea i vavinehina kairuaki. #Lev 18.7-8; Dut 22.30; 27.20 2?Kworohokinia a domidomimiu mo hake haburu? Aia u taritarisa kwara i kamu tulu ne rongo hati tulu ne tangi huri na kinau hini. Vae a tangaloi hinea u vai na doridori hati haburu hini, u taritarisa kwara tulu ne taua letiu tina nomiu bulubulu.
3-4Kareaki i nau nu hugu vakahao haburu tikamu, vae a domigu aia maikamu. Vae lo hina na Hugwe* i Jisas i nau nu taga kwaheki na doridori na tangaloi hi ba huri na kinau hini mo toko vai, hokinia kwara i nau nu hugu maikamu. I kamu tulu ne bulu tabulutaki lo hina na Hugwe i Jisas vae na bulu maikamu lo domidomigu. Vae kina huirana nona Hugwe i Jisas #a Kol 2.5; b Mat 16.19; 18.18; 2 Kor 13.10 5tulu ne tau na tangaloi hi tilo kaba i Setano* kwara a tarabehina ne va sala kwara vae i God ne vakahiki na tanungwena lo Rani* nona Hugwe. #5.5: Lo Rani nona Hugwe. Kona taga A RANI NONA HUGWE lo Deksenare lo buku hika takuni. #1 Tim 1.20; 1 Pita 4.6
Tulu tau letiuki na tangaloi hinea rau tuku vai na hatiki
6He taritarisa tea kwara a domimiu rana hake hokinia hi. Tulu kikilai na leo katukwale hinea mo viti kwara, “A is kelekele vohoki, vae ne vai lavi na vulaoa savia ne maraka.” #Gal 5.9 7Tulu tau letiuki na vaivai hati, hokinia tulu mo tau letiuki na is tuai, vunu tulu ne hoki na vulaoa karagwa hinea he maraka tea, a is tikei lolona. Kareaki i kamu hoki na bereti na Tivekiana hinea a is tikei lolona. Vae i Kraes* a noda kairoroi*, rau kwohi mateia ba. Aia hoki na sivsivi* kelekele hinea rau kwohi mateia lo taro na Kanikani* na Tivekiana. #a Eks 13.7; b Eks 12.21; Aes 53.7; 1 Pita 1.19 8Vae huri hi, u karea kwara tana vai na noda Kanikani na Tivekiana. Vae diko a is tuai aia luda radu, hinea hoki na vaivai hati mana doridori hinea rahe taritarisa tea, vae tanahe bulu lai tea lo Kanikani hi. A bohibohianada rana ngwasara vohoki, rana kareaki, vunu tana bulu lai lo Kanikani hi, vae tana hoki na bereti hinea a is tikei lolona. #Eks 12.3-20; 13.7; Dut 16.3
9Lo leta hini nu uli lakwakamu ba, nu viti lakwakamu kwara tulu ne hatu bulu mana tangaloi hinea rau tuku vai na doridori hati. #Mat 18.17; 2 Tes 3.14 10Vae nohe viti tea lakwakamu kwara tulu nehe bulu tea mana tangaloi hinea rahe kikilai God tea, rau tuku vai na doridori hati, rau lengai na kinau vatahae, rau balubalu, vake rau tuku tiutangaroa lakwa na takaro vuroki. Diko tulu lengaia kwara tulu nehe bulu tea maira taliku, a hala katukwale vohoki, tulu ne salati na varamana. 11Vae lo leogu nomo viti lakwakamu kwara tulu ne hatu bulu mana tangaloi hinea rau tuku viti kwara aira i rabelada lui Kraes, vae aira rau tuku vai na kinau vano hi. Diko rau vai na doridori hati, diko rau lengai na kinau vatahae, diko rau tuku tiutangaroa lakwa na takaro vuroki, vae tulu ne hatu bulu maira. Diko rau vitiviti huri tangaloi, diko rau inuinu ramo reraka kinia, diko rau balubalu, vae i kamu tulu ne hatu bulu maira. Tulu hatu hugu mana tangaloi hokinira hi tulu mo kanikani maira. #2 Tes 3.6; Taet 3.10; 2 Sione 10
12-13I nau nahe taritarisa tea kwara na areki na tangaloi hinea aira tavalavarea tina noda bulubulu. I God aia ne arekinira. Vae u taritarisa kwara i kamu tulu ne arekinira hinea aira lo nomiu bulubulu. Hokinia a Uliuli* Kokona u viti kwara, “Tulu tau letiuki na tangaloi hati hi tina nomiu bulubulu.” #a Mak 4.11; b Dut 17.7; 19.19; 22.21,24; 24.7
Currently Selected:
1 KORIN 5: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
