1 KORIN 6
6
A tangaloi noi Kraes rana vai tabetabeki a noga rongoana hati siboga
1?Tulu tuku vai kworohokinia? ?Diko te lo taroki te katukwale tikamu u viroro te huri na kinau katukwale mai tuana lui Kraes*, kworohokinia hi mo tau na kinau hi tilo kaba na tangaloi hinea rahe kikilai i God tea kwara rana vai tabetabekirarua? 2?Tulu he kikilai tea kwara vae i kita a tangaloi noi God tana taga kwaheki na doridori na tangaloi savia lo varamana? Io, diko tulu taritarisa kwara tulu ne taga kwaheki na doridori na tangaloi savia lo varamana, tulu taritarisa kwara tulu ne taga kwaheki na kinau kwaririgi hokinia hi. #Dan 7.22; Rev 3.21 3?Tulu he kikilai tea kwara vae te lo taroki i kita tana taga kwaheki na doridori na kaihora na taetae noi God? Diko kwehini, hi vunuvunuhi na kinau rusa hike lo varamana rana magemu kehe nga. 4?Lo taroki a tangaloi ramo viroro hokinia hi, kworohokinia tulu mo maraka tulu mo tau na noga rongoana hati tilo kaba na tangaloi hinea rahe kikilai i God tea? A tangaloi aira vano hi a tanotanoga tikei lo kwarelua*. 5Hi a maemaeana lakua vohoki lakwakamu. ?A tangaloi tikei maikamu kwara u kikikila ne vai lai ne vai tabetabekinira hinea rau viroro lo nomiu bulubulu? Kareaki a tangaloi eia. 6?Kworoho hi tulu tuku tau i ratuamiu lui Kraes tilo kaba na tangaloi hinea rahe kikilai God tea kwara rana taga kwaheki na nomiu rongoana hati?
7A doridori hokinia hini tulu mo vano vaki lo tanotano na arekiana huri na nomiu viroroa, aia hi u vosangi matangwasaraki kwara tulu vakasile vohoki. ?Kworohokinia tulu he va tirakinira tea kwara rana vai kinau hinea rahe taritarisa te vovohikamu? ?Kworohokinia tulu he va tirakinira tea kwara rana balu tikamu? Aia hi u karea sileti na doridori hi. #Mat 5.39; 1 Tes 5.15; 1 Pita 3.9 8?Vae i kamu a hava tangaloi hokinia hi? Tulu vituatua, vae tulu he vaivai karea te maikamu, vake tulu tuku babalu tikamu.
9Tulu kikilai ba. A tangaloi hinea rau vai kinau rahe bakoto tea, vae ranahe soro lai tea vaki lo Vanua Karagwa hinea i God u hugwe koroa. Tulu hatu sinakamu sibomiu. A tangaloi hinea rau livu ravavine, maira hinea rau tiutangaroa lakwa na takaro vuroki, vae ranahe soro lai tea vaki lo Vanua Karagwa hi. A tangaloi hinea u maturu mana vavine hinea a vavinehi na tangaloi dolua, vunu a vavine mana ngwera dolua, a ngwera mana ngwera, a vavine mana vavine, vae ranahe soro lai te vohoki. #Gal 5.19-21; Eves 5.5; Rev 22.15 10A tangaloi hinea rau balubalu, aira hinea rau lengai na kinau vatahae, aira hi rau inuinu hati ramo reraka kinia, aira hi rau vitiviti huri tangaloi, maira hinea rau bihubihu lo babalua, vae ranahe soro lai tea. A tangaloi hokinira hi, vae ranahe soro lai te lo taroki vaki lo Vanua Karagwa hinea i God u hugwe koroa. 11Tuai i kamu ratuaki hokinia hi. Vae hikani a noda God u kwasu na nomiu vaivai hati letiu mo vaikamu tulu mo ngwasara. Mo vaikamu tulu mo kokona tulu mo kwareki a bulana tangaloi, tulu mo bakoto lo nakona. Aia u vai na kinau vano hi lalahi na hina na Hugwe* i Jisas Kraes, vunu vake lalahi na Tanungwe na noda God. #Taet 3.3-7
Tulu tabe hakeki na hina i God kina tarabehimiu
12A tangaloi tuaki rau viti kwara, “A korokoro he tu koroau tea kwara na vai vunuhi na kinau.” Io kareaki, vae hete kinau vunuhia kwara rau karea hurikita. Nana viti lai kwara, “A korokoro he tu koroau tea kwara na vai vunuhi na kinau.” Vae nanahe tiraki na kinau tea kwara te katukwale ne hugwe koroau. #1 Kor 10.23 13A tangaloi tuaki rau viti kwara, “A hinaka huri na tagwangi, a tagwangi huri na hinaka.” Io kareaki, vae a kinau kairua hi i God ne lavira letiu rana va tikei. A tarabehida hete kwara tana livu ravavine kinia, vae aia kwara tana tabe hakeki na noda Hugwe* kinia. Vunu a Hugwe u bete kinau huri na tarabehida. #1 Tes 4.3-5 14I God u rakati na noda Hugwe tina mateana, vae ne rakatikita vake tina mateana kina nona huirana. #Rom 8.11; 1 Kor 15.15,20; 2 Kor 4.14
15Tulu kikilai ba kwara a tarabehida a duvi na tarabehi i Kraes*. Vae huri hi nanahe vai lai tea kwara na maturu mana vavine hinea u tu huri hala. ?Tulu domi kwara u taritarisa kwara na bulutaki na duvi na tarabehi i Kraes mana vavine hokinia hi? !Hete vohoki! #Rom 12.5; 1 Kor 12.27 16?Vae diko tulu he kikilai tea? Diko a tangaloi u maturu mana vavine hinea u tu huri hala, hi raru mulemai ki tarabehi katukwale. Hokinia a Uliuli* Kokona u viti kwara, “I rarua raru ne mulemai ki tarabehi katukwale.” #Jen 2.24; Mat 19.5 17Vae a tangaloi hinea u hariki lo Hugwe u mulemai katukwale mai God lo Tanungwe. #Sione 17.21-23; Rom 8.9-11; Gal 2.20
18I kamu a ngwera, tulu hatu vai a doridori hati mana vavine. I kamu a ravavine, tulu hatu vai a doridori hati mana ngwera. A hatiana ratuaki a tangaloi rau tuku vai, vae rahe magaraki na tarabehiga tea. Vae a tangaloi hinea u vai a doridori hati mana vavine aia u vai bulakiki na tarabehina u magarakinia. 19?Vae kworohokinia? ?Tulu he kikilai tea kwara a tarabehimiu aira rau kwareki a Ingwa Kokona nona Tanungwe Kokona hinea i God u betea lakwakamu, vae u toka lumiu? Tomua a tarabehimiu a nomiu, vae hikani a noi God. #1 Kor 3.16; 2 Kor 6.16 20Aia u volitukuhikamu ba kina kaivoli lakua vohoki. Vae huri hi tulu ne tabe hakeki na hina i God kina tarabehimiu doluaki. #a 1 Kor 7.23; 1 Pita 1.18-19; b Vil 1.20
Currently Selected:
1 KORIN 6: HWT
Highlight
Copy
Compare
Share
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.
