PAKI TEA NI ROMA 8

1Nalakena tea wanogoe te natip̃akotoviana paki tea maga waina eu doko Kristo Yesu e da doko mau. 2Nalakena nawotaeana ki Naatana ni namauriana doko Kristo Yesu e peresi au m̃elu dua ki nawotaeana ni namarinaleosaana go ni namateana. 3Nalakena tea waina nawotaeana e mari sa mari a, nalakena e manainai pae nap̃okasi, Sup̃e, waina e dip̃aki lua Natuna umai doko natakiusiana ni nap̃okasi ni namarinaleosaana, go nalakena namarinaleosaana, e dip̃akotovi namarinaleosaana doko nap̃okasi: 4naga natawonakiana ni nawotaeana ega vei tea vakavuroana nalo kakagida waina tu da surata pae nap̃okasi mau, ma tu surata pae naatana. 5Nalakena tea maga waina eu pei tea vae nap̃okasi eu midoa ki tea maga ni nap̃okasi; ma tea maga waina eu pei tea vae naatana eu midoa ki tea maga ni naatana. 6Nalakena namidodoana ni nap̃okasi e pei namateana, ma namidodoana ni naatana e pei namauriana go natam̃ateana: 7nalakena namidodoana ni nap̃okasi e pei nakokonaana paki Sup̃e; nalakena e da doko etano paki nawotaeana ki Sup̃e mau, go e mari sa doko etano paki nia. 8Ma tea maga waina eu doko nap̃okasi eu mari sa pei tea midoakim̃atakiana ki Sup̃e. 9Ma nimu Naata ni Sup̃e e pe toko mu doko, ku da doko nap̃okasi mau, ma ku doko naatana. 10Ma te naata e pe tika ki Naata ni Kristo, nae e da pei tea aneana mau. Ma Kristo e pe toko mu, nap̃atokomu e pe mate lomau nalakena namarinaleosaana; ma naatamu e pe vei namauriana nalakena namarinaleoleanaana. 11Ma Naata ni tea waina e sike Yesu e duleana m̃elu dua ki tea mate maga e pe toko mu doko, tea waina e sike Kristo Yesu e duleana m̃elu dua ki tea mate maga e pe wo pakamauri ki nap̃atokomu maga waina euga wo mate pae Naatana aneana waina e doko mu doko.

12Nalakena tea wanogoe, tai maga, naleo e one gida one, e da pei tea ni nap̃okasi mau, naga tuga mauri pae nap̃okasi: 13nalakena ku pe mauri pae nap̃okasi, e pe one mu one naga kuga mate; ma ku pe mari punue nawosiana maga ni nap̃atokomu ki naatana, ku pe wo mauri. 14Nalakena tea maga waina eu pei tea marakiana ki Naata ni Sup̃e, nara eu pei Sup̃e natuna maga. 15Nalakena ku da moro dape naatana ni naveinaviti‐ana paki namatakuana mau; ma ku dape naatana ni navakasereana, waina tu do pioso, Abba, Mama asa. 16Naatana nogo e do noasokisoki sikoti naatagida, naga tu pei Sup̃e natuna maga: 17ma tu pe vei natuna maga, tu pe vei tea veanipioli maga, tea veanipioli maga ki Sup̃e, go tea veanipioli maga sikoti Kristo; tu pe sua tea sa maga sikoti a, naga tuga vei tea samasamaniana sikoti a.

18Nalakena a midoaki nia naga narogokitesaana maga ni ragi waia eu pei tea m̃oli ragi waina tu midoaki nasamasamaana waina ega wo pei tea mari‐pakasa‐kiana nalo kakagida. 19Nalakena naleogoroparatikiana ni tea tawonakiana e do leogoro namari‐pakasa‐kiana ni Sup̃e natuna maga. 20Nalakena tea tawonakiana e pei tea mariana e doko etano paki nap̃aloana, e da suasua mau, ma nalakena tea waina e mari a e doko etano paki nia, doko naleogoroana; 21nalakena tea tawonakiana nae ma ega wo pei tea veresiana m̃elu dua ki navei‐naviti‐ana ni namadadaana paki naveresiana ni nasamasamaana ki Sup̃e natuna maga. 22Nalakena tu atae naga tea tawonakiana mamau e do saisai gi po pitinu dakiusi tea visola pa pa paki ragi waia. 23Go tea wanogoe e da sikina mau, ma nigida ma, waina tu peani takavea ni Naatana, nigida ma tu do gi nap̃alaugida, tu do leogoro navakasereana, natauluaana ni nap̃atokogida. 24Nalakena tu pei tea mautipauriana ki naleogoroana: ma naleogoroana waina e pei tea vunusiana e da pei naleogoroana mau: nalakena sei e leogoro tea waina e punusi a? 25Ma tu pe leogoro tea waina tu da punusi a mau, tu leogoro e pae nasokiana.

26Go dapala nogoe Naatana ma e silae namanainaiana anigida: nalakena tu da dapasavasa atae mau dapala waina e one gida one: ma Naatana nogo e manigida do pavara ki nagiana maga waina eu mari sa pei tea vasaana; 27go tea waina e do leo usiusi nap̃op̃o maga e atae tea waina e pei namidodoana ni Naatana, nalakena e magi tea tautau maga do pavara pae namasauana ki Sup̃e. 28Go tu atae naga naleo maga mamau puti eu magi tea maga waina eu dodomi Sup̃e do saisai p̃osiwosi paki tea wia, magi tea maga waina eu pei tea sosoana pae namidoakisokiana aneana. 29Nalakena tea maga waina e pea atae ra, e pea dawona ki da naga euga vei tea maridawonakiana euga tapala nunu ni Natuna, naga nae ega vei takalapa m̃aleoputo ni taina laapa: 30ma tea maga waina e pea dawona ki da, tea maga wanogoe e soso ra; go tea maga waina e soso ra, tea maga wanogoe e mari leana ki da: go tea maga waina e mari leana ki da, tea maga wanogoe e samasamani ra.

31Nalakena tea wanogoe tuga noa nasava nalo ni tea maga wanogoe? Sup̃e e pe vei tea anigida, sei e pe vei tea tip̃a gida? 32Nae waina e da mauti Natuna aneana mau, ma e manigida mamau puti pitua ki nia, ega wo da dua m̃oli ki gida naleo maga mamau puti euga sikoti a kite ekasava? 33Sei ega wo pasadip̃a tea matadoaana maga ki Sup̃e? Tea waina e mari leana ki da e pei Sup̃e. 34Tea waina ega wo dip̃akotovi ra e pei sei? Tea waina e mate e pei Kristo Yesu, ioro, go waina e pei tea sikeana duleana m̃elu dua ki tea mate maga, waina e doko pisari nam̃elearu ni matua ni Sup̃e, go waina e do manigida pavara. 35Sei ega wo mari gida tuga vamawota m̃elu dua ki nadodomiana ki Kristo? Nariesokiana kite? Kite narogokitesaana? Kite nakopaleleana? Kite navitoloana? Kite nam̃alam̃alaana? Kite namatakuana? 36Kite lova? Dakiusi waina e pei tea midiriana, naga

Au pei tea maripunueana naaleatia mamau nalakena nigo;

Au pei tea midoakiana naga au dapala shiip waina euga vei tea maripunueana.

37Ma nalo ni tea maga mamau puti wanogoe tu pei tea mari matua p̃arua ara pae tea waina e dodomi gida. 38Nalakena a saralomau kasua naga namauriana, kite namateana, kite agelo maga, kite tea vei nawota maga, kite tea kasua maga, kite tea maga waina eu doko ragi waia, kite tea maga waina euga wo umai, 39kite elagi, kite epua, kite tea tawonakiana p̃ota sikai, ega wo da mari atae mari gida tuga vamawota m̃elu dua ki nadodomiana ki Sup̃e mau, waina e doko Kristo Yesu Nawota anigida.

Currently Selected:

PAKI TEA NI ROMA 8: NTB

Highlight

Copy