PAKI TEA NI ROMA 7

1Kite ku pei sap̃o, tai maga (nalakena a pasa ki tea maga waina eu atae nawotaeana), naga nawotaeana e maramara dap̃au natam̃oli sikai ragi waina e mauri doko? 2Nalakena nagoroi waina e peani anawota e pei tea soliana ki nawotaeana paki anawota ragi waina e mauri doko; ma anawota e pe mate e pei tea veresiana m̃elu dua ki nawotaeana ki anawota. 3Nalakena tea wanogoe e pe laki naanoai p̃ota sikai ragi waina anawota e ko mauri doko, e pei tea sosoana ki tea maripele sikai: ma anawota e pe mate, e pei tea veresiana m̃elu dua ki nawotaeana, go e pe laki naanoai p̃ota sikai e da pei tea maripele mau. 4Nalakena tea wanogoe, taigu maga, nimu ma ku pei tea mariana ku mate paki nawotaeana pae nap̃atoko ni Kristo; naga nimu kuga laki tea p̃ota, nae waina e pei tea sikeana duleana m̃elu dua ki tea mate maga, naga tuga magi Sup̃e dau ki nawa. 5Nalakena ragi waina tu doko nap̃okasi, narogoana maga ni namarinaleosaana maga, waina eu doko pae nawotaeana, eu do p̃osiwosi naleo kakagida maga naga euga magi namateana dau ki nawa. 6Ma ragi waia tu pei tea veresiana sua m̃elu dua ki nawoteana, tu mate sua paki tea waina tu pei tea tapesokiana doko asa; dapala waina nigida tu suasua pae navei‐tea‐vau‐ana ni naatana, go e da pae navei‐tea‐tuaiana ni namidiriana mau.

7Nalakena tea wanogoe tuga wo noa nasava? Nawotaeana e pei namarinaleosaana kite? Ega ta dapala nogoe mau. Ma nawotaeana e pe ta doko mau, e pe ta atae namarinaleosaana mau: nalakena nawotaeana e pe ta naga, P̃a ta matam̃agura mau, a pe ta atae namatam̃aguraana mau: 8ma namarinaleosaana e puati a, po p̃osiwosi au pae natip̃agoroana ki sara namatam̃aguraana: nalakena namarinaleosaana masale ki nawotaeana e mate. 9Go kinau a mauri masale ki nawotaeana sala vea: ma ragi waina natip̃agoroana e umai namarinaleosaana e darapa, go kinau a mate; 10go natip̃agoroana waina e paki namauriana, a pap̃ai a naga e paki namateana: 11nalakena namarinaleosaana e puati a, po pila surue au pae natip̃agoroana po mari punue au pae asa. 12Nalakena tea wanogoe nawotaeana e dautau, go natip̃agoroana e dautau, go e leana, go e p̃ia. 13Nalakena tea wanogoe tea waina e p̃ia e pei tea mariana e pei namateana paki nau kite? Ega ta dapala nogoe mau. Ma namarinaleosaana, naga ega toko lina naga e pei namarinaleosaana, e do p̃osiwosi ki namateana paki nau pae tea waina e p̃ia, naga namarinaleosaana ega vei tea mariana ega sa p̃arua liu pae natip̃agoroana. 14Nalakena tu atae naga nawotaeana e pei tea ni naatana, ma kinau a pei tea ni nap̃okasi, tea soriana paki etano ni namarinaleosaana. 15Nalakena tea waina a maria ada atae a mau: nalakena tea waina a masauna naga aga mari a, tea wanogoe a da mari a mau; ma tea waina a pilosi a, tea wanogoe a mari a. 16Ma a pe mari tea waina a da masauna naga aga mari a mau, a pe noa sikoti nawotaeana naga e p̃ia. 17Nalakena e dapala nogoe e da moro pei kinau mau waina a mari a, ma e pei namarinaleosaana waina e doko au doko. 18Nalakena a atae naga te navatuna wia e da doko au mau, tea wanogoe e pei, e da doko nap̃okasigu mau: nalakena namasauana e sikoti au doko, ma namari‐tea‐wia‐ana e da doko mau. 19Nalakena tea wia waina a masauna naga aga mari a, a da mari a mau: ma tea sa waina a da masauna naga aga mari a mau, tea wanogoe a mari a. 20Ma a pe mari tea waina a da masauna naga aga mari a mau, e da moro pei kinau mau waina a mari a, ma e pei namarinaleosaana waina e doko au doko. 21Nalakena tea wanogoe a pap̃ai nawotaeana waia, naga ragi waina a masauna naga aga mari tea wia, tea sa e sikoti au doko. 22Nalakena a maro nawotaeana ki Sup̃e pae naatam̃oli ni nap̃alaugu; 23ma a punusi nawotaeana p̃ota sikai e doko naleo kakagu maga, waina e do mari navakalo paki nawotaeana ni namidodoana aginau, po do piragi lua pavakoto au paki etano ni nawotaeana ni namarinaleosaana waina e doko naleo kakagu maga. 24Kinau naatam̃oli rogo kite sa O! Sei ega wo pua lua au m̃elu dua ki nap̃atoko ni namateana waia? 25A pasadodom̃ata ki Sup̃e pae Yesu Kristo Nawota anigida. Nalakena tea wanogoe kinau a magi nawotaeana ki Sup̃e suasua ki namidodoana aginau; ma a magi nawotaeana ni namarinaleosaana suasua ki nap̃okasigu.

Currently Selected:

PAKI TEA NI ROMA 7: NTB

Highlight

Copy