PAKI TEA NI ROMA 9
9
1A noa nalomauana doko Kristo, a da sorosoro mau, natum̃agu‐atae‐auana e do maginau noa sokisoki doko Naatana Tapu, 2naga a peani nasusueana warua go navitinuana pitip̃atip̃a nap̃op̃ogu. 3Nalakena a mari atae masauna naga kinau aga magi taigu maga pei anathema m̃elu dua ki Kristo, namatarau aginau maga pae nap̃okasi: 4waina eu pei naworawora ni Israel; waina navakasereana e pei adeada, go nasamasamaana, go navasasokiana maga, go navituakiana ni nawotaeana, go nalotuana, go nasaiana maga; 5waina tamagida maga eu pei adeada, go waina Kristo e m̃elu ara nalo ni nap̃okasina, waina e dap̃au tea maga mamau puti, Sup̃e tea vasap̃iakiana pa pa ega tu mau du. Amen. 6Ma e da dapala navasaana ki Sup̃e e pe rowo puoli mau. Nalakena tea maga waina eu pei tea ni Israel eu da mamau puti pei Israel mau: 7go nalakena eu pei naworawora ni Abraham eu da mamau puti pei natuna maga mau: ma, Naworaworam̃a euga vei tea sosoana pae Isaak. 8Tea wanogoe e pei, nap̃okasi natuna maga nara eu da pei Sup̃e natuna maga mau; ma nasaiana natuna maga eu pei tea midoakiana naga eu pei naworana sikai. 9Nalakena tea waia e pei navasaana sikai ni nasaiana, Ragi wanogoe aga wo umai asa, go Sarah ega wo dape natuna naanoai sikai. 10Go tea wanogoe e da sikina mau; ma Rebekah ma waina e diena pae sikai, tamagida 11Isaak nalakena ragi waina pipia maga ero ko da pakilina mau, go ero ko da mari te navatuna wia kite sa mau, naga namidoakisokiana ki Sup̃e pae namatadoaana ega lawodu, e da pei tea ni nawosiana maga mau, ma e pei tea ni tea waina e soso, e pei tea noaana paki nia, 12e naga, Takalapa ega wo magi takariki suasua. 13Dapala waina e pei tea midiriana, e naga, A dodomi Yakob, ma a pilosi Esau.
14Nalakena tea wanogoe tuga noa nasava? Namarinaleotageleana e sikoti Sup̃e kite? 15Ega ta dapala nogoe mau. Nalakena e noa ki Moses, e naga, Aga wo saup̃ia ki tea waina aga saup̃ia ki nia, go aga wo maritadodomi tea waina aga maritadodomi a. 16Nalakena tea wanogoe e da pei tea ki tea waina e masauna mau, go e da pei tea ki tea waina e sava mau, ma e pei tea ki Sup̃e waina e saup̃ia. 17Nalakena navasaana midiriana e noa ki Faraoh, e naga, A mari ko ku lawodu nalakena tea waia, naga aga viseiki nakasuaana aginau ako, go naga nagisagu ega vei tea rogorogokiana usuraki maramana mamau. 18Nalakena tea wanogoe e saup̃ia ki tea waina e masauna, go tea waina e masauna e mari a e kasua.
19Nalakena tea wanogoe p̃a wo noa ki nau, Ma ekasana e pasa dip̃a? Nalakena sei e lawodugoro namasauana aneana? 20Ioro, naatam̃oli O, ma nigo ku pei sei waina ku pasa dara dip̃a Sup̃e? Tea maridawonakiana ega wo noa ki tea maridawonaki, Ekasana ku mari au dapala waia, kite? 21Kite tea mari lasa ni natano e da peani naveinawotaana dap̃au naruku, naga ega mari tea ni taua sikai maau seara kakana ega vei lasa sikai paki nadodomadaganiana, go tea p̃ota sikai paki nadododaoana, kite? 22Ma Sup̃e e pe masauna naga ega viseiki namaetoana aneana, po mari nakasuaana aneana ega vei tea ataeana, go e pe tapetape pilake naveimaritasokiana warua lasa maga ni namaetoana waina eu pei tea maridawonakiana paki namarisakiana: 23go naga ega mari ega vei tea ataeana nasogolapaana ni nasamasamaana aneana nalo ni lasa maga ni nasaup̃iaana, waina e pea mari m̃ata ki da paki nasamasamaana, 24nigida, waina e soso gida, tu da pei tea ni Yudea maga sikida mau, ma tu pei tea ni nalauna p̃ota maga. 25Dapala waina e noa e Hosea, e naga,
Aga wo soso tea maga waina eu da pei narei aginau mau, ki narei aginau:
Go tea waina e da pei tea dodomiana mau, ki tea dodomiana.
26Go ega wo doko, naga tokora waina e pei tea noaana paki da asa, Nimu ku da pei narei aginau mau,
Tokora wanogoe euga wo pei tea sosoana asa ki Sup̃e mauri natuna maga.
27Go Isaiah e pioso nalo ni Israel, e naga, Naveveana ni Israel natuna maga e pe tapala naworaone ni natasi, ma e pei namagovai kakada waina euga wo pei tea mautipauriana: 28nalakena Yehovah ega wo mari navasaana aneana maramana, ega wo mari sua e po mari a ega vuru. 29Go, dapala waina Isaiah e pea noa e, e naga,
Yehovah ni Taua maga e pe ta manigida doropusi namagovai kiki sikai mau,
Tu pe tapala Sodom, go tu pe vei tea mariana tu pe tapala Comorrah.
30Nalakena tea wanogoe tuga noa nasava? Naga tea ni nalauna p̃ota maga, waina eu da sava dausi namarinaleoleanaana mau, eu puasoki namarinaeloleanaana, namarinaleoleanaana waina e pei tea ni nasaralomauana: 31ma Israel waina eu do sava dausi nawotaeana ni namarinaleoleanaana, eu do pa parati ki nawotaeana wanogoe mau. Nalakena nasava? 32Nalakena eu da laaga asa pae nasaralomauana mau, ma dapala e pe vei tea ni nawosiana maga. Eu dapilagona vatu ni natapilagonaana; 33dapala waina e pei tea midiriana, e naga,
Kuga leo, a doropusi doko Sion vatu sikai ni natapilagonaana, go vatu laketoko sikai ni natapilagonadowoana:
Go tea waina e saralomau asa ega wo da pei tea mariana ega maliere mau.
Currently Selected:
PAKI TEA NI ROMA 9: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
