PAKI TEA E FILIPPI 2
2
1Nalakena tea wanogoe te navasaparatikiana e pe toko Kristo, te navasapakavakaleana ni nadodomiana, te nasaisaipeaniana ni Naatana, te namaritadodomiana go nap̃op̃ododomiana, 2kuga vakavuro nalaelaeaana aginau, naga kuga midoa ki tea sikai maau, doko do peani nadodomiana sikai maau, po pei tea p̃op̃o sikai maau, doko do midoaki tea sikai maau; 3doko da midoaki te navatuna pae namariputuakiana kite pae nasamasamaana p̃alo mau, ma ki nap̃op̃ovakitanoana kuga tum̃amu midoaki mu naga ku dum̃amu p̃ia liu mu; 4doko da mamau puti sikasikai leopunusi naleo animu maga mau, ma kuga mamau puti sikasikai leopunusi naleo maga ki tea p̃ota maga. 5Kuga midoaki tea waia ega toko mu, waina e doko Kristo Yesu: 6waina e doko namaridawonakiana ni Sup̃e, po da midoaki nia mau naga navataka‐ni‐Sup̃e‐ana e pei tea waina ega vei tea vuatiana, ma e dum̃ana mari a e p̃alo, 7po dape namaridawonakiana ni tea suasua sikai, po pei tea mariana e doko natakiusiana ni naatam̃oli maga; 8go e pei tea vap̃aiana e dapala naatam̃oli sikai ki naleodawonakiana, po dum̃ana doro e pakitano, po pei tea rogo paratiki pa pa paki namateana, namateana ni nakau valadagoto. 9Go nalakena tea wanogoe Sup̃e e mari a e pakilagi p̃arua liu, po dua e nagisa waina e dap̃au sara nagisa; 10naga sara nap̃atua euga titip̃atua doko nagisa ni Yesu, ni tea maga ni nakoroatelagi go ni tea maga ni maramana go ni tea maga ni etano ni maramana, 11go naga sara namena euga noasai naga Yesu Kristo e pei Nawota paki nasamasamaana ki Sup̃e Tamana.
12Nalakena tea wanogoe, tea dodomiana maga, dakiusi waina ku dogo paratiki sara ragi, ega ta dapala ragi waina a sikoti mu asa sikina mau, ma ega warua liu sa ragi waia waina a puoli ki mu asa, kuga to p̃osiwosi ki namautipauri‐mu‐ana pilake namatakuana go narururuana; 13nalakena e pei Sup̃e waina e do p̃osiwosi doko mu naga kuga masauna go naga kuga wosiwosi, nalakena namidoakim̃atakiana aneana. 14Kuga mari naleo maga mamau puti masale ki natauruuruana go navululuana; 15naga kuga ta pei tea vasadip̃aana mau, go naga kuga ta pei tea mari sa ki mau, ma naga kuga vei Sup̃e natuna maga waina tea sa e dika ara m̃aleoputo ni tagona tagele sikai waina eu do mari lolop̃ota, waina ku pei tea vunusiana m̃aleoputo kakada dapala nasulu maga doko maramana, 16doko do dogorogo ki navasaana ni namauriana; naga aga veani tea waina aga vakavakae asa raki naaleatia ki Kristo, naga a da sava p̃alo mau go naga a da p̃osiwosi‐mawosa p̃alo mau. 17Io, go a pe vei tea takiana sokari naviriana go nasuasuaana ni nasaralomauana animu, a pe laelaea, po laelaea sikoti puti mu: 18go nalakena tea sikai maau wanogoe nimu ma kuga laelaea, po laelaea sikoti au.
19Ma a leogoro doko Nawota Yesu naga aga tip̃aki lua Timotheo ega valoti punusi mu m̃araverave, naga kinau ma aga marasike, ragi waina aga atae naleo maga nalo kakamu. 20Nalakena a da peani te naata p̃ota sikai mau waina nap̃op̃ona e pataka ni nap̃op̃ogu, waina ega wo midoaki paratiki lomau ki naleo maga nalo kakamu. 21Nalakena eu mamau puti laaga naleo adeada maga, eu da laaga naleo maga ki Yesu Kristo mau. 22Ma ku atae namaridogo‐e‐ana, naga, dapala waina naatam̃oli natuna sikai e magi tamana suasua, dapala nogoe nae e suasua sikoti au raki narogorogoana wia. 23Dapala nogoe nae wanogoe a leogoro naga aga tip̃aki lua e paloti ragi waia, ragi waina aga vunusi sua naleo maga nalo kakagu: 24ma a pavatu doko Nawota naga kinau ma aga valoti m̃araverave. 25Ma a midoa ki nia naga e one au one naga aga tip̃aki lua Epafrodito paloti punusi mu, taigu go tea wosiwosi sikoti au, go tea mari navakalo sikoti au, ma tea tautauana animu go tea suasua paki natikaana aginau; 26nalakena e do dodomi p̃arua ki mu maga mamau puti, po dogo kite sa nalakena ku dogo naga e sasana: 27nalakena, e sasana lomau m̃aladigi ki namateana: ma Sup̃e e dodomi a; go e da dodomi a sikina mau, ma e dodomi au, naga aga ta peani nasusueana sokari nasusueana mau. 28Nalakena tea wanogoe a m̃arekareka p̃arua dip̃aki lua e paloti, naga, ragi waina kuga moro punusi a, kuga laelaea, go naga kinau aga ta susue p̃arua mau. 29Nalakena tea wanogoe kuga viragi soki a doko Nawota pilake sara nalaelaeaana; go kuga midoaki tea tapala nogoe maga naga euga vei tea dodomadaganiana: 30nalakena e umai paki m̃aladigi ki namateana nalakena nawosiana ki Kristo, e da dodoparatiki namauriana aneana mau, naga ega vakavuro tea waina e puoli ki nasuasuaana animu paki nau.
Currently Selected:
PAKI TEA E FILIPPI 2: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
