PAKI TEA E FILIPPI 1
1
1Paulo go Timotheo, tea suasua maga ki Kristo Yesu, aro midiri paki tea tautau maga mamau puti doko Kristo Yesu waina eu doko Filippi, nara ma tea leo paratiki maga go diakona maga: 2nasaup̃iaana ega vei animu go natam̃ateana m̃elu Sup̃e Tamagida go Nawota Yesu Kristo.
3A pasadodom̃ata ki Sup̃e aginau doko namidoaki‐mu‐ana mamau aginau, 4sara ragi doko sara navavaraniana aginau manimu mamau puti a do mari navavaraniana aginau pilake nalaelaeaana, 5nalakena nasaisaipeaniana animu paki narogorogoana wia pae naaleatia vea pa pa paki ragi waia; 6a saralomau kasua ki tea waia, naga tea waina e atulake mari nawosiana wia doko mu ega wo mari sua e pa pa paki naaleatia ki Yesu Kristo: 7dakiusi waina e leana ki nau naga aga manimu mamau puti midoaki tea wanogoe, nalakena a pilake mu doko nap̃op̃ogu, go ku mamau puti pei tea saisaipeani sikoti au nasaup̃iaana, doko natali solisoli aginau maga, go doko navasakorokoroana go nalawosokiana ni narogorogoana wia. 8Nalakena Sup̃e e pei tea noa sokisoki aginau, dapala waina a do dodomi p̃arua ki mu maga mamau puti doko namaritadodomiana ki Kristo Yesu. 9Go a do dapasavasa tea waia, naga nadodomiana animu ega to disu po do p̃arua doko naataem̃atakiana go sara namidoakiataeana; 10naga kuga maridogo naleo maga waina eu p̃ia lua; naga kuga vei lomau go tea ta dapilagona mau pa pa paki naaleatia ki Kristo; 11doko pei tea vakavuroana ki nawa ni namarinaleoleanaana, waina e pae Yesu Kristo paki nasamasamaana ki Sup̃e go nasamasamani‐a‐ana.
12Ma a masauna naga nimu kuga atae, tai maga, naga naleo maga waina eu pakilina ki nau eu rumai raki narisuaki‐p̃arua‐kiana ni narogorogoana wia; 13dapala waina natali solisoli aginau maga eu pei tea mariana eu doko lina doko Kristo usuraki pretorio mamau, go ki tea p̃ota maga mamau puti. 14Go waina taigida maga tea laapa kakada doko Nawota eu pavatu pae natali solisoli aginau maga, po do piviari p̃arua naga euga vasa navasaana ki Sup̃e po da mataku au. 15Te naata seara eu dogorogo ki Kristo nalakena naroitoiana go navileana lomau; go te naata seara nalakena namidoakim̃atakiana; 16Te seara eu mari a m̃elu nadodomiana, doko atae naga a pei tea lawokiana raki navasakorokoroana ni narogorogoana wia; 17ma te seara eu dogorogo ki Kristo m̃elu namariputuakiana, eu da pei lomau asa mau, eu midoa ki nia naga euga sike nariesokiana ega sokari natali solisoli aginau maga. 18Nalakena tea wanogoe nasava? Tea waia naga pae sara vatuna, e pe vae nakokorokiana kite e pe vae nalomauana, Kristo e pei tea rogorogokiana; go a laelaea tea wanogoe, ioro, go aga wo laelaea. 19Nalakena a atae naga tea wanogoe ega wo maginau pei namautipauriana, pae navavaraniana animu go navituakiana ni Naata ni Yesu Kristo, 20pae naleogoroana go navavatuana aginau, naga aga ta pei tea mariana aga maliere nalo ni te navatuna mau, ma naga doko sara naviviariana, dapala sara ragi, go ragi waia Kristo ega wo pei tea samasamaniana nalo ni nap̃atokogu, e pe vae namauriana kite e pe vae namateana. 21Nalakena nalo kakagu naga aga mauri e pei Kristo, go naga aga mate e pei nataluaana. 22Ma naga aga mauri doko nap̃okasi, tea wanogoe e pe maginau pei nawa ni nawosiana aginau, go tea waina aga matadoa e a pe ta atae a mau. 23Ma a doko nap̃alaasa ni tea rua, doko do peani namasauana ni nam̃eluana pa sikoti Kristo. 24Nalakena tea wanogoe e p̃ia p̃arua liu: ma naga aga toko nap̃okasi doko e pei tea waina e one au one p̃arua nalakena nimu. 25Go nalakena a saralomau kasua ki tea wanogoe, a atae naga aga wo doko, go naga aga wo doko sikoti puti mu doko, raki narisuaki‐mu‐ana, go nalaelaeaana ni nasaralomauana; 26naga tea vakavakaeana animu ega warua liu doko Kristo Yesu doko au pae na‐moro‐doko‐sikoti‐mu‐ana aginau. 27Tea sikai maau waia kuga to mari ega tapala waina e pataka ni narogorogoana wia ki Kristo: naga, a pe valoti punusi mu kite a pe vuoli, aga rogo naleo maga nalo kakamu, naga ku do lawodu doko Naatana sikai maau, doko do magi nasaralomauana ni narogorogoana wia maripilele ki naatamu sikai maau; 28po da pei tea mariana ku mataku nalo ni te navatuna mau pae tea kokona maga: waina e madeada pei naviseikiana sikai ni namate‐puoli‐ana, ma ni namautipauri‐mu‐ana, go tea wanogoe e m̃elu Sup̃e: 29nalakena e magi Kristo pei tea vituakiana paki mu, naga kuga ta saralomau asa sikina mau, ma naga kuga maneana sua narogokitesaana: 30ku peani namaripileleana sikai maau waina ku punusi a e doko au, go waina ku dogo e ragi waia naga e doko au.
Currently Selected:
PAKI TEA E FILIPPI 1: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
