MATAIO 11
11
1Go e pakilina, ragi waina Yesu e dip̃aki sua tea vasapiseikiana aneana rualima sikai tamate dua, naga e m̃elu dua ki tokora wanogoe pano naga ega vasapiseiki po dogorogo natokoana adeada maga.
2Go ragi waina Yoane, waina e doko ekopu ni nasum̃a ni nasolisoliana, e dogo nawosiana maga ki Kristo, e dip̃aki lua pae tea vasapiseikiana aneana maga, po noa ki nia, 3e naga, Nigo ku pei tea waina ega wo umai, kite auga leogoro tea p̃ota sikai? 4Go Yesu e pasadara po noa ki da, e naga, Kuga vano po dogorogo paki Yoane ki tea maga waina ku dogo ra po punusi ra: 5tea kesa maga eu moro leosai, go tea vei pito maga eu surata, go tea vei lepero maga eu pei tea mariana eu dautau, go tea p̃aro maga eu dorogo, go tea mate maga eu pei tea sikeana eu duleana, go tea tika maga narogorogoana wia e pei tea rogorogokiana paki da. 6Go naata waina e pe wo da dapilagona nalo kakagu mau e maropa. 7Go ragi waina nara eu do pano, Yesu e pae asa noa ki taua maga ni naatam̃oli nalo ni Yoane, e naga, Ku dave paki masop̃alo pano naga kuga leopunusi nasava? Napati nau sikai waina e pei tea tuleakiana ki nalagi kite? 8Ma ku dave pano naga kuga vunusi nasava? Naatam̃oli sikai waina e suni sugoro m̃om̃oa maga kite? Kuga leo, tea maga waina eu suni sugoro m̃om̃oa maga eu doko nasum̃a ki nawota maga. 9Ma ekasana ku dave pano? Naga kuga vunusi profeta sikai kite? Ioro, a noa ki mu asa, go tea waina e p̃arua liu profeta sikai. 10Nae e pei tea waina e pei tea midiriana nalo kakana, e naga,
P̃a leo, kinau a dip̃aki lua tea tautauana aginau e pea ki naraem̃a,
Waina ega wo marim̃ata ki napua anigo ega vea ki‐go.
11Lomau a noa ki mu, naga, Tea maga waina eu pei tea visolakiana ki nagoroi maga, sikai kakada e da pakilina mau waina e p̃arua liu Yoane tea Bapetiso: ma tea waina e kiki namarakiana ni nakoroatelagi e p̃arua liu sa. 12Go pae naaleatia maga ki Yoane tea Bapetiso pa pa paki ragi waia namarakiana ni nakoroatelagi e pei tea marikasuakiana, go tea maga waina eu marikasua eu dape pavakoto asa. 13Nalakena profeta maga mamau puti go nawotaeana eu peanoasai pa pa paki Yoane. 14Go ku pe suasua naga kuga tape a nae e pei Eliyah waina e one asa one naga ega umai. 15Tea waina e pilake nadaliga naga ega rogo, ega rogo. 16Ma aga noa naga tagona waia eu dakiusi nasava? Eu dakiusi piakirikiri maga waina eu do natano malo ni navakokotoana maga, waina eu pioso paki tada maga, po naga, 17Au manimu sui lokore go ku da sale mau; au lalagaarova, go ku da dapagi narum̃amu mau. 18Nalakena Yoane e umai e da ganikani mau go e da munu mau, go eu naga, E peani dimon sikai; 19Naatamoli Natuna e umai e ganikani po munu, go eu naga, Kuga leo, naatam̃oli tuatua liu, po do munu waine, tea dodomi tea tape nasautoga maga go tea mari naleo sa maga! Go namanumatuaana e pei tea marileanakiana pae nawosiana aneana maga.
20Ragi wanogoe e pae asa pasapinoa ki natokoana maga waina nawosiana kasua aneana maga tea laapa liu kakada eu pei tea mariana ara, nalakena eu da midoakidoa mau. 21Ai kigo, Korasin! Ai kigo, Bethsaida! Nalakena nawosiana kasua maga waina eu pei tea mariana mu, eu pe vei tea mariana Tair go Sidon, ero pe midoakidoa tuai po suni nakulukulu ni sak po doko natanoapu. 22Ma a noa ki mu naga navaratiana ni Tair go Sidon naaleatia ni navasap̃otaeana ega wo p̃arua, ma navaratiana animu ega wo p̃arua liu sa. 23Go nigo, Kapernaum, p̃a wo pei tea tapeana sake paki nakoroatelagi kite? P̃a wo siwo paki Hades: nalakena nawosiana kasua maga waina eu pei tea mariana ako eu pe vei tea mariana Sodom, e pe toko pa pa paki naaleatia waia. 24Ma a noa ki mu, naga navaratiana ni navanua ni Sodom naaleatia ni navasap̃otaeana ega wo p̃arua, ma navaratiana anigo ega wo p̃arua liu sa.
25Ragi wanogoe Yesu e pasadara po naga, A pasadodom̃ata ki‐go, Mama O, Talakea ni nakoroatelagi go maramana, nalakena ku dasuru ki tea manumatua maga go ki tea midoaki atae maga naleo maga wanogoe, po magi pipia maga maripakasa ki da: 26ioro, Mama, nalakena ku midoaki m̃ata ki nia naga ega tapala nogoe naraem̃a. 27Naleo maga mamau puti eu pei tea vituakiana paki nau pae Tamagu: go te naata sikai e da atae m̃ata ki Natuna mau, ma Tamagu e sikina atae m̃ata ki nia; go te naata sikai e da atae m̃ata ki Tamagu mau, ma Natuna sikina e atae m̃ata ki nia, go naata waina Natuna e pe suasua naga ega maneana maripakasa ki nia. 28Kuga umai punusi au, tea maga mamau puti waina ku do p̃osiwosi‐mawosa po do dapetape tea madaga, go aga wo dua mu namaromaroana. 29Kuga tape dakati nakau ni nanoa aginau ega toko mu, go kuga ataedogo kiagu; nalakena a matemate go nap̃op̃ogu e pakitano: go kuga wo magi naatamu pap̃ai namaromaroana. 30Nalakena nakau ni nanoa aginau e manainai, go natapetapeana aginau e masalesale.
Currently Selected:
MATAIO 11: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
