MATAIO 10
10
1Go e soso tea vasapiseikiana aneana rualima sikai tamate dua eu rumai punusi a, go e dua ra naveinawotaana dap̃au naatana loa maga, naga euga mari ra euga tave pano, go naga euga mari lua sara nasasanaana go sara namanainaiana.
2Go nagisa ni apostolo rualima sikai tamate dua eu pei tea maga waia: tea vea Simon, waina e pei tea sosoana ki Petero, go taina Anderea; Yakobo natu ni Sebedaio, go taina Yoane; 3Filipo, go Bartolomaio; Toma, go Mataio tea tape nasautoga; 4Yakobo natu ni Alefaio, go Lebbaio; Simon Kananaio, go Yuda Iskariote, nae waina e pitua ki nia. 5Tea rualima sikai tamate dua wanogoe Yesu e dip̃a ki lua ra, po dip̃a ki da, e naga.
6Kuga ta pae te napua sikai ki tea ni nalauna p̃ota maga mau, go kuga ta sili paki te natokoana sikai ki naka ni Samaria mau: ma kuga vano punusi shiip sasap̃o ni nasum̃a ni Israel. 7Go ragi waina kuga to pano, kuga to dogorogo, po naga, Namarakiana ni nakoroatelagi e pei m̃aladigi. 8Kuga mari pauri tea sasana maga, kuga mari tea mate maga euga tuleana, kuga mari tea vei lepero maga euga tautau, kuga mari dimon maga euga tave pano: ku dape m̃oli, kuga vitua m̃oli. 9Kuga ta dape kold seara, kite silver seara, kite brass seara paki nap̃alau ni tasoki animu maga mau; 10kuga ta dape nala ni navinaga raki napua mau, kite sugoro dua mau, kite nam̃elevasiana maga mau, kite tiko sikai mau: nalakena tea wosiwosi e p̃ia ki navinaga aneana. 11Go natokoana warua kite natokoana kiki waina ku pe wo sili paki asa, kuga vusuusu ki parati ki sei e doko asa waina e p̃ia; go kuga toko tokora wanogoe doko pa pa kuga vano. 12Go ragi waina kuga vaki ekopu ni nasum̃a, kuga vasadodomi a. 13Go nasum̃a e pe wia, natam̃ateana animu ega umai paki asa: ma e pe ta p̃ia mau, natam̃ateana animu ega liliu paki mu. 14Go naata waina e pe ta piragi mu mau, go waina e pe ta dogo navasaana animu mau, ragi waina kuga tave m̃elu dua ki nasum̃a wanogoe kite natokoana wanogoe, kuga meseura ki nam̃otam̃ota ni nam̃elemu. 15Lomau a noa ki mu, naga Navaratiana ni navanua ni Sodom go ni Comorrah naaleatia ni navasap̃otaeana ega wo p̃arua, ma navaratiana ni natokoana wanogoe ega wo p̃arua liu sa.
16Kuga leo, kinau a dip̃aki lua mu ku dapala shiip m̃aleoputo ni wulf maga: nalakena tea wanogoe kuga vei manumatua dapala m̃aata maga, go tea ta marisaki mau dapala tokopea maga. 17Ma kuga matamatua ki naatam̃oli: nalakena euga wo pitua ki mu paki nasaisaiana ki tea vusum̃aki, go euga wo parati mu ekopu ni nasum̃a ni nasaisaiana adeada maga; 18go kuga wo pei tea viragiluaana pano punusi tea maraki maga go nawota maga nalakena kinau, naga kuga vei nanoasokisokiana sikai paki da go paki tea ni nalauna p̃ota maga. 19Ma ragi waina euga wo pitua ki mu, kuga ta midoaki parati ki dapala waina kuga wo pasa kite ki tea waina kuga wo noa e: nalakena tea waina kuga wo noa e: nalakena tea waina kuga wo noa e ega wo pei tea vituakiana paki mu aura wanogoe. 20Nalakena e da pei nimu mau waina ku pasa, ma e pei Naata ni Tamamu waina e pasa nap̃alaumu. 21Go taina ega wo pitua ki taina paki namateana, go tamana ega wo pitua ki natuna; go natuda maga euga wo duleana dip̃a tamada go p̃ilada maga, po mari ra euga vei tea maripunueana. 22Go kuga wo pei tea vilosiana pae naatam̃oli maga mamau puti nalakena nagisagu: ma tea waina e soki du pa pa paki namatap̃agona edaku, nae ega wo pei tea mautipauriana. 23Ma ragi waina euga kopalele mu natokoana waia, kuga sava pano paki natokoana p̃ota sikai: nalakena lomau a noa ki mu, naga Kuga wo da papule puti natokoana maga ki Israel mau, pa pa naatam̃oli Natuna ega wo umai.
24Tea vasapiseikiana sikai e da dap̃au tea vasapiseiki mau, go tea suasua sikai e da dap̃au nawota aneana mau. 25E pei tea lapa agi tea vasapiseikiana naga ega tapala tea vasapisei ki nia, go agi tea suasua naga ega tapala nawota aneana. Eu pe soso talakea ni nasum̃a ki Beelsebub eu pe wo da soso p̃arua ki tea maga ni nasum̃a aneana ki nia kite? 26Nalakena tea wanogoe kuga ta matau ki da mau: nalakena te navatuna sikai e da pei tea kovagoroana mau, waina ega wo da pei tea maripakasakiana mau, go te navatuna sikai e da pei tea surukiana mau, waina ega wo da pei tea ataeana mau. 27Tea waina a noa ki mu asa namaligo, kuga vasa asa namarama: go tea waina ku dogo e paki nadaligamu, kuga rogorogo ki nia nam̃asua ni nasum̃a maga. 28Go kuga ta matau ki tea maga waina eu mari punue nap̃atoko ni naatam̃oli, ma eu mari sa mari punue naatada: ma kuga matau ki p̃arua ki tea waina e mariatae mari punue naatada go nap̃atokoda p̃okasi. 29Sparro dua ero da do pei tea soriana raki farthig sikai kite? Go sikai kakada ega wo da dowo paki natano masale ki Tamamu mau: 30ma napati maga ni nalolu ni nap̃aumu ma eu mamau puti pei tea veveana. 31Nalakena tea wanogoe kuga ta mataku mau; nimu ku p̃ia liu sparro laapa. 32Nalakena tea wanogoe sara naata waina euga wo noasai au narae ni naatam̃oli, kinau ma aga wo noasai naata wanogoe narae ni Tamagu waina e doko nakoroatelagi. 33Ma naata waina e pe wo pasagoro au narae ni naatam̃oli, kinau ma aga wo pasagoro naata wanogoe narae ni Tamagu waina e doko nakoroatelagi.
34Kuga ta midoaki nia mau naga a umai naga aga dip̃aki natam̃ateana paki maramana: a da umai naga aga dip̃aki natam̃ateana mau, ma a umai naga aga dip̃aki lova sikai. 35Nalakena a umai naga aga mari tamatamada eroga vile, go tamap̃ilada, go tamatuada: 36go tea kokona ki naatam̃oli sikai euga wo pei tea maga ni nasum̃a aneana. 37Tea waina e dodomi p̃arua ki tamana kite p̃ilana ma e dodomi kiki ki nau, e da p̃ia ki nau mau; go tea waina e dodomi p̃arua ki natuna naanoai kite natuna nagoroi ma e dodomi kiki ki nau, e da p̃ia ki nau mau. 38Go naata waina e da dape tea valadagoto aneana mau po da dausi au mau, e da p̃ia ki nau mau. 39Tea waina e pap̃ai namauriana aneana ega wo dape puoli ki nia; go tea waina e dape puoli ki namauriana aneana nalakena kinau ega wo pap̃ai a.
40Tea waina e piragi mu, e piragi au, go tea waina e piragi au e piragi tea waina e dip̃aki lua au umai. 41Tea waina e piragi profeta sikai nalakena e pei profeta sikai ega wo dape namoriana ki profeta sikai; go tea waina e piragi tea leana sikai nalakena e pei tea leana sikai ega wo dape namoriana ki tea leana sikai. 42Go naata waina e pe wo dua tea kirikiri maga waia sikai lasa ni noai maladi sikai e pe sikina naga ega munugi a, nalakena e pei tea vasapiseikiana sikai, lomau a noa ki mu, naga ega wo da dape puoli ki namoriana aneana mau.
Currently Selected:
MATAIO 10: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
