MATAIO 12
12
1Ragi wanogoe Yesu e surata duaduru vanua maga ni korn naaleatia ni sabbath; go tea vasapiseikiana aneana maga eu pitolo, po pae asa lei m̃okai maga ni korn, po ganikani. 2Ma Farisi maga, ragi waina eu punusi a, eu noa ki nia, eu naga, P̃a leo, tea vasapiseikiana anigo maga eu mari tea waina e da pae nawotaeana mau naga euga mari a sabbath. 3Ma e noa ki da, e naga, Ku da peve tea waina David e mari a, ragi waina e pitolo, go tea maga waina eu sikoti a doko; 4dapala waina e paki roara ni nasum̃a ki Sup̃e, po gani bred tokorae, waina e da pae nawotaeana mau naga nae ega kani a, kite naga tea maga waina eu sikoti a doko euga kani a, ma e pae nawotaeana naga tea viri maga euga sikida gani a? 5Kite ku da peve tusi ni nawotaeana, naga naaleatia ni sabbath tea viri maga nasum̃a tapu eu mari sabbath e pei tea m̃oli, go eu da pei tap̃aro asa mau. 6Ma a noa ki mu, naga tea waina e p̃arua liu nasum̃a tapu e doko nea. 7Ma ku pe atae tea waia naga e pei nasava, A masau nadodomiana, go a da masau naviriana mau, ku pe ta dip̃akotovi tea maga waina eu da pei tap̃aro mau. 8Nalakena naatam̃oli Natuna e pei nawota ni sabbath.
9Go e m̃elu dua ki tokora wanogoe pano, po paki ekopu ni nasum̃a ni nasaisaiana adeada: 10go kuga leo, naatam̃oli sikai e doko waina nam̃elearuna e lologara. Go eu pusuusu paki nia, eu naga, E pae nawotaeana naga tuga mari pauri naaleatia ni sabbath kite? Naga euga vasadip̃a e. 11Go e noa ki da, e naga, Nimu naatam̃oli sei kakamu ega wo doko, waina ega wo peani shiip sikai, go nae e pe rowo paki m̃orutano sikai naaleatia ni sabbath, e pe wo da puati a, po dapedakatilua e kite? 12Go naatam̃oli sikai e paka visa p̃ia liu shiip sikai? Nalakena tea wanogoe e pae nawotaeana naga tuga mari p̃ia naaleatia ni sabbath. 13Ragi wanogoe e noa ki naatam̃oli wanogoe, e naga, P̃a sai ki nam̃elearum̃a. Go e sai ki nia; go e pei tea mariana e moro p̃ia dakiusi kerua. 14Ma Farisi maga eu dave pano, po seke dip̃a e, dapala waina euga maripunue a asa. 15Ma Yesu e atae a po m̃elu dua ki tokora wanogoe pano: go tea laapa eu dausi a; go e mari pauri puti ra, 16po pasasoki ra naga euga ta mari a ega toko lina mau: 17naga tea waina e pei tea noaana pae profeta Isaiah ega lolomana, e naga,
18Kuga leo, tea suasua aginau waina a matadoa e;
Tea dodomiana aginau waina naatagu e midoakim̃ata ki nia:
Aga wo doro Naatagu ega wo doko asa,
Go ega wo dogorogo ki navasap̃otaeana paki tea ni nalauna p̃ota maga.
19Ega wo da pile mau, go ega wo da pioso kasua mau;
Go te naata sikai ega wo da dogo nadaleona napua maga ni natokoana mau.
20Napati nau sikai waina e pei wola ega wo da p̃ori a mau,
Go wik sikai waina e asua ega wo da sui punue a mau,
Pa pa ega tip̃aki lua navasap̃otaeana paki namarimatuaana.
21Go tea ni nalauna p̃ota maga euga wo leogoro‐pavatu nagisana.
22Ragi wanogoe tea sikai waina pei dimon, waina e kesa go waina e pusa, e pei tea viragiana umai punusi a: go e mari pauri a, dapala waina pusa e pasa po leosai. 23Go taua maga mamau puti ni naatam̃oli maga eu saram̃akoto, po naga, Tea waia e pei natu ni David kite? 24Ma ragi waina Farisi maga eu dogo e, eu naga, Tea waia e da mari dimon maga eu dave pano mau, ma e mari ra eu dave pano pae Beelsebub nawota ki dimon maga. 25Go e atae namidodoana adeada maga po noa ki da, e naga, Sara namarakiana waina eu pei tea tap̃otaeana dum̃ada dip̃a ra eu pei tea mariana eu pei masomaladi; go sara natokoana kite nasum̃a waina eu pei tea tap̃otaeana dum̃ada dip̃a ra, euga wo da du mau: 26go Satan e pe mari Satan e dave pano, e pe vei tea tap̃otaeana dum̃ana dip̃a e; go namarakiana aneana e pe wo du dapale sava? 27Go kinau a pe mari dimon maga eu dave pano pae Beesebub, natumu naanoai maga eu mari ra eu dave pano pae sei? Nalakena tea wanogoe nara euga wo pei tea vasap̃otae mu. 28Ma kinau a pe mari dimon maga eu dave pano pae Naata ni Sup̃e, namarakiana ki Sup̃e e po umai sua pakilina ki mu. 29Kite te naata sikai e mariatae paki ekopu ni nasum̃a ki tea kasua, po dape pavakoto naloriki aneana maga dapale sava? E pe vea soli tea kasua, ragi wanogoe e pe wo dape pavakoto nasum̃a aneana. 30Tea waina e da sikoti au doko mau e mari dip̃a au; go tea waina e da dauaki sikoti au mau e mari e pei daperavera. 31Nalakena tea wanogoe a noa ki mu, naga Sara namarinaleosaana go sara navasasakiana euga wo magi naatam̃oli maga pei tea midoakikorokoroana; ma navasasakiana dip̃a Naatana ega wo da pei tea midoakikorokoroana mau. 32Go te naata sikai e pe noa te navasaana sikai dip̃a naatam̃oli Natuna, e pe wo maneana pei tea midoakikorokoroana; ma te naata sikai e pe vasa dip̃a Naatana Tapu, ega wo da maneana pei tea midoakikorokoroana mau, maramana waia, kite maramana waina ega wo umai. 33Kuga mari nakau ega wia, go nawana ega wia; kite kuga mari nakau ega sa, go nawana ega sa: nalakena nakau e pei tea ataeana ki nawana. 34M̃aata sa natuda maga, ku mariatae pasa tea wia maga dapale sava ragi waina ku sa? Nalakena nawoka ni naatam̃oli e pasa pae tea waina nap̃op̃ona e pura ki nia. 35Naatam̃oli wia e dapelua tea wia maga pae store wia aneana: go naatam̃oli sa e dapelua tea sa maga pae store sa aneana. 36Go a noa ki mu, naga sara navasaana p̃alo waina naatam̃oli maga euga wo pasa ara, euga wo atusi ra naaleatia ni navasap̃otaeana. 37Nalakena ki navasaana anigo maga p̃a wo pei tea marileanakiana, go ki navasaana anigo maga p̃a wo pei tea tip̃akotoviana.
38Ragi wanogoe tea midiri maga go Farisi maga seara kakada eu pasadara e, eu naga, Tea Vasapiseiki, au masauna naga auga vunusi navaivaiana sikai ega m̃elu ako. 39Ma e pasadara po noa ki da, e naga, Tagona sa go maripele eu datago navaivaiana sikai; go te navaivaiana sikai ega wo da pei tea vituakiana paki da mau ma navaivaiana ni profeta Yonah ega sikina: 40nalakena dakiusi waina Yonah e one nap̃ele ni naika warua one naaleatia dolu go nap̃ogiana dolu, dapala nogoe naatam̃oli Natuna ega wo one nap̃alau ni natano one naaleatia dolu go nap̃ogiana dolu. 41Naatam̃oli maga ni Nineveh euga wo duleana navasap̃otaeana sikoti tagona waia, go nara euga wo dip̃akotovi tagona waia: nalakena eu midoakidoa ragi waina eu dogo narogorogoana ki Yonah; go kuga leo, tea waina e p̃arua liu Yonah e doko nea. 42Nawota nagoroi ni sauth ega wo duleana navasap̃otaeana sikoti tagona waia, go nae ega wo dip̃akotovi tagona waia: nalakena e pae namatap̃ago ni maramana umai naga ega rogo namanumatuaana ki Solomon; go kuga leo, tea waina e p̃arua liu Solomon e doko nea. 43Ma naatana loa, ragi waina e dave m̃elu dua ki naatam̃oli pano, e surata duaduru malo garagara maga, e do laaga namaromaroana, po da pap̃ai a mau. 44Ragi wanogoe e naga, Aga wo liliu paki ekopu ni nasum̃a aginau waina a dave asa umai; go ragi waina e umai e punusi a e p̃alo, e pei tea sasaraana, go tea rekeikiana. 45Ragi wanogoe e pano, po piragi lua naatana p̃ota larua eu sikoti a umai waina eu sa liu sa, go eu sili paki asa po doko asa doko: go tea edaku maga ki naatam̃oli wanogoe eu pei tea mariana eu sa liu tea vea aneana maga. Go ega wo dapala nogoe paki tagona sa waia.
46Ragi waina nae e ko do pasa paki taua maga ni naatam̃oli, kuga leo, p̃ilana go taina maga eu lawodu katama, eu laaga naga euga vasa ki nia. 47Go naata sikai e noa ki nia, e naga, P̃a leo, p̃ilam̃a go taim̃a maga eu lawodu katama, eu laaga naga euga vasa ki‐go. 48Ma e pasadara po noa ki tea waina e noa ki nia asa, e naga, Sei e pei p̃ilagu? Go sei eu pei taigu maga? 49Go e sai ki nam̃elearuna paki tea vasapiseikiana aneana maga, po naga, Kuga leo, p̃ilagu go taigu maga! 50Nalakena naata waina e pe wo mari namasauana ki Tamagu waina e doko nakoroatelagi, nae e pei taigu, go goregu, go p̃ilagu.
Currently Selected:
MATAIO 12: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
