KI YAKOBO 4
4
1Navakalo maga eu pae esava umai go namarimariana maga eu pae esava umai waina eu doko m̃aleoputo kakamu? Eu da m̃elu umai pae namasauana sa animu maga waina eu do mari navakalo doko naleo kakamu maga kite? 2Ku do masau p̃arua, go ku da peani mau: ku do mari punue, po do matam̃agura, go ku mari sa pap̃ai: ku do marimari po do mari navakalo; ku da peani mau, nalakena ku da datago mau. 3Ku do datago, go ku da dape mau, nalakena ku do datago sa, naga kuga sori a dua namasauana sa animu maga. 4Tea maripele nagoroi maga, ku da atae naga nadodomi‐maramana‐ana e pei navilosi‐Sup̃e‐ana kite? Nalakena tea wanogoe naata waina e pe masauna naga ega vei tea dodomi maramana e dum̃ana mari a e pei tea vilosi Sup̃e. 5Kite ku midoa ki nia naga navasaana midiriana e noa m̃oli, e naga, Naatana waina e mari a e doko gida doko e do masau p̃arua paki naroitoiana kite? 6Ma e do pitua ki nasaup̃iaana warua liu. Nalakena tea wanogoe e naga, Sup̃e e do dugoro tea leomadaga maga, ma e do dua tea vakitano maga nasaup̃iaana. 7Nalakena tea wanogoe kuga toko etano paki Sup̃e; ma kuga lawodugoro diabolo, go ega wo sava dua ki mu pano. 8Kuga umai paki m̃aladigi ki Sup̃e, go ega wo umai paki m̃aladigi ki mu. Kuga vavano, tea mari naleo sa maga; go kuga mari nap̃op̃omu euga tautau, tea p̃op̃o rua maga. 9Kuga rogo kite sa, po susue, po dagi: namuruana animu ega vei tea roaana paki nasusueana, go nalaelaeaana animu paki naleopakitanoana. 10Kuga tum̃amu doro mu pakitano namata ni Yehovah, go nae ega wo sike mu pakilagi.
11Kuga ta dum̃amu pasapinoa ki mu, tai maga. Tea waina e pasapinoa ki tai sikai, kite waina e pasa p̃otae taina e pasapinoa ki nawotaeana, po pasa p̃otae nawotaeana: ma ku pe vasa p̃otae nawotaeana, ku da pei tea mari nawotaeana mau, ma ku pei tea vasa p̃otae sikai. 12Tea vitua ki nawotaeana go tea vasa p̃otae sikai maau e doko, nae waina e mari atae mautipauri go waina e mari atae mari puoli: ma nigo ku pei sei waina ku pasa p̃otae tea ni m̃aladigi ki‐go?
13Kuga umai ragi waia, waina ku naga, Masoso kite matamai auga wo paki natokoana sikai, po doko asa natau sikai, po pakokoto po sorisori, po dalua: 14ma ku da atae tea ni matamai mau. Namauriana animu e pei nasava? Nalakena ku pei namavu sikai, waina e pakilina ragi kiki, go edaku ki tea wanogoe e puoli. 15Ma e p̃ia naga kuga noa, Yehovah e pe suasua, auga wo mauri, go auga wo mari tea waia go tea wanana. 16Ma ragi waia ku pakavakae navasapakavakaeana animu maga: sara navakavakaeana dapala nogoe e sa. 17Nalakena tea wanogoe naata waina e atae naga ega mari p̃ia, go waina e da mari a mau, e pei tea mari naleo sa asa.
Currently Selected:
KI YAKOBO 4: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
