KI YAKOBO 5
5
1Kuga umai ragi waia, tea vei sogolapa maga, kuga tagi doko do lalagaarova nalakena narogokitesaana animu maga waina eu do umai. 2Nasogolapaana animu maga eu madada, go sugoro animu maga eu pei tea kaniana ki tuluki maga. 3Kold go silver animu ero dum̃ada madani ra; go namadaniana kakada ega wo pei nanoasokisokiana sikai dip̃a mu, go ega wo gani nap̃okasimu dapala nakapu vavaga. Ku daua ki naloriki animu maga dip̃a naaleatia edaku maga. 4Kuga leo, namoriana ki tea wosiwosi maga waina eu dagaukotovi vanua animu maga, waina e pei tea lawogoroana, e do pioso; go nakuapiosoana ki tea maga waina eu dagaukotovi eu sili paki nadaliga ni Yehovah ni taua maga. 5Ku doko namaroana maramana, po ganikani po munu po sori p̃aragoto; ku pagani nap̃op̃omu naaleatia ni namaripunueana. 6Ku dip̃akotovi, ku mari punue tea leana; e da dugoro mu mau.
7Nalakena tea wanogoe kuga vei maritasoki‐parau, tai maga, pa pa paki naumaiana ki Nawota. Kuga leo, tea wosiwosi natano e do leogoro nawa wia ni natano, e pei maritasoki‐parau nalo kakana, pa pa ega tape sua usa vea go tea edaku. 8Nimu ma kuga vei maritasoki‐parau; kuga lawosoki nap̃op̃omu; nalakena naumaiana ki Nawota e pei m̃aladigi. 9Kuga ta dauruuru, tai maga, dum̃amu dip̃a mu mau, naga kuga ta pei tea vasap̃otaeana mau: kuga leo, tea vasa p̃otae e lawodu narae ni namata maga. 10Tai maga, kuga tape profeta maga waina eu pasa doko nagisa ni Yehovah, euga vei naviseikiana sikai ni narogokitesaana go naveimaritasokiparauana. 11Kuga leo, tu soso tea maga waina eu soki ki tea maropa: ku dogo nasokiana ki Yob, go ku punusi tea waina Yehovah e edaku mari a, nalakena Yehovah e pei maritadodomi p̃arua, go e pei p̃op̃ododomi.
12Ma pea ki sara naleo, taigu maga, kuga ta pivisa mau, pae nakoroatelagi mau, kite pae maramana mau kite pae te navivisaana p̃ota mau: ma ioro animu ega vei ioro go ee ega vei ee; naga kuga ta dowo paki etano ki navasasap̃otaeana mau.
13Te naata sikai e dogokitesa m̃aleoputo kakamu kite? Ega tapasavasa. Te naata sikai e marasike kite? Ega lega samasamani. 14Te naata sikai e sasana m̃aleoputo kakamu kite? Ega soso tea matua maga ni ekalesia euga umai punusi a; go euga tapasavasa goro e, ragi waina euga vuvurai ki sua e ki naroro doko nagisa ni Nawota: 15go natapasavasaana ni nasaralomauana ega wo mautipauri tea waina e sasana, go Nawota ega wo sike a ega tuleana; go e pe mari namarinaleosaana maga, euga wo maneana pei tea midoakikorokoroana. 16Nalakena tea wanogoe kuga noa sai dum̃amu paki mu natapiriana animu maga, go kuga tum̃amu manimu dapasavasa, naga kuga vei tea maripauriana. Navavaraniana wosiwosi ki tea leana sikai e marimatua p̃arua. 17Eliyah e pei naatam̃oli sikai waina e sua narogoana maga dakiusi gida, go e dapasavasa ki natapasavasaana naga usa ega ta p̃owo mau; go usa e da p̃owo navanua mau natau dolu go atelagi latesa. 18Go e moro dapasavasa; go nakoroatelagi e pitua ki usa, go navanua e dau ki nawana.
19Taigu maga, te naata sikai m̃aleoputo kakamu e pe vei tea viragisasap̃okiana m̃elu dua ki nalomauana, go te naata sikai e pe vuadoa e; 20ega atae naga tea waina e puadoa tea mari naleo sa sikai m̃elu dua ki nasasap̃oana ni napua aneana, ega wo mautipauri naatana sikai pa dua ki namateana, go ega wo kovagoro taua ni namarinaleosaana maga.
Currently Selected:
KI YAKOBO 5: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
