KI YAKOBO 3
3
1Kuga ta pei tea vasa piseiki laapa mau, taigu maga, ku atae naga tuga wo dape navasap̃otaeana warua liu. 2Nalakena tu mamau puti dapilagona paka laapa. Te naata e pe ta dapilagona nalo ni navasaana mau, nae e pei naatam̃oli wia lua, po mari atae liko maraki nap̃atokona mamau. 3Go tu pe toropusi tea katiana nawoka ni horse maga, naga euga rogo parati ki gida, tu puadoa nap̃atokoda mamau. 4Kuga leo, shipe maga, waina eu p̃arua pa, po pei tea saikiana ki nalagi kasua maga, eu pei tea roaana ki nawose p̃owolau kiki sa, paki tokoro waina namidoakimasauana ki tea wowolau e masauna. 5Dapala nogoe namena e pei naleo kiki, go e pakavakae tea warua maga. Kuga leo, tea warua liu waina nakapu kiki sa e dokoni a! 6Go namena e pei nakapu vavaga sikai, e pei maramana ni namarinaleotageleana: namena waina e doko m̃aleoputo ni naleo kakagida maga, e pei tea waina e do mari nap̃atokogida mamau e loa, po do dokoni tea taliepu ni navakilinaana e soro, po pei tea tokoniana e soro pae p̃okasi. 7Nalakena nalo tuavati visarasara maga go manu visarasara maga, go tea ni natasi visarasara maga, eu do pei tea mariana eu matemate, po pei tea mariana eu matemate sua pae naatam̃oli: 8ma namena te naatam̃oli e da mari atae mari a ega matemate mau; e pei tea sa waina e da matadorogo mau, e pura ki poseni. 9Tu pasa p̃ia ki Sup̃e Tamagida asa; go tu pasa sa ki naatam̃oli asa, waina eu pei tea mariana eu dapala natakiusiana ni Sup̃e; 10navasap̃iakiana go navasasakiana ero m̃elu nawoka sikai maau umai. Taigu maga, e da p̃ia mau naga ega tapala nogoe. 11Namata noai e putaputa ki tea mami go tea kokona m̃elu namata sikai maau kite? 12Napuliva sikai e mari atae, taigu maga, dau ki nawa ni oliva, kite vaine sikai ki nawa ni napuliva kite? Go namata noai e da mari atae pitua ki natasi go noai mami mau.
13Sei e manumatua po midoaki atae m̃aleoputo kakamu? Ega viseiki m̃elu natomariana wia aneana nawosiana aneana maga doko namatemateana ni namanumatuaana. 14Ma ku pe veani naroitoiana kokona go namariputuakiana doko nap̃op̃omu, kuga ta pakavakae po sorosoro dip̃a nalomauana mau. 15Namanumatuaana wanogoe e da pei tea waina e pae elagi siwo umai mau, ma e pei tea ni maramana, tea ni nap̃atoko, tea ni diabolo. 16Nalakena tokora waina naroitoiana go namariputuakiana ero doko asa, tokora wanogoe napariana go sara namariana loa eu doko asa. 17Ma namanumatuaana waina e pae elagi umai e pea dautau, edaku ki tea wanogoe e doko dam̃ate, tea marimatemate, tea vasadieana wia, e pura ki nadodomiana go ki nawa wia maga, tea ta marip̃otawotae mau, tea ta pei nakalep̃o mau. 18Ma nawa ni namarinaleoleanaana e magi tea maga waina eu mari natam̃ateana pei tea sapurakiana doko natam̃ateana.
Currently Selected:
KI YAKOBO 3: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
