KI YAKOBO 2
2
1Taigu maga, kuga ta peani nasaralomauana ki Nawota anigida Yesu Kristo, Nawota ni nasamasamaana, pilake naviragi‐narae‐ana mau. 2Nalakena naatam̃oli sikai waina e sara ki rig ni kold, po suni sugoro maramalaga e pe umai paki ekopu ni nasum̃a ni nasaisaiana animu, go naatam̃oli tika sikai waina e suni sugoro sa nae ma e pe sili paki asa; 3go ku pe leopunusi tea waina e suni sugoro maramalaga, po naga, P̃a tasake doko tokora wia waia, po noa ki tea tika, Nigo p̃a lawodu tokora wanana, kite p̃a to natano etano ki malo vasiana ni nam̃elegu; 4ku da midoakip̃otawotae doko nap̃alaumu, po pei tea vasa p̃otae maga ni namidodoana sa maga kite? 5Kuga rogo, taigu dodomiana maga; Sup̃e e da matadoa tea tika maga nalo ni maramana naga euga vei tea sogolapa doko nasaralomauana, go tea veani namarakiana waina e sai a paki tea maga waina eu dodomi a kite? 6Ma nimu ku dododao tea tika. Tea vei sogolapa maga eu da mari sa ki mu, po dosagi mu paki malo tasake ni navasap̃otaeana kite? 7Nara eu da pasa sa ki nagisa dodomadaganiana waina ku pei tea sosoana asa kite? 8Ma ku pei vakavuro nawotaeana ki Nawota, pae navasaana midiriana, P̃a dodomi tea ni m̃aladigi ki‐go ega tapala waina ku dum̃am̃a dodomi ko, ku mari p̃ia: 9ma ku pe viragi narae, ku p̃osiwosi ki namarinaleosaana, doko pei tea vasap̃iaana pae nawotaeana dapala tea tapiri maga. 10Nalakena naata waina e dogo paratiki nawotaeana mamau, ma e pe tapilagona nalo ni naleo sikai maau, sogi ni tea mamau puti ega wo liko asa. 11Nalakena tea waina e naga P̃a ta mari pele mau, e moro naga, P̃a ta mari punue mau. Go ku pe ta mari pele mau, ma ku pe mari punue, ku pei tea tapiri nawotaeana. 12Kuga to pasa, go kuga to mari ega tapala naatam̃oli maga waina kuga wo pei tea vasap̃otaeana pae nawotaeana ni naveresiana. 13Nalakena navasap̃otaeana e dika nadodomiana paki tea waina e da mari nadodomiana mau: nadodomiana e pakavakae dip̃a navasap̃otaeana.
14E silae nasava, taigu maga, te naata e pe noa naga e peani nasaralomauana, go e da peani nawosiana maga mau? Nasaralomauana wanogoe e mari atae mautipauri a kite? 15Taigida sikai kite goregida sikai e pe m̃alam̃ala, po dika navinaga ni naaleatia, 16go te naata sikai kakamu e pe noa ki da, Koroga vae natam̃ateana pano, koroga vivitinu go koroga kanikani po puka; ma ku pe ta dua ra naleo maga waina eu p̃ia ki nap̃atokoda mau, e pe silae navasa? 17Dapala nogoe nasaralomauana, e pe ta pilake nawosiana maga mau, e dum̃ana pei tea mate doko. 18Ma te naata sikai e pe naga, Nigo ku peani nasaralomauana, go kinau a peani nawosiana maga: p̃a visei ki nau nasaralomauana anigo masale ki nawosiana maga, go kinau aga wo pisei ki‐go nasaralomauana ki nawosiana aginau maga. 19Nigo ku saralomau naga Sup̃e e pei tea sikai maau; ku mari p̃ia. Dimon maga ma eu saralomau, po duruuru. 20Ma ku masauna naga p̃a atae, naatam̃oli p̃alo O, naga nasaralomauana masale ki nawosiana maga e pei tea oro kite? 21Abraham tamagida e da pei tea marileanakiana ki nawosiana maga, ragi waina e pitua ki natuna doko wede ni naviriana kite? 22Ku punusi naga nasaralomauana e do p̃osiwosi sikoti nawosiana aneana maga, go nasaralomauana e pei tea mariana e p̃ia lua ki nawosiana maga; 23go navasaana midiriana e pei tea vakavuroana waina e naga, Ma Abraham e saralomau navasaana ki Sup̃e, go e maneana pei tea midoakiana naga e pei namarinaleoleanaana; go e pei tea sosoana ki Sup̃e tana ri. 24Ku punusi naga naatam̃oli sikai e pei tea marileanakiana ki nawosiana maga, go e da pei ki nasaralomauana sikina mau. 25Go dapala nogoe Rahab nagoroi masausara e da pei tea marileanakiana ki nawosiana maga, ragi waina e piragi soki tea tautauana maga po dip̃aki lua ra pae napua p̃ota sikai kite? 26Nalakena dakiusi waina nap̃atoko masale ki naatana e pei tea mate, dapala nogoe nasaralomauana masale ki nawosiana maga e pei tea mate.
Currently Selected:
KI YAKOBO 2: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
