PAKI HEBERU MAGA 12
12
1Nalakena tea wanogoe nigida ma, waina tu pei tea talivirigoroana ki napopouru warua dapala nogoe ni tea noasokisoki maga, tuga toropusi sara naleo madaga, go namarinaleosaana waina e du dalivirigoro gida, go tuga sava pae nasokiana nasavapileleana waina e pei tea toropusiana kivea ki gida, doko do leopunusi Yesu, 2tea maraki ni nasaralomauana anigida go tea mari sua e, waina nalakena nalaelaeaana waina e pei tea toropusiana kivea ki nia e soki nakau valadagoto, doko midoakip̃alo ki namaliereana kakana, go e po dasake pisari taleva ni matua ni malo tasake ki Sup̃e. 3Nalakena kuga midoakiusiusi tea waina e soki navasadugoroana dapala nogoe pae tea mari naleo sa maga dip̃a ra, naga kuga ta mawosa mau, doko da do dodosua ki naatamu mau. 4Ku ko da lawodugoro pa pa paki nada mau, doko do maripilele dip̃a namarinaleosaana: 5go ku malioki navasaparatikiana waina e pasa ki mu dapala ku pei natuna maga, e naga,
Natugu, p̃a ta midoaki p̃alo ki navaratipiseikiana ki Yehovah mau,
Go p̃a ta dodosua mau ragi waina ku pei tea vasakasuakiana pae asa;
6Nalakena tea waina Yehovah e dodomi a e parati piseiki nia,
Po parati sara natuna waina e piragisoki ra,
7Ku soki raki navaratipiseikiana; Sup̃e e mari paki mu dapala ku pei natuna maga; nalakena seve natuna e doko waina tamana e da parati piseiki nia mau? 8Ma ku pe toko masale ki navaratipiseikiana, waina tea maga mamau puti eu pei tea mariana eu peanip̃otae a, ku pe vei natu ni navanakoana, po da pei natuna maga mau. 9Go tea p̃ota sikai, tu peani sua tamagida maga ni nap̃okasigida tea varati piseiki maga, go tu dodomadagani ra: tuga ta doko etano ega warua liu ki nia paki Tama ni naatana maga, po mauri doko kite? 10Nalakena nara eu parati piseiki gida naaleatia visa maau dapala waina eu midoa ki m̃ata ki nia; ma nae raki namarim̃ataki‐gida‐ana, naga tuga veanip̃otae natautauana aneana. 11Sara navaratipiseikiana ragi waina eu doko eu da pei tea ni nalaelaeaana mau, ma eu pei tea ni nasusueana: ma ragi edaku eu magi tea maga waina eu pei tea mari‐mau‐ana pae ara pitua ki nawa tam̃ate ni namarinaleoleanaana. 12Nalakena tea wanogoe kuga sike nam̃elearumu waina ku doro ra eu dau, go nap̃atuamu waina eu sarumate; 13go kuga magi nam̃elemu mari napua leana maga, naga tea waina e pei pito ega ta pei tea roaana m̃elu dua ki napua mau, ma naga ega vei tea maripauriana.
14Kuga sava dausi natam̃ateana sikoti tea maga mamau puti, go namaridautaukiana waina masale ki nia te naata sikai ega wo da punusi Yehovah mau: 15doko do leo paratiki naga te naata sikai ega ta papele ki nasaup̃iaana ki Sup̃e mau; naga te nakoa sikai ni nakokonaana ega ta pisou paki lagi po mari sa ki mu mau, go naga tea laapa euga ta pei tea mariana euga loa pae asa mau; 16naga te tea maripele sikai ega ta doko mau, kite te naatam̃oli saudoa sikai dapala Esau mau, waina e sori raki nakaniana sikai tea ni naveitakalapaana aneana maga. 17Nalakena ku atae naga ragi waina e edaku masauna naga ega veani navasap̃iakiana, e pei tea tip̃adoaana (nalakena e da pap̃ai te tokora sikai ni namidoakidoaana mau), go e laaga parati ki nia pilake naririmata maga.
18Nalakena ku da umai paki m̃aladigi ki tava sikai waina e pe vei tea tovidogoana go waina e soro ki nakapu mau, go ki naloaana, go ki namaligo, 19go ki nalagi atu, go ki nadaleo ni paiga, go ki nadaleo ni navasaana maga mau; nadaleo waina tea maga waina eu dogo e eu pavara naga te navasaana sikai ega ta moro pei tea noaana paki da mau: 20nalakena eu mari sa dapetape tea waina e pei tea vitip̃akiana. Nalo tuavati sikai e pe kisidogo tava e pe wo pei tea nadiana ki vatu; 21go tea waina e pei tea vunusiana e pei tea mataukiana dapala waina Moses e naga. 22A mataku p̃arua po duruuru: ma ku umai paki m̃aladigi ki tava Sion, go ki natokoana ki Sup̃e mauri, Yerusalem ni nakoroatelagi, go ki tivilia maga ni agelo maga, 23ki nasaisaiana ni tea laapa go ekalesia ni takalapa maga waina eu pei tea midiriana nakoroatelagi, go ki Sup̃e, Tea Vasap̃otae tea maga mamau puti, go ki naata ni naatam̃oli leana maga waina eu pei tea mariana eu p̃ia lua, 24go ki Yesu tea vae namawota ni navasasokiana vau, go ki nada ni nameseurakiana, waina e pasa p̃ia liu agi Abel. 25Kuga vunusi naga kuga ta dip̃adoa tea waina e do pasa. Nalakena nara eu pe ta sava dua mau ragi waina eu dip̃adoa tea waina e pasa doko maramana, nigida tuga wo sava dua dapale sava tu pe maradoa pa dua ki tea waina e do pasa pae nakoroatelagi? 26Waina nadaleona e parivaria ki maramana ragi wanogoe: ma ragi waia e sai, po naga, Kinau aga wo moro paka sikai durua ki maramana ega ta sikina mau, ma aga wo durua ki nakoroatelagi. 27Go navasaana wanogoe, Moro pakasikai, e paivai ki nalawokidoaana ni naleo maga waina eu pei tea varivariakiana, dapala ni naleo maga waina eu pei tea mariana, naga naleo maga waina eu da pei tea varivariakiana mau euga toko mau doko. 28Nalakena tea wanogoe, waina tu do dape namarakiana sikai waina e mari sa pei tea varivariakiana, tuga veani nasaup̃iaana waina tuga magi Sup̃e suasua pae asa ega tapala waina ega midoa ki m̃ata ki nia ega vilake natape‐p̃ia‐ana go namatakuana: 29nalakena Sup̃e anigida e pei nakapu ganikani sikai.
Currently Selected:
PAKI HEBERU MAGA 12: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
