PAKI HEBERU MAGA 11
11
1Go nasaralomauana e pei navavatuana ni tea leogoroana maga, go namidoakip̃aiana ni naleo maga waina eu ko da pei tea vunusiana mau. 2Nalakena doko tea wanogoe tea matua maga eu pei tea noasokisokiana asa. 3Ki nasaralomauana tu midoaki atae naga maramana maga eu pei tea maridawonakiana ki navasaana ki Sup̃e, dapala tea waina e pei tea vunusiana e da pei tea mariana m̃elu naleo maga waina eu doko lina mau. 4Ki nasaralomauana Abel e pitua ki paki Sup̃e naviriana sikai waina e p̃ia liu agi Kain, waina e pei tea noa‐sokisokiana pae asa naga e leana, Sup̃e e do noa sokisoki nalo ni navituaana aneana maga: go pae asa tea waina e mate e ko do pasa. 5Ki nasaralomauana Enok e pei tea lawokidoaana naga ega ta punusi namateana mau; go e da pei tea vap̃aiana mau, nalakena Sup̃e e lawokidoa e: nalakena pea ki nalawokidoa‐e‐ana e pei tea noasokisokiana naga e pei tea midoakim̃atakiana ki Sup̃e: 6go masale ki nasaralomauana e da pei tea mariataeana mau naga tuga vei tea midoakim̃atakiana aneana: nalakena e one tea waina e umai punusi Sup̃e one naga ega saralomau naga e doko, go naga e pei tea moripituadip̃a tea maga waina eu laaga parati ki nia. 7Ki nasaralomauana Noah ragi waina e pei tea noakisaiana pae Sup̃e nalo ni naleo maga waina eu ko da pei tea vunusiana mau, e mataku, po mari areka sikai raki namautipauriana ni nasum̃a aneana; pae tea wanogoe e dip̃akotovi maramana, po pei tea mariana e pei tea veani namarinaleoleanaana waina e pae nasaralomauana. 8Ki nasaralomauana Abraham, ragi waina e pei tea sosoana, e dogo paratiki naga ega m̃elu pano paki tokora sikai waina ega edaku dape a naga ega vei tea veaniana sikai; go e m̃elu pano, po da atae tokora waina ega vaki asa pano mau. 9Ki nasaralomauana e paki navanua ni nasaiana po atatoko asa, dapala e da pei aneana mau, e do doko tap̃aup̃au maga, sikoti Isaak go Yakob, waina ero peani sikoti a nasaiana wanogoe sikai maau: 10nalakena e leogoro natokoana waina e peani laketano maga, waina Sup̃e e pei mataisau kakana go tea tavagi a. 11Ki nasaralomauana Sarah nae ma e peani nakasuaana naga ega tumau ki pipia ragi waina e matua liu ragi kakana, nalakena e midoaki nia naga tea waina e sai a e pei lomau: 12go nalakena tea wanogoe tea laapa eu pakilina m̃elu tea sikai maau, go nae e dapala e mate sua tea laapa dapala m̃asoe maga ni nakoroatelagi, go dapala naworaone, waina e pisari nagole ni natasi, waina e mari sa pei tea veveana.
13Tea maga mamau puti wanogoe eu mate pae nasaralomauana, ragi waina eu ko da dape nasaiana maga mau, ma eu punusi sua ra po pasa dodomi sua ra pae uvea, po noa sai sua naga eu pei nam̃enaki maga go atatoko maga doko maramana. 14Nalakena tea maga waina eu noa tea tapala nogoe maga eu mari a e doko lina naga eu do laaga navanua sikai waina ega vei adeada. 15Go eu pe midoaki navanua waina eu m̃elu dua ki nia pano, eu peani ragi naga euga liliu. 16Ma ragi waia eu masau navanua wia liu sa sikai, tea wanogoe e pei, tea ni nakoroatelagi: nalakena tea wanogoe Sup̃e e da maliere ki da mau, naga ega vei tea sosoana ki Sup̃e adeada: nalakena e madeada mari m̃ata ki natokoana sikai.
17Ki nasaralomauana Abraham, ragi waina e pei tea maridogoana, e pitua ki Isaak e pei naviriana: go tea waina e dape soki nasaiana maga e pitua ki natuna sikedau e pei naviriana; 18waina e pei tea noaana paki nia, e naga, Naworaworam̃a euga vei tea sosoana pae Isaak: 19e midoa ki nia naga Sup̃e e mari atae sike a ega tuleana, m̃elu dua ki tea mate maga; waina ma e piragi a m̃elu ara liliu doko naluluakia sikai. 20Ki nasaralomauana Isaak e pasa p̃ia ki Yakob go Esau, nalo ni naleo maga waina euga wo umai. 21Ki nasaralomauana Yakob, ragi waina e naga ega mate, e pasa p̃ia ki sikasikai ki Yosef natuna dua; po lotu, e kolovagoro nap̃au ni tiko aneana. 22Ki nasaralomauana Yosef, ragi waina e pei m̃aladigi naga ega mate, e midoakinoa nalo ni nam̃eluana ki Israel natuna maga; go e pitip̃aki nalo ni navatuna maga. 23Ki nasaralomauana Moses, ragi waina e pakilina, e pei tea tasurukiana atelagi dolu pae tea matua aneana maga, nalakena ero punusi naga e pei piakiki wia; go ero da matauki natip̃akiana ki nawota mau. 24Ki nasaralomauana Moses, ragi waina e p̃arua sua, e karai naga ega vei tea sosoana ki natu ni Faraoh natuna nagoroi; 25doko matadoa naga ega vei tea marisakiana sikoti narei ki Sup̃e, liu naga ega veani namaroana ni namarinaleosaana pae te ragi; 26doko do midoaki nia naga navasapinoaki‐Kristo‐ana e pei nasogolapaana warua liu naloriki tauakiana maga ni Ityipt: nalakena e leo paki namoripituadip̃aana. 27Ki nasaralomauana e doropusi Ityipt e madoko doko da matauki namaritausuana ki nawota mau: nalakena e mari kasua doko, dapala e do punusi tea waina e da pei tea vunusiana mau. 28Ki nasaralomauana e mari navakalauana go nameseuraki‐nada‐ana, naga tea mari sa ki takalapa maga ega ta kisidogo ra mau. 29Ki nasaralomauana eu surata duagoto Natasi Miala dapala eu pae navanua garagara; waina tea ni Ityipt maga ragi waina eu maridogo naga euga mari a eu pei tea tinomiana. 30Ki nasaralomauana nakoro maga ni Yeriko eu dowo pakitano, ragi waina eu pei tea talivirikiana sua naaleatia larua. 31Ki nasaralomauana Rahab, nagoroi masausara, e da mate mau sikoti tea maga waina eu dogopiri, e piragi tea leo pavaraka maga pilake natam̃ateana. 32Go aga moro noa nasava? Nalakena ragi ega wo puru ki nau a pe to dogorogo nalo ni Cideon, Barak, Samson, Yefthah; nalo ni David go Samuel go tea vea noa sai maga: 33waina pae nasaralomauana eu mari matua ki namarakiana maga, eu p̃osiwosi ki namarinaleoleanaana, eu pap̃ai nasaiana maga, eu p̃ogoro nawoka ni laion maga, 34eu mari punue nakasuaana ni nakapu, eu sava dua ki nawoka ni lova, eu pei tea mariana eu kasua m̃elu dua ki namanainaiana, eu pei tea mariana eu kasua doko navakalo, eu mari taua maga ni walu p̃ota maga eu sava pano. 35Nagoroi maga eu piragi tea mate adeada eu moro mauri: ma tea p̃ota maga eu pei tea wokap̃oriworiana, doko da dape natauluaana mau: naga euga sua namoroduleanaana wia liu: 36go tea p̃ota maga eu dape namaridogoana ni namarisaudoakiana maga go ni navaratiana maga; io, go ni natali solisoli maga go ni nasum̃a ni navavaiana: eu pei tea nadiana ki vatu maga, 37eu pei tea sorokotoviana, eu pei tea maridogoana, eu pei tea maripuneana ki lova: eu surata pasara suni nawili ni shiip, go ni naninani maga; eu pei tea tika, eu pei tea riesokiana, eu pei tea marisakiana 38(waina maramana e da p̃ia ki da mau), eu do surata sasap̃o doko masop̃alo maga go tava maga go valea maga, go m̃oru maga ni natano. 39Go tea maga mamau puti wanogoe, waina eu pei tea noasokisokiana pae nasaralomauana adeada, eu da dape nasaiana mau, 40Sup̃e e pea punusi nalo kakagida te naleo wia liu sa, naga nara euga ta pei tea mariana euga wia lua masale ki gida mau.
Currently Selected:
PAKI HEBERU MAGA 11: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
