PAKI TEA NI KOLOSSE 3
3
1Nalakena tea wanogoe ku pe vei tea sikeana duleana sikoti Kristo, kuga laaga naleo maga ni elagi, tokora waina Kristo e doko asa, waina e dasake pisari nam̃elearu ni matua ni Sup̃e. 2Kuga midoaki naleo maga ni elagi, kuga ta midoaki naleo maga waina eu doko maramana mau. 3Nalakena ku mate, go namauriana animu e pei tea tasurukiana sikoti Kristo doko Sup̃e. 4Ragi waina Kristo, waina e pei namauriana anigida, ega wo pakilina, ragi wanogoe nimu ma kuga wo pakilina sikoti a doko nasamasamaana.
5Nalakena tea wanogoe kuga mari punue naleo kakamu maga waina eu doko maramana; namaripeleana, naloaana, namasausauana, namasauana sa, go namatam̃aguraana, waina e pei nalotu‐ki‐nasup̃e‐ana; 6nalakena tea maga wanogoe namaetoana ki Sup̃e e umai paki narogopiriana natuna maga; 7waina nimu ma ku surata doko ara sala vea, ragi waina ku mauri doko tea maga wanogoe. 8Ma ragi waia nimu ma kuga toropusi tea maga mamau puti waia, namaetoana, namaritausuana, navilosiana, navasasakiana, navasaana ni namaliereana euga ta m̃elu nawokamu mau: 9kuga ta sorosoro dum̃amu paki mu mau; nalakena ku sawo lua sua naatam̃oli tuai go namariana aneana maga, 10po suni sua naatam̃oli vau, waina e do pei tea maripaukiana paki naataem̃atakiana pae nunu ni tea waina e dawona ki nia: 11waina tea ni Hellas go tea ni Yudea ero da doko asa mau, tea tovadaviviana go tea tika natovadaviviana mau, tea vasa pae navasaana p̃ota, Skuthe, naviti, tea tum̃ana doko mau; ma Kristo e pei tea maga mamau puti, go e doko tea maga mamau puti.
12Nalakena tea wanogoe kuga suni dapala tea matadoaana maga ki Sup̃e, tea tautau maga go tea dodomiana maga, kuga suni namarita ni nadodomiana, navakaleana, nap̃op̃ovakitanoana, namatemateana, naveimaritasoki‐parau‐ana; doko do dum̃amu soki mu, 13po do dum̃amu manimu midoakikorokoro, te naata e pe veani te nalakena ni navasadip̃aana dip̃a te naata; dakiusi waina Nawota e manimu midoakikorokoro, nimu ma kuga mari ega tapala nogoe: 14go kuga suni nadodomiana ega tap̃augoro tea maga mamau puti wanogoe, waina e pei natali ni nawialuaana. 15Go natam̃ateana ki Kristo ega to maraki p̃otae doko nap̃op̃omu, waina ku pei tea sosoana paki asa doko nap̃atoko sikai maau; go kuga vei tea dodom̃ataki. 16Navasaana ki Kristo ega toko mu doko ega vae nasogolapaana ega vilake sara namanumatuaana; doko do dum̃amu pasa piseiki mu po do dum̃amu dapavanau mu ki salamo maga ki humno maga ki nalegaana maga ki Naatana, doko do lega ki nasaup̃iaana doko nap̃op̃omu paki Sup̃e. 17Go sara naleo waina ku pe mari ra, nalo ni navasaana kite nalo ni nawosiana, kuga to mari naleo maga mamau puti doko nagisa ni Nawota Yesu, doko do pasadodom̃ataki Sup̃e Tamana pae asa.
18Nagoroi maga, kuga toko etano paki naanoai animu maga, ega tapala waina e patakamu doko Nawota. 19Naanoai maga, kuga dodomi nagoroi animu maga, go kuga ta pei tea kokona dip̃a ra mau. 20Piakirikiri kuga rogo paratiki nadaleo ni tea matua animu maga nalo ni naleo maga mamau puti, nalakena tea wanogoe e pei tea midoakim̃atakiana doko Nawota. 21Tamada maga kuga ta mari natumu maga euga maeto mau, naga nap̃op̃oda euga ta dodosua mau. 22Tea suasua maga, kuga rogo paratiki nalo ni naleo maga mamau puti nadaleo ni tea maga waina eu pei nawota animu nalo ni nap̃atokomu; ega ta pae nasuasuaana ni namata mau, dapala tea mari namasauana ki naatam̃oli maga, ma ega vae nasikaimaauana ni nap̃op̃omu, doko do matauki Nawota: 23tea waina ku pe mari a, kuga wosiwosi pae naatamu, ega tapala ku pe magi Nawota mari a, po da magi naatam̃oli maga mari a mau; 24ku atae naga kuga wo dape ki Nawota navituadip̃aana ni tea veaniana: ku do magi Nawota Kristo suasua. 25Nalakena tea waina e mari dagele ega wo dape liliua ki tea tagele waina e mari a: go naviraginaraeana e da doko mau. Nawota maga, kuga tua tea suasua animu maga tea waina e leana go e pataka; ku atae naga nimu ma ku peani Nawota sikai nakoroatelagi.
Currently Selected:
PAKI TEA NI KOLOSSE 3: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
