PAKI TEA NI KOLOSSE 4
4
1Kuga to dapasavasa pitip̃atip̃a, po do leleogoro doko asa ega vilake navasadodom̃atakiana. 2Go kuga to maginami ma dapasavasa, 3naga Sup̃e ega maginami p̃olagati namata sikai ni navasaana, naga aroga vasa p̃aia ni Kristo, waina e pei nalakena a pei tea soliana; 4naga aga mari a ega toko lina ega tapala waina e one au one naga aga vasa. 5Kuga surata pae namanumatuaana paki tea maga ni etaku, doko do daulua ragi. 6Navasaana animu ega vilake nasaup̃iaana sara ragi, ega vei tea mariana ega gagadi ki natasimena, naga kuga atae dapala waina e one mu one naga kuga vasadara sara naata sikasikai.
7Naleo aginau maga mamau puti Tukiko ega wo noa ki sai mu ara, waina e pei taigida dodomiana go minister lomau go tea suasua sikoti gami doko Nawota: 8waina a dip̃aki lua e paloti punusi mu nalakena tea waia, naga kuga atae naleo maga nalo kakagami, go naga ega vasapakavakale nap̃op̃omu; sikoti Onesimo, 9taigida lomau go dodomiana, waina e pei sikai kakamu. Eroga wo noa ki sai mu naleo maga mamau puti waina eu pei tea mariana tokora waia.
10Aristarko tea viragiluapavakotoana sikoti au e pasadodomi mu, go Marko, p̃elemata ni Barnaba (waina ku dape sua natip̃akiana maga nalo kakana; e pe valoti punusi mu, kuga viragi a), 11go Yesu waina e pei tea sosoana ki Yusto, waina eu pei tea ni tea tovadaviviana maga: nara eu sikida pei tea wosiwosi sikoti au paki namarakiana ki Sup̃e, naatam̃oli maga waina eu pei navakavakaleana sikai paki nau. 12Epafra, waina e pei sikai kakamu, tea suasua sikai ki Kristo Yesu, e pasadodomi mu, doko do manimu pilele natapasavasaana aneana maga sara ragi, naga kuga lawodu tea wia lua go tea saralomau pakavuro doko sara namasauana ki Sup̃e. 13Nalakena a maneana noa sokisoki naga e manimu pei naawa p̃arua, go magi tea maga waina eu doko Laodikeia, go magi tea maga waina eu doko Hierapoli. 14Luka, tea maripauri dodomiana, go Dema ero pasa dodomi mu. 15Kuga vasa dodomi taigida maga waina eu doko Laodikeia, go Numfa, go ekalesia waina eu doko nasum̃a adeada. 16Go ragi waina epistole waia ega vei tea veveana sua m̃aleoputo kakamu, kuga mari naga ega moro pei tea veveana paki ekalesia ni tea ni Laodikeia maga go naga nimu ma kuga veve epistole waina e m̃elu Laodikeia. 17Go kuga noa ki Arkippo, kuga naga, P̃a leo paratiki nasuasuaana waina ku dape a doko Nawota, naga p̃a vakavuro e.
18Navasadodomiana aginau Paulo ki nam̃elearugu. Kuga midoa ki natali solisoli aginau maga. Nasaup̃iaana ega sikoti mu.
Currently Selected:
PAKI TEA NI KOLOSSE 4: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
