PAKI TEA NI KOLOSSE 2
2
1Nalakena a masauna naga nimu kuga atae nawaruaana ni namaripileleana waina a manimu peani a, go magi tea ni Laodikeia maga, go magi tea maga waina eu da punusi naraegu doko nap̃okasi mau; 2naga nap̃op̃oda euga vei tea vakavakaleana, nara euga vei tea marisaisaikiana doko nadodomiana, go paki nasogolapaana mamau ni nasaralomau pakavuroana ni namidoakiataeana, naga euga atae m̃ata ki p̃aia ki Sup̃e, 3Kristo, waina tea tauakiana maga mamau puti ni namanumatuaana go ni naataeana eu pei tea tasurukiana doko asa. 4A noa tea wanogoe naga te naata sikai ega ta soro mu mau ki navasaana ni navuadoaana. 5Nalakena a pe vuoli ki mu nalo ni nap̃okasigu, ma a doko sikoti mu nalo ni naatagu, doko do laelaea po do punusi namarimatanakiana animu, go naveilaketokoana ni nasaralomauana animu doko Kristo.
6Nalakena tea wanogoe dapala waina ku piragi Kristo Yesu Nawota, 7kuga surata doko asa, tea koakoa maga go tea to davagiana maga doko asa, go tea lawosokiana maga nalo ni nasaralomauana animu, dakiusi waina ku pei tea vasapiseikiana, doko do mari p̃arua ki navasadodom̃atakiana.
8Kuga vunusi naga te naata sikai ega ta doko mau waina e do piragi lua pavakoto mu pae namanumatuaana aneana go nasurueana p̃alo, pae navasaana vituakiana ki naatam̃oli maga, pae tea vea maga ni maramana, go e da pae Kristo mau: 9nalakena navakavuroana mamau ni navei‐Sup̃e‐ana e doko asa doko pilake nap̃atoko, 10go ku pei tea vakavuroana doko asa, waina e pei nap̃au ni sara namarakiana go ni sara naveinawotaana. 11Waina ku pei tea tovadaviviana doko asa ki natovadaviviana sikai waina e da pei tea mariana ki nam̃elearu maga mau, doko nasawoluaana ni nap̃atoko ni nap̃okasi, doko natovadaviviana ki Kristo; 12ku pei tea ovakiana sikoti a doko nabapetisoana, waina ku pei tea sikeana duleana sikoti a asa pae nasaralomauana ni nawosiwosiana ki Sup̃e, waina e sike a e duleana m̃elu dua ki tea mate maga. 13Go nimu, ragi waina ku pei tea mate doko natapiriana animu maga go natikaana ni natovadaviviana ni nap̃okasimu, e pakamauri ki mu sikoti a, e manigida midoakikorokoro natapiriana anigida maga mamau puti; 14e kasi lua namidiriana ni nam̃elearu waina e dip̃a gida ki natawonakiana kakana maga, waina e kokona ki gida: go e dape lua e m̃elu dua ki m̃aleoputo, 15e duri a paki nakau valadagoto aneana; e sawo lua namarakiana maga go naveinawotaana maga m̃elu dua ki nia pano, po mari ra eu pei tea viseikiana ki naviviariana, e mari matua ki da doko asa.
16Nalakena tea wanogoe te naata ega ta pasa p̃otae mu mau nalo ni nakaniana kite namunuana, kite nalo ni naaleatia ni nasaisaiana sikai, kite nalo ni atelagi vau sikai, kite nalo ni naaleatia ni sabbath sikai: 17waina eu pei melu sikai ni naleo maga waina euga wo umai, ma nap̃atokoda e pei tea ki Kristo. 18Te naata sikai waina e masauna ega ta dape lua kiamu praise animu mau ki nap̃op̃ovakitanoana go ki nalotuki‐agelo‐maga‐ana, po do sili paki naleo maga waina e da punusi ra mau, po pei tea p̃op̃o vuka p̃alo pae namidodoana ni nap̃okasina, 19go e da do pua soki Nap̃auna mau, waina nap̃atokona mamau e do dape kiana po pei tea marisaisaikiana pae kolopu maga go natali maga, e do disu po p̃arua ki narisuana ni nawaruaana ki Sup̃e.
20Ku pe mate sikoti Kristo m̃elu dua ki tea vea maga ni maramana, ekasana, dapala ku pe mauri doko maramana, ku doko etano paki natawonakiana maga. 21P̃a ta dape dogo mau, go p̃a ta katidogo mau, 22go p̃a ta kisidogo mau (naleo maga wanogoe eu mamau puti doko raki namesoana ki namarimaariana), pae natip̃akiana maga go navasapiseikiana maga ki naatam̃oli maga. 23Naleo maga wanogoe eu peani lomau ki narogorogoana sikai ni namanumatuaana doko nalotuana dapala namasauana adeada, go nap̃op̃ovakitanoana, go namarikasua‐ki‐nap̃atokoda‐ana; eu da doko te nadodomadaganiana dip̃a navukaana ni nap̃okasi mau.
Currently Selected:
PAKI TEA NI KOLOSSE 2: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
