1 PAKI TEA NI KORINTHO 6
6
1Te naata sikai kakamu, waina e peani te naleo sikai dip̃a tea p̃ota, e piviari pei tea vasap̃otaeana narae ni tea tagele maga, go e da pei tea vasap̃otaeana narae ni tea tautau maga mau kite? 2Kite ku da atae mau naga tea tautau maga euga wo pasa p̃otae maramana? Go maramana e pe vei tea vasap̃otaeana pae mu, ku da p̃ia mau naga kuga vasap̃otae tea kiki sa maga kite? 3Ku da atae mau naga tuga wo pasa p̃otae agelo maga? Go tuga ta pasa p̃otae naleo maga ni namauriana waia kite? 4Nalakena tea wanogoe ku pe veani navasap̃otaeana maga ni naleo maga ni namauriana waia, ku lawo ki tea maga waina eu pei tea midoakip̃alokiana ni ekalesia naga euga vasa p̃otae kite? 5A noa tea wanogoe naga kuga maliere. E dapala tea manumatua sikai e da doko m̃aleoputo kakamu mau, waina e mari atae midoaki noa p̃otae namawota ni taina maga, 6ma tai sikai e pei tea vasap̃otaeana sikoti taina, go tea wanogoe narae ni tea maga waina eu da saralomau mau kite? 7Nalakena tea wanogoe e pei tea sa sua usuraki animu, waina ku peani tea vasap̃otaeana maga dum̃amu sikoti mu. Ekasana kuga ta pei tea maridagelekiana? Ekasana kuga ta pei tea vutiluaana? 8Ma nimu ku mari dagele po puti lua, go tea wanogoe paki taimu maga. 9Kite ku da atae naga tea marinaleo tagele maga euga wo da peani namarakiana ki Sup̃e mau? Kuga ta pei tea vilasurueana mau: tea maripele maga waina eu pei naputu, go tea lotu ki nasup̃e maga, go tea maripele maga waina eu pitawiri, go tea maga waina eu maripele oli nagoroi, go tea maga waina eu maripele paki tea marioli nagoroi, go tea vanako maga, 10go tea matam̃agura maga, go tea matamaloku maga, go tea vivisuori maga, go tea tape‐pavakoto maga, euga wo da peani namarakiana ki Sup̃e mau. 11Go nimu seara kakamu ku pea pei tea tapala nogoe maga: ma ku po pei tea sarueana, ma ku po pei tea maridautaukiana, ma ku po pei tea marileanakiana doko nagisa ni Nawota Yesu Kristo, go doko Naata ni Sup̃e anigida.
12Naleo maga mamau puti eu pae nawotaeana paki nau; ma naleo maga mamau puti eu da mari m̃ataki mau. Naleo maga mamau puti eu pae nawotaeana paki nau; ma kinau aga ta pei naviti ni te navatuna mau. 13Navinaga maga agi nap̃ele, go nap̃ele agi navinaga maga: ma Sup̃e ega wo mari puoli ki sokata ki da. Ma nap̃atoko e da pei agi namaripeleana mau, ma e pei agi Nawota, go Nawota e pei agi nap̃atoko: 14ma Sup̃e e sike Nawota e duleana, go ega wo sike gida tuga wo duleana pae nakasuaana aneana. 15Ku da atae naga nap̃atokomu maga eu pei naleo maga ni Kristo kite? Go aga tape lua naleo maga ni Kristo, po mari ra euga vei naleo maga ni nagoroi masausara sikai kite? Ega ta dapala nogoe mau. 16Kite ku da atae naga tea waina e puluti nagoroi masausara sikai e pei nap̃atoko sikai maau ma nae? Nalakena e naga, Nara dua eroga wo pei nap̃okasi sikai maau. 17Ma tea waina e puluti Nawota e pei naatana sikai maau ma nae. 18Kuga sava dua ki namaripeleana. Sara namarinaleosaana waina naatam̃oli sikai e mari a e pei tea ni etaku ni nap̃atokona; ma tea waina e maripele e mari naleo sa dip̃a nap̃atokona. 19Kite ku da atae naga nap̃atokomu e pei nasum̃a tapu ki Naatana Tapu waina e doko mu, waina ku peani a m̃elu Sup̃e? Go ku da dum̃amu peani mu mau; 20nalakena ku pei tea vakotoviana ki naulu sikai: nalakena tea wanogoe kuga samasamani Sup̃e doko nap̃atokomu.
Currently Selected:
1 PAKI TEA NI KORINTHO 6: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
