1 PAKI TEA NI KORINTHO 7
7
1Ma nalo ni naleo maga waina ku midiri a: E p̃ia ki naatam̃oli sikai naga ega ta kisidogo nagoroi sikai mau. 2Ma, nalakena namaripeleana maga, sara naatam̃oli euga sikasikai peani nagoroi adeada ega sikasikai sarasara ra, go sara nagoroi euga sikasikai peani naanoai adeada ega sikasikai sarasara ra. 3Naanoai ega vitua paki anagoroi ki tea waina e one asa one: go dapala nogoe nagoroi ega vitua paki anawota. 4Nagoroi e da peani naveinawotaana ni nap̃atokona mau, ma anawota e peani a: go dapala nogoe naanoai ma e da peani naveinawotaana ni nap̃atokona mau, ma anagoroi e peani a. 5Kuga ta dum̃amu dape lua kiamu mau, ma koro pe rua suasua ki nia te ragi, naga koroga tum̃amu pitua ki mu paki natapasavasaana, po moro dum̃amu sikoti mu, e pe wia, naga Satan ega ta maridogo mu mau nalakena namarisa‐dum̃amu‐soki‐mu‐ana. 6Ma a noa tea wanogoe e pei nasuasuakiana, e da pei natip̃akiana mau. 7Ma a masauna naga naatam̃oli maga mamau puti euga tapala waina kinau a doko. Ma sara naatam̃oli eu sikasikai peani navituaana ni nasaup̃iaana adeada sikasikai sarasara ra m̃elu Sup̃e, sikai e dapala nea, go sikai e dapalana.
8Ma a noa ki naputu maga go ki nagoroi malepu maga, naga eu pe toko dapala waina kinau a doko e pe wia ki da. 9Ma eu pe marisa dum̃ada soki ra, euga vitawiri go euga laki: nalakena eu pe vitawiri go eu pe laki e pe wia liu waina eu pe vavaga. 10Ma a dip̃aki tea vitawiri maga go tea laki maga, ma e da pei kinau mau, ma e pei Nawota, Naga nagoroi ega ta m̃elu 11dua ki anawota pano mau(ma go e pe m̃elu pano, ega vei naputu doko, kite ega moro pei p̃op̃o wia paki anawota); go naga naanoai ega ta doropusi anagoroi mau. 12Ma kinau a noa ki tea p̃ota maga, e da pei Nawota mau: Te taigida sikai e pe veani nagoroi sikai waina e da saralomau mau, go nae e pe suasua naga ega toko sikoti a doko, ega ta doropusi a mau. 13Go nagoroi waina e peani anawota waina e da saralomau mau, go nae e pe suasua naga ega toko sikoti a doko, ega ta doropusi anawota mau. 14Nalakena naanoai waina e da saralomau mau e pei tea maridautaukiana pae anagoroi, go nagoroi waina e da saralomau mau e pei tea maridautaukiana pae anawota: e pe ta dapala nogoe mau natumu maga eu pe loa doko; ma ragi waia eu dautau. 15Tea waina e da saralomau mau e pe m̃elu pano, ega m̃elu pano taigida kite goregida e da pei tea soliana nalo ni tea tapala nogoe maga mau: ma Sup̃e e soso gida doko natam̃ateana. 16Nalakena ku atae dapale sava, nagoroi, ku pe wo mautipauri am̃awota? Kite ku atae dapale sava, naanoai, ku pe wo mautipauri am̃agoroi? 17Ma dapala waina Nawota e magi sara naatam̃oli sikasikai p̃otawotae, dapala waina Sup̃e e soso sara naatam̃oli sikasikai, euga surata ega tapala nogoe. Go a do pasadawonaki dapala nogoe doko ekalesia maga mamau puti. 18Te naatam̃oli sikai waina e pei tea tovadaviviana sua e pei tea sosoana kite? Ega ta mari puoli ki natovadaviviana aneana mau. Te naata waina e da pei tea tovadaviviana mau e pei tea sosoana kite? Ega ta pei tea tovadaviviana mau. 19Natovadaviviana e da pei te navatuna mau, go natikaana ni natovadaviviana e da pei te navatuna mau; ma narogoparatikiana ni natip̃akiana maga ki Sup̃e e pei naleo maga mamau puti. 20Sara naatam̃oli euga sikasikai doko nasosoana waina eu pei tea sosoana doko asa. 21Ku pei naviti ragi waina ku pei tea sosoana kite? P̃a ta midoaki paratiki tea wanogoe mau: ma ku pe mari atae pei tea veresiana dum̃am̃a doko, e pe wia naga p̃a mari a. 22Nalakena naviti waina e pei tea sosoana, doko Nawota, e pei tea veresiana dum̃ana doko ki Nawota: dapala nogoe tea tum̃ana doko waina e pei tea sosoana, e pei naviti ki Kristo. 23Ku pei tea vakotoviana ki naulu sikai; kuga ta pei naviti maga ki naatam̃oli maga mau. 24Tai maga, sara naatam̃oli euga sikasikai doko tea waina eu doko asa ragi waina eu pei tea sosoana, euga toko tea wanogoe doko sikoti Sup̃e.
25Ma nalo ni nagoroi atara maga a da peani te natip̃akiana ki Nawota mau: ma a pitua ki namidoakip̃otaeana aginau, waina e dapala tea waina e dape nadodomiana ki Nawota naga ega vei lomau. 26Nalakena tea wanogoe a midoaki nia naga tea waia e p̃ia nalakena nap̃alaasa waina e doko ragi waia, naga e p̃ia ki naatam̃oli naga ega toko dapala waina e doko. 27Ku pei tea soliana paki nagoroi sikai kite? P̃a ta laaga naga p̃a vei tea veresiana mau. Ku pei tea veresiana m̃elu dua ki nagoroi sikai kite? P̃a ta laaga nagoroi sikai mau. 28Ma go ku pe vitawiri, ku pe ta mari naleo sa asa mau; go nagoroi atara sikai e pe laki, e pe ta mari naleo sa asa mau. Ma tea tapala nogoe maga euga wo peani nariesokiana doko nap̃okasi: ma kinau a marimalemale mu. 29Ma a noa tea waia, tai maga, naga ragi waina e ko doko e puru, go tea maga waina eu peani nagoroi euga toko dapala eu da peani ra mau; 30go tea maga waina eu dagi, euga tapala eu da dagi mau; go tea maga waina eu laelaea, euga tapala eu da laelaea mau; go tea maga waina eu pakokoto, euga tapala eu da dapesoki mau; 31go tea maga waina eu marimaari maramana, euga tapala eu da marimaari p̃arua ki nia mau: nalakena naleodawonakiana ni maramana waia e do pano puoli. 32Ma a masauna naga kuga tika ki namidoakiparatikiana maga. Tea waina e da pitawiri mau e midoaki parati ki naleo maga ki Nawota, dapala waina Nawota ega midoaki m̃ata ki nia: 33ma tea waina e pitawiri e midoaki paratiki naleo maga ni maramana, dapala waina anagoroi ega midoaki m̃ata ki nia. 34Go natap̃otaeana sikai e doko namawota ni nagoroi laki go ni nagoroi atara. Tea waina e da laki mau e midoaki paratiki naleo maga ki Nawota, naga ega tautau nap̃atokona go naatana: ma tea waina e laki e midoaki paratiki naleo maga ni maramana, dapala waina anawota ega midoaki m̃ata ki nia. 35Go a noa tea wanogoe naga kuga vei tea marim̃atakiana asa, a da noa e naga aga nadi ki vaivai sikai paki mu mau, ma naga kuga mari tea waina e pei tea leom̃atakiana, go naga kuga toko raki Nawota masale ki navaputuakiana. 36Ma te naata e pe midoaki nia naga e da mari tea leom̃atakiana paki naatara aneana, e pe matua sua, go e pe tapala nogoe one asa one naga ega laki, ega mari tea waina e masauna naga ega mari a; e da mari naleo sa asa mau; eroga tum̃ada piragi ra. 37Ma tea waina e lawodu kasua doko nap̃op̃ona, waina e da pei tea mari dieana mau, go waina e peani naveinawotaana nalo ni namasauana aneana, go waina e midoaki p̃otae tea wanogoe nap̃op̃ona, naga ega mauti naatara aneana, ega wo mari p̃ia. 38Nalakena tea wanogoe tea waina e pitua ki naatara aneana naga ega laki e mari p̃ia; go tea waina e da pitua ki nia mau naga ega laki ega wo mari p̃ia liu sa. 39Nagoroi sikai e pei tea soliana ragi waina anawota e mauri doko; ma anawota e pe mate, e pei tea veresiana dum̃ana doko naga ega laki tea waina e masauna naga ega laki asa; ma ega ta laki tea waina e da doko Nawota mau. 40Ma e pe toko dapala waina e doko e pe maropa liu waina e pe laki, pae namidoakip̃otaeana aginau: go a midoaki nia naga kinau ma a peani Naata ni Sup̃e.
Currently Selected:
1 PAKI TEA NI KORINTHO 7: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
