1 PAKI TEA NI KORINTHO 5
5
1E pei tea rogorogokiana usuraki naga namaripeleana e doko m̃aleoputo kakamu, go namaripeleana dapala waina tea takiusi a e da doko m̃aleoputo ni tea ni nalauna p̃ota maga mau, naga naata sikai kakamu e peani nagoroi ki tamana. 2Go nimu ku pei tea p̃op̃o vuka, go ku da susue mau, naga naata waina e mari nawosiana wanogoe ega vei tea tapeluaana m̃elu dua ki m̃aleoputo kakamu. 3Nalakena kinau lomau, waina a puoli ki mu ki nap̃atokogu, ma a sikoti mu ki naatagu, a midoaki p̃otae sua, dapala a pe sikoti mu doko, naata waina e mari tea wanogoe dapala nogoe, 4doko nagisa ni Nawota anigida Yesu, ragi waina nimu kuga saisai, go naatagu, pilake nakasuaana ki Nawota anigida Yesu, 5naga kuga vitua ki tea waina e dapala nogoe paki Satan, raki namari‐sa‐ki‐nap̃okasina‐ana, naga naatana ega vei tea mautipauriana naaleatia ki Nawota Yesu. 6Navakavakaeana animu e da p̃ia mau. Ku da atae naga leven kiki e levena ki taua mamau kite? 7Kuga mari puoli ki leven tuai, naga kuga vei taua vau sikai, ega tapala waina ku da pei tea levenakiana mau. Go nalakena navakalauana anigida e pei tea maripunueana sua, Kristo: 8nalakena tea wanogoe tuga mari nasaisaiana, tuga ta mari a ki leven tuai mau go tuga ta mari a ki leven ni navilosiana go ni nasigisigileoana mau, ma tuga mari a ki bred waina e da pei tea levenakiana mau ni natautauana go ni nalomauana.
9A midiri paki mu doko epistole waina, naga kuga ta sikoti‐sari tea maripele maga mau; 10a da noa naga ega tapala nogoe pae tea mamau nalo ni tea maripele maga ni maramana waia mau, kite tea matam̃agura maga go tea tapepavakoto maga, kite tea lotu ki nasup̃e maga; nalakena e pe tapala nogoe e pe one mu one naga kuga m̃elu dua ki maramana pano: 11ma a midiri paki mu naga kuga ta sikoti sari, te naata waina e pei tea sosoana ki tai sikai, e pe vei tea maripele, kite tea matam̃agura, kite tea lotu ki nasup̃e maga, kite tea vivisuori, kite tea matamaloku, kite tea tapepavakoto; tea tapala nogoe kuga ta ganikani sikoti a mau. 12Nalakena aga kasa ki naga aga vasa p̃otae tea maga ni etaku? Nimu ku da pasa p̃otae tea maga ni roara kite? 13Ma tea maga ni etaku Sup̃e e pasa p̃otae ra. Kuga mari tea sigisigileo wanogoe ega m̃elu dua ki mu pano.
Currently Selected:
1 PAKI TEA NI KORINTHO 5: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
