NAMBABA 14

Iziral tɩŋŋaa vɩa Mosis arɩ Arɔŋ niiŋ

1Tɩtaŋ-la Iziral tɩŋŋaa kala tʋɔŋ chei ba faasa yiyel. 2Ba kala gʋrɩmɛ wɩaa Mosis arɩ Arɔŋ teeŋ, a bʋl, “La fa yaara sʋʋ Ijipiti tinteeŋ lɛ koo tintee-hɩlɩŋ deeŋ lɛ, ʋ nɛ kpɩa. 3Bɛɛ nɛ tɩɩ La TƖƖNA kɛnla kɔ tinteeŋ deeŋ dɩ ba kpʋla laalɩŋ lɛ aŋ kɛsɛ la haalaa arɩ la biiriŋ? Ʋ bɩ jaŋ kpɩa dɩ la nɛ mɩɩra mʋ Ijipiti tinteeŋ?” 4Ŋɩɩ nɛ nɩalɩŋ bʋla pɩ dɔŋɔ, “Má leŋ dɩ la lɩɩsɛ sɩpaalaara dɩ ʋ mɩɩra kɛnla mʋ Ijipiti tinteeŋ.”

5Ŋɩɩ nɛ Mosis arɩ Arɔŋ tuu tele chu Iziral tɩŋŋaa kala sɩpaaŋ. 6Ba sɩ ŋaa ŋɩɩ, Nuŋ nanʋala Josua arɩ Jefuni nanʋala Kalɩb tʋɔŋ chei ba kɛŋ ba gɛnnɩŋ kɩɛsɛ. Ba ma fa hɛ nɩalɩŋ Mosis sɩ tɩma ba mʋ beŋ tintee-la tʋɔŋ nɛ. 7Ŋɩɩ nɛ ba bʋla pɩ Iziral tɩŋŋaa kala, “Tintee-la la sɩ mʋ beŋ chaasa zɔŋ nɛ. 8Dɩ La TƖƖNA tʋɔŋ nɛ tɔrɛ la nyuŋ, ʋ jaŋ kɛnla mʋ tinteeŋ deeŋ sɩ kɛŋ kɩaa woruŋ a joŋu pɩla. 9Má sɩ́ La TƖƖNA wɩɩkala vɩa, a sɩ́ nɩalɩŋ sɩ hɛ tintee-la lɛ ma fá, la jaŋ yuo diiba. La TƖƖNA hɛ la teeŋ nɛ, ba bɩra bɩ kʋŋkala kɛnɛ dɩ ba kaa pɔ ba tɩtɩa, má sɩ́ ba fá.”

10Ama Iziral tɩŋŋaa kala bʋl arɩ ba jaŋ yagɛ Josua arɩ Kalɩb kpʋ arɩ tabɩaa. Ŋɩɩ nɛ La TƖƖNA tʋla guu kʋ chaanɛ lɛbɩ-la lɛ ʋ sɩ yie kɔ Iziral tɩŋŋaa teeŋ. 11La TƖƖNA pɩɛsɛ Mosis, “Ɛɛ nɛ nɩaa deemba chɛ dɩ ba vɩamɛ a diene magɛ? Bɛɛ nɛ tɩɩ nɩaa deemba bɩ mɩ laa dii arɩ mɩ sɩ ŋaa wʋkpuŋkperisiŋ arɩ wʋmagɩlaa magɛ ŋɩɩ ba tʋɔŋ? 12Mɩ jaŋ joŋ nyanyal bɔŋŋɔɔ hɛ ba lɛ dɩ ba cheiba, aŋ leŋ dɩ ŋ-na kʋ ŋaa tintee sɩ jaŋ yʋgɛ a kɛŋ doluŋ a kɩɩba.”

13Ŋɩɩ nɛ Mosis bʋla pɩ La TƖƖNA, “Dɩ ŋ nɛ ŋaa ŋɩɩ, Ijipiti tɩŋŋaa jaŋ nɩɩ wɩɩ-la. Ba teeŋ nɛ ŋ joŋ doluŋ laa ŋ nɩaa deemba. 14Ijipiti tɩŋŋaa jaŋ bʋl wɩɩ-la pɩ tinteeŋ deeŋ nɩaa. Ba paala nɩɩ arɩ ŋ-na La TƖƖNA hɛ ŋ nɩaa deemba tʋɔŋ nɛ, ba chaasa naŋ nɛ, ŋ duoŋ-bɩlɩmbaaŋ-la sɩ chugilo tɔ ŋ nɩaa lɛ. Ŋ duoŋ-bɩlɩmbaaŋ-la yie laa ba sɩpaaŋ wɩɩhɛyɛ, tɩtaŋɩŋ ma ʋ nagɛ jebiiŋ sɩ ŋaa nyiniŋ. 15Dɩ ŋ nɛ kpʋ ŋ nɩaa deemba kala bala, tinteye-la sɩ jaŋ nɩɩ wɩɩ-la jaŋ bʋl, 16‘La TƖƖNA bɩ wuo kɛmba mʋ tintee-la ʋ sɩ hɛ niiŋ arɩ ʋ jaŋ joŋo pɩba, aŋ kpʋba ta tintee-hɩlɩŋ lɛ.’

17Lɛɛlɛ La TƖƖNA, mɩɩ sʋlʋŋ, dagɛla ŋ doluŋ arɩ ŋ sɩ bʋl ŋɩɩ. 18Ŋ-na La TƖƖNA baanɩŋ bɩ lɩma lɩma ka sii, ŋ kɛŋ chonuŋ arɩ wʋtɩtɩɩ, a joŋ nɩaa wʋbɔŋŋɔɔ arɩ ba wʋcheelee aa chɛba, a bɩ nɩalɩŋ sɩ ŋaa wɩaa chei ka leŋ pɛɩ. Ŋ yie dɔgɩsɛ nyɩmmaba biiriŋ arɩ ba nihee arɩ ba nihi-lɩɛrɛba a tɩŋ ba nyɩmmaba wʋbɔŋŋɔɔ wɩaa. 19La TƖƖNA, a tɩŋ ŋ sɩ cho nɩaa kɩŋkɛŋ, joŋ nɩaa deemba wʋbɔŋŋɔɔ chɛba arɩ ŋ fa sɩ joŋ ba wʋcheelee chɛba bʋa-la lɛ ba sɩ lɩɩ Ijipiti tinteeŋ lɛ a kaa kɔ jɩnɩŋ.”

20Ŋɩɩ nɛ La TƖƖNA bʋl, “Ŋ sɩ bʋl ŋɩɩ, mɩ joŋo chɛba nɛ. 21Ama a tɩŋ mɩ-na ma TƖƖNA sɩ sɛnɛ hɛ nɩmɛ, mɩ tʋla bɩ dʋnɩa lee-kala buo, 22nɩaa deemba sɩ na mɩ tʋla arɩ wʋmagɩla-la kala mɩ sɩ ŋaa Ijipiti tinteeŋ lɛ arɩ wʋmagɩl-la mɩ sɩ ŋaa tintee-hɩlɩŋ lɛ aŋ vɩa mɩ niiŋ wɩaa aŋ magɩsɛmɛ naansɩɩŋ fii ŋ-la, 23ba kʋbala ma bɩ jaŋ na tintee-la mɩ sɩ hɛ niiŋ arɩ mɩ jaŋ joŋo pɩ ba naabalɩmaba. Nɩalɩŋ sɩ vɩamɛ bɩ jaŋ na tintee-la. 24Ama mɩ tɩntɩnna Kalɩb mɛlɛ bɩ ba naga, ʋ kɛŋ ʋ tʋɔŋ kala nɛ aa tomi. Mɩ jaŋ kɛnʋ mʋ tintee-la ʋ sɩ laa sɩpaaŋ mʋ beŋ. Ʋ doho nɩaa jaŋ tɩɩ tintee-la. 25Amalɛk tɩŋŋaa arɩ Kɛnaŋ tɩŋŋaa sɩ hɔŋ fuonaa-la lɛ ŋɩɩ, chie má mɩɩrɛ harɩŋ a chaasɛ tintee-hɩlɩɩ-la sɩ hɛ wombii-la ba sɩ to a mʋmʋ mʋgʋ-bal-la ba sɩɩ yɩrɛ Mʋgʋ-fɩaŋ.”

26Ŋɩɩ nɛ La TƖƖNA bɩra bʋla pɩ Mosis arɩ Arɔŋ, 27“Ɛɛ nɛ nɩbɔŋŋɔɔ deemba jaŋ gʋrɩmɛ mɩ teeŋ a diene magɛ? Mɩ nɩɩ wɩalɩŋ kala Iziral tɩmma-la sɩ gʋrʋma mɩ teeŋ nɛ.” 28Ŋɩɩ wɩaa bʋla pɩba, “Mɩ-na ma TƖƖNA sɩ hɛ nɩmɛ nɛ bʋla, mɩ jaŋ sɛnɛ ŋaa wɩalɩŋ kala ma sɩ pɩɛsaa chɛ. 29Ma nɩalɩŋ kala sɩ yi jɩsɩŋ mara koo a kɩɩ ŋɩɩ, ba dɩɩsʋ bʋa-la lɛ ba sɩɩ dɩɩsɛ nɩaa, nɩalɩŋ sɩ gʋrɩmɛ wɩaa mɩ teeŋ, ba jaŋ sʋʋ tintee-hɩlɩŋ deeŋ tʋɔŋ. 30Ma kʋbala ma bɩ jaŋ jʋʋ tintee-la mɩ sɩ hɛ niiŋ arɩ mɩ jaŋ joŋo pɩma dɩ ma hɔŋ nɩmɛ, see Jefuni nanʋala Kalɩb arɩ Nuŋ nanʋala Josua. 31Ma biiri-la ma fa sɩ bʋla arɩ ba jaŋ kpʋma aŋ kɛsɛ, mɩ jaŋ kɛmba jʋʋ tintee-la ma sɩ vɩa, dɩ ba-na hɔŋ nɩmɛ, a nɩnɩɩ sɩma. 32Ama ma-na jaŋ sʋʋ tintee-hɩlɩŋ deeŋ lɛ. 33Ma biiriŋ jaŋ ŋaa kʋdaaraa daha jɩsɩŋ mahɩŋ balɩa. Ba jaŋ na hɛɛŋ a tɩŋ ma sɩ bɩ wʋtɩtɩɩ kɛnɛ wɩaa, see dɩ ma kala sʋʋ dɛrɛ tintee-hɩlɩŋ deeŋ lɛ. 34Ma jaŋ na hɛɛŋ jɩsɩŋ mahɩŋ balɩa a tɩŋ ma wʋbɔŋŋɔɔ wɩaa. Tapʋlaa mahɩŋ balɩa-la ma sɩ joŋo a kaa dʋʋra beŋ tintee-la, tapʋl-bala kala ŋaa jɩna nɛ. Dɩ ma nɛ na hɛɛŋ a tɩŋ ma wʋbɔŋŋɔɔ wɩaa, ma jaŋ jɩŋ ŋɩɩ ʋ sɩ naga dɩ mɩ baanɩŋ nɛ sii ma nyuŋ. 35Mɩ-na ma TƖƖNA nɛ bʋla, mɩ jaŋ sɛnɛ ŋaa wɩɩ-la mɩ sɩ bʋla. Nɩbɔŋŋɔɔ deemba sɩ kʋ hɛ dɔŋɔ a gʋrɩmɛ wɩaa mɩ teeŋ, ba kala jaŋ sʋʋ dɛrɛ tintee-hɩlɩŋ deeŋ lɛ.”

36Nɩalɩŋ Mosis fa sɩ tɩma ba mʋ a lʋara beŋ tintee-la, aŋ mɩɩra kɔ a dʋʋra nyɩɛ wɩaa a mʋ tɩgɛ tintee-la lɛ a leŋ Iziral tɩŋŋaa gʋrɩmɛ wɩaa La TƖƖNA teeŋ, 37La TƖƖNA joŋ nyanyal bɔŋ hɛ ba lɛ ba sʋʋ. 38Ba nɩalɩŋ sɩ mʋ lʋara beŋ tintee-la kala tʋɔŋ, Nuŋ nanʋala Josua arɩ Jefuni nanʋala Kalɩb dʋndʋŋa nɛ bɩ sʋba.

39Mosis sɩ bʋl wɩalɩŋ kala La TƖƖNA sɩ bʋla a pɩ Iziral tɩŋŋaa, ba faasa yel. 40Taŋ sɩ pʋla chʋchʋɔ-fɩɛla, ba sii a tʋʋlɛ tintee-la peelee sɩ yʋga a mʋmʋ. Ba sɩ, “Má leŋ dɩ la mʋ tintee-la La TƖƖNA sɩ sɩ ʋ jaŋ joŋo pɩla, la jɩma la ŋaa wʋbɔŋ nɛ.”

41Ŋɩɩ nɛ Mosis bʋl, “Bɛɛ nɛ tɩɩ ma bɩ chɛ dɩ ma to La TƖƖNA niiŋ? Dɩ ma nɩɩ ŋaa ŋɩɩ, ma bɩ jaŋ na wʋzɔŋ. 42Má sɩ́ mʋ, bɛɛ wɩaa La TƖƖNA tuo ma teeŋ, ma dʋndɔŋŋɔɔ jaŋ yuo diima. 43Amalɛk tɩŋŋaa arɩ Kɛnaŋ tɩŋŋaa jaŋ yuoma, bɛɛ wɩaa ma mɩɩrɛ La TƖƖNA harɩŋ nɛ. Ʋ bɩ jaŋ to ma harɩŋ, ŋɩɩ jaŋ leŋ ma dʋndɔŋŋɔɔ yuo diima.”

44Arɩ Mosis sɩ bʋl ŋɩɩ kala, ba bɩ ʋ niiŋ nɩa, aŋ sii jɩl tintee-la peelee sɩ yʋga, ka Mosis arɩ Wɩa niiriŋ daga-la-na hɛ ba dɩhɔnʋŋ. 45Ŋɩɩ nɛ Amalɛk tɩŋŋaa arɩ Kɛnaŋ tɩmma-la sɩ hɔŋ tintee-la lɛ peelee sɩ yʋga sii kʋ tuu a yuo diiba, a kiriba ŋɩɩ a kʋ yi taŋ-la ba sɩɩ yɩrɛ Hɔma.

Currently Selected:

NAMBABA 14: SIS

Highlight

Copy

Compare