NAMBABA 13
13
Ba tɩŋ nɩaa dɩ ba mʋ lʋara beŋ Kɛnaŋ tinteeŋ
1Ŋɩɩ nɛ La TƖƖNA bʋla pɩ Mosis, 2“Iziral doho doho fii arɩ balɩa-la tʋɔŋ, lɩɩsɛ doho na-kala sɩpaalaarɩ-bala, a leŋ dɩ ba mʋ lʋara beŋ Kɛnaŋ tinteeŋ, lee-la mɩ sɩ jaŋ joŋo pɩma.”
3Ŋɩɩ nɛ ba hɔŋ Paraŋ tintee-hɩlɩɩ-la lɛ, ka Mosis tɩŋ Iziral tɩŋŋaa sɩpaalaara-la arɩ La TƖƖNA sɩ dagʋ ŋɩɩ. 4Nɩalɩŋ yɩraa nɛ ŋ-la:
Zaku nanʋala Samʋa, ʋ lɩɩ Rubiŋ doho nɩaa tʋɔŋ nɛ.
5Hɔrɩ nanʋala Safat, ʋ lɩɩ Simioŋ doho nɩaa tʋɔŋ nɛ.
6Jefuni nanʋala Kalɩb, ʋ lɩɩ Juda doho nɩaa tʋɔŋ nɛ.
7Josɛf nanʋala Ɩgal, ʋ lɩɩ Ɩsaka doho nɩaa tʋɔŋ nɛ.
8Nuŋ nanʋala Hosia, ʋ lɩɩ Efirem doho nɩaa tʋɔŋ nɛ.
9Rafʋ nanʋala Palɩtɩ, ʋ lɩɩ Bɛnjamɩŋ doho nɩaa tʋɔŋ nɛ.
10Sodi nanʋala Gadɩɛl, ʋ lɩɩ Zebuluŋ doho nɩaa tʋɔŋ nɛ.
11Susi nanʋala Gadɩ, ʋ lɩɩ Manasɛ doho nɩaa tʋɔŋ nɛ. (Manasɛ arɩ Josɛf ŋaa do-bala nɛ.)
12Gamalɩɛl nanʋala Amɩɛl, ʋ lɩɩ Daŋ doho nɩaa tʋɔŋ nɛ.
13Maakɩl nanʋala Seta, ʋ lɩɩ Asa doho nɩaa tʋɔŋ nɛ.
14Vosi nanʋala Nabɩ, ʋ lɩɩ Nafɩtalɩ doho nɩaa tʋɔŋ nɛ.
15Makɩ nanʋala Geel, ʋ lɩɩ Gad doho nɩaa tʋɔŋ nɛ.
16Nɩalɩŋ Mosis fa sɩ tɩma dɩ ba mʋ lʋara beŋ tintee-la yɩraa nɛ ŋɩɩ. (Nuŋ nanʋala Hosia nɛ Mosis kaa yɩrɛ Josua ŋɩɩ.)
17Mosis sɩ tɩmba dɩ ba mʋ lʋara beŋ Kɛnaŋ tintee-la ŋɩɩ, ʋ bʋla pɩba, “Má mʋ to Nɛgɛf a mʋ tintee-la peelee sɩ yʋga, 18a na ŋɩɩ tintee-la sɩ naga, a na dɩ nɩalɩŋ sɩ hɛ nɩmɛ ŋaa nɩduoru nɛ koo nɩpʋgʋnʋ nɛ, ba ŋaa nɩ-daŋ nɛ koo ba muuro nɛ, 19aŋ pɛ na tintee-la lɛ ba sɩ hɔnɔ, ʋ zɔmɔ nɛ koo ʋ bɩ zɔŋ. Má bee na ba tasɩŋ sɩ nagɛ ŋɩɩ, dɩ ba saa kɛrɩsɩŋ golli nɛ koo ba bɩ saa golli. 20Má beŋ ba tinteeŋ ma a na dɩ ʋ sɩma nɛ koo ʋ bɩ sɩŋ, dɩ ʋ ŋaa lee sɩ kɛŋ tɩɩsɩŋ nɛ koo ʋ bɩ kɛnɛ. Má hɛ doluŋ aŋ pɛ kɛŋ tintee-la tɩɩnɛnɛɛ dɔnsʋŋ kɔ.” (Bʋa-la lɛ dɩ tɩɩnɛnɛ-la ba sɩɩ yɩrɛ girep ka bɩɩ.)
21Ŋɩɩ nɛ ba mʋ, a chɩŋ Zɩŋ tintee-hɩlɩŋ lɛ a beŋ tintee-la ŋɩɩ a mʋ yi lee-la ba sɩɩ yɩrɛ Rehob sɩ kpagɛ Lebo-Hamaf. 22Ba to ŋɩɩ a jɩl Nɛgɛf dɩɩrɩŋ, a joŋ ŋɩɩ mʋ Hɛbʋrɔŋ. Ahɩmaŋ, Sɛsaɩ arɩ Talɩmaɩ ŋaa Anakɩ doho nɩaa nɛ, ba nɛ fa hɛ Hɛbʋrɔŋ lɛ. (Ba saa Hɛbʋrɔŋ taŋ-la jɩsɩŋ balɩpɛ harɩŋ nɛ ka ba-na saa taŋ-la ba sɩɩ yɩrɛ Zʋaŋ sɩ hɛ Ijipiti tinteeŋ lɛ.) 23Ba sɩ mʋ yi fuonaa-la ba sɩɩ yɩrɛ Ɛsɩkɔl, ba keri girep nɛnɛɛ jaga kʋbala. Ba joŋo hɛ daaterige lɛ, ba nɩaa balɩa baasɛ, a pɛ tɩɩnɛnɛɛ dɔnsʋŋ sɩ nagɛ kampoi nɛnɛɛ arɩ tutogi nambɩlaa. 24Iziral tɩŋŋaa sɩ keri girep nɛnɛɛ jaga-la nɛ tɩɩ ba kɛŋ fuonaa-la yɩyɩrɛ Ɛsɩkɔl fuonaaŋ ŋɩɩ. 25Ba joŋ tapʋlaa mahɩŋ balɩa nɛ a beŋ tintee-la dɛrɛ aŋ mɩɩrɛ.
Duoso-la nɩalɩŋ sɩ mʋ lʋara beŋ tintee-la sɩ kaa kɔ
26Ba kɔ Mosis, Arɔŋ arɩ Iziral tɩmma-la kala teeŋ Kɛdɛs sɩ hɛ Paraŋ tintee-hɩlɩŋ lɛ. Ba bʋl wɩalɩŋ kala ba sɩ na lee-la a pɩba aŋ pɛ kɛŋ tintee-la tɩɩnɛnɛ-la ma dagɛba. 27Wɩalɩŋ ba sɩ bʋla pɩ Mosis nɛ ŋ-la, ba sɩ, “La sɩ jʋʋ tintee-la ma sɩ tɩnla dɩ la mʋ lʋara beŋ, wʋtɩtɩɩ, tintee-la sɩma. Ʋ kɛŋ kɩaa nɛ woruŋ, na ʋ kɩaa nɛ ŋ-la. 28Ama nɩalɩŋ sɩ hɛ nɩmɛ dolie, ba tabalaa jalɩa ka ba saa kɛrɩsɩŋ golli ba kala. La paala na Anakɩ doho nɩaa nɩwaayiilee nɩmɛ. 29Amalɛk tɩŋŋaa nɛ hɔŋ Nɛgɛf tinteeŋ lɛ, ka Hiti tɩŋŋaa, Jebus tɩŋŋaa arɩ Amɔrɩ tɩŋŋaa hɔŋ tintee-la peelee sɩ yʋga lɛ, ka Kɛnaŋ tɩŋŋaa ma hɔŋ a kpagɛ mʋgʋ-bal-la ba sɩɩ yɩrɛ Mediterenia arɩ Jɔdaŋ fuo-la niiŋ.”
30Ŋɩɩ nɛ Kalɩb ŋaa nɩalɩŋ kala sɩ bʋl wɩalɩŋ pɩpɩ Mosis tɔrɛ ba niiŋ, ka ʋ bʋl, “Má leŋ dɩ la mʋ a yuo laa tintee-la, la jaŋ wuo yuo laaʋ.”
31Ama ʋ dɩ nɩalɩŋ sɩ to dɔŋɔ mʋ tintee-la ma sɩ, “La bɩ nɩalɩŋ sɩpaaŋ wuo chɩŋ, ba dolie kɩɩla nɛ.” 32Nɩalɩŋ dʋʋra nyɩɛ wɩaa a mʋʋ tɩgɛ tintee-la ba sɩ mʋ lʋara beŋ lɛ, a bʋl, “Tintee-la la sɩ mʋ lʋara beŋ, ʋ bɩ kʋdiilee kɛnɛ woruŋ dɩ ʋ nɩaa dii. Nɩalɩŋ ma la sɩ na nɩmɛ waa nɛ woruŋ. 33La paala na Anakɩ doho nɩaa nɩwaayiilee nɛ nɩmɛ. Anakɩ doho nɩalɩŋ nɛ ba ha yɩyɩrɛ Nefilim. La beŋ la tɩtɩa a nagɛ nyaŋgɩrɩgɛba nɛ ba sɩaa lɛ. Ŋɩɩ tɩtɩa nɛ la sɛnɛ nagɛ ba teeŋ.”
Currently Selected:
NAMBABA 13: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
