NAMBABA 15

Wɩɩsʋlʋŋ kɩaa dɔnsʋŋ

1Ŋɩɩ nɛ La TƖƖNA bʋla pɩ Mosis, 2“Bʋla pɩ Iziral tɩŋŋaa: Dɩ ma nɛ jʋʋ tintee-la mɩ sɩ jaŋ joŋo pɩma dɩ ʋ ŋaa ma kʋŋ, 3dɩ ma nɛ kɛŋ nɛŋ koo piese kɔ dɩ ma ŋaa Wɩɩsʋlʋŋ a nyɩgɛ dɩ ʋ sʋɔra sɩŋ a pɩ mɩ-na ma TƖƖNA, dɩ ʋ nɛ ŋaa kʋnyɩgaa Wɩɩsʋlʋŋ koo dɩ pʋna nɛ ma kpʋ aa sʋl, dɩ niiŋ nɛ maa chɛ ma lɩɩsɛ koo dɩ tʋɔtɔrɛ Wɩɩsʋlʋŋ nɛ, koo dɩ gbiele Wɩɩsʋlʋŋ nɛ, 4nɩɩ-la sɩ kɛŋ ʋ Wɩɩsʋlɩɩ-la kɔ jaŋ kɛŋ mɩaa Wɩɩsʋlʋŋ munuŋ sɩ bɩɩ nʋgʋgʋ gbaŋa kpaa magɛ dɔŋɔ ba sɩ hɛ nʋʋŋ loŋ arɩ kpaa magɛ dɔŋɔ. 5Kʋnyɩgaa Wɩɩsʋlɩɩ na-kala ŋ sɩ kɛŋ pie-bie sʋl koo pʋna kala ŋ sɩ kpʋa a pɩ Wɩa, ŋ jaŋ kɛŋ tɩɩnɛnɛɛ sɩnɩŋ loŋ arɩ kpaa magɛ dɔŋɔ kʋ sʋl kʋnyʋalaa Wɩɩsʋlʋŋ. 6Dɩ pie-bele nɛ, ŋ jaŋ kɛŋ mɩaa Wɩɩsʋlʋŋ munuŋ sɩ bɩɩ nʋgʋgʋ gbaŋa a joŋ nʋʋŋ lonnuŋ balɩa a hɛ, 7arɩ tɩɩnɛnɛɛ sɩnɩŋ mʋa tuo lonnuŋ balɩa, a sʋl kʋnyʋalaa Wɩɩsʋlʋŋ. Ba sʋɔra sɩma nɛ a pɩ mɩ-na ma TƖƖNA.

8Dɩ nɛ-bel-pɔrʋŋ nɛ ŋ kpʋ dɩ ŋ kaa sʋl kʋnyɩgaa Wɩɩsʋlʋŋ, koo dɩ ŋ kpʋa dɩ ŋ sʋl Wɩɩsʋlɩɩ dɔŋ nɛ, koo dɩ niiŋ nɛ ŋ chɛ dɩ ŋ lɩɩsɛ koo dɩ nii-magɛ dɔŋɔ Wɩɩsʋlʋŋ nɛ ŋ chɛ dɩ ŋ ŋaa a pɩ mɩ-na ma TƖƖNA, 9pɛ kɛŋ mɩaa Wɩɩsʋlʋŋ munuŋ sɩ bɩɩ nʋgʋgʋ gbaŋa arɩ kpaa magɛ dɔŋɔ a joŋ nʋʋŋ lonnuŋ batori a hɛ. 10Pɛ kɛŋ tɩɩnɛnɛɛ sɩnɩŋ lonnuŋ batori ma kʋ sʋl kʋnyʋalaa Wɩɩsʋlʋŋ. Ŋ jaŋ nyɩgɛ kɩaa deemba a pɩ mɩ-na ma TƖƖNA. Ba sʋɔra sɩma nɛ a pɩmɛ. 11Ŋɩɩ nɛ maga dɩ ma ŋaa nɛ-bel-pɔrʋŋ lɛ, koo pie-bie, koo pie-bele koo bʋ-bie lɛ. 12Dɩ ma nɛ kɛŋ ma pʋsʋŋ magɛ ŋɩɩ kala kɔ dɩ ma sʋl Wɩɩsʋlʋŋ, ŋɩɩ tɩtɩa nɛ maga dɩ ma ŋaa ba lɛ.

13Nʋʋ na-kala sɩ ŋaa Iziral tɩɩna maga dɩ ʋ to wombii-la nɛ, dɩ ʋ nɛ kɛŋ Wɩɩsʋlʋŋ kɩaa kɔ dɩ ʋ nyɩgɛ dɩ ba sʋɔra sɩŋ a pɩ mɩ-na ma TƖƖNA. 14Ma doho kala tʋɔŋ a kaa mʋ, dɩ nʋhʋɔrʋ koo dɩ nʋʋ dɔŋ kala nɛ hɛ ma tʋɔŋ, a kɛŋ ʋ Wɩɩsʋlʋŋ kɩaa kɔ dɩ ʋ nyɩgɛ dɩ ba sʋɔra sɩŋ a pɩ mɩ-na ma TƖƖNA, ʋ maga dɩ ʋ ŋaa ŋɩɩ tɩtɩa ma sɩɩ ŋaa nɛ. 15Ma dɩ nʋhʋɔra-la kala sɩ hɛ ma tʋɔŋ maga dɩ ma kala kɛŋ wombii-bala nɛ a tɩtɩŋ. Ʋ ŋaa nii sɩ bɩ jaŋ dɛrɛ nɛ, a pɩ ma dɩ ma doho nɩaa kala. Ma dɩ nʋhʋɔra-la sɩ hɛ ma tʋɔŋ kala ŋaa kʋbala nɛ mɩ-na ma TƖƖNA sɩpaaŋ. 16Niiri-la arɩ wombie-la kala ma sɩ jaŋ tuto tɩtɩa nɛ nʋhʋɔra-la sɩ hɛ ma tʋɔŋ ma jaŋ tuto.” 17La TƖƖNA bɩra bʋla pɩ Mosis, 18“Bʋla pɩ Iziral tɩŋŋaa, dɩ ba nɛ jʋʋ tintee-la mɩ sɩ jaŋ kɛmma mʋ, 19dɩ ma kʋdiilee nɛ wasa tintee-la lɛ dɩ ma didii, má lɩɩsɛ dɔnsʋŋ dɩ ba ŋaa mɩ-na ma TƖƖNA kɩaa, dɩ ma kaa kʋ ŋaa Wɩɩsʋlʋŋ pɩmɛ. 20Má kɛŋ tintee-la kʋdii falaa wasɛ boroboro a kaa kʋ ŋaa Wɩɩsʋlʋŋ pɩmɛ, a nagɛ ma sɩ yie ŋmoo ma mɩaa a ŋaa ŋɩɩ. 21Ma doho kala lɛ a kaa mʋ, má joŋ tintee-la kʋdii falaa a ŋaa Wɩɩsʋlʋŋ pɩpɩ mɩ-na ma TƖƖNA.

Dɩ nʋʋ nɛ bɩ jɩŋ aŋ ŋaa wʋbɔŋ, kɩalɩŋ ʋ sɩ jaŋ kaa kʋ ŋaa Wɩɩsʋlʋŋ

22Dɩ ma nɛ perige wɩaa deemba kʋŋkala lɛ mɩ-na ma TƖƖNA sɩ to Mosis lɛ a dagɛ, 23a chɩŋ tapʋlɩɩ-la mɩ-na ma TƖƖNA sɩ to ʋ lɛ a dagɛ wɩalɩŋ pɩma, ʋ maga ma dɩ ma doho nɩaa kala kɛmba tɩtɩŋ nɛ. 24Dɩ ma nɛ perige wɩaa deemba kʋŋkala lɛ, ʋ maga dɩ ma kɛŋ nɛ-bel-pɔrʋŋ a kʋ sʋl kʋnyɩgaa Wɩɩsʋlʋŋ, ba sʋɔra sɩma nɛ a pɩ ma TƖƖNA, arɩ ʋ mɩaa Wɩɩsʋlʋŋ arɩ ʋ kʋnyʋalaa Wɩɩsʋlʋŋ, a kɛŋ gbuŋgbogo a sʋl wʋbɔŋŋɔɔ joŋo chɛnɩŋ Wɩɩsʋlʋŋ, arɩ mɩ sɩ dagɛ ma ŋɩɩ. 25Wɩɩsʋllɩ sɩpaalaara jaŋ pɩɩsɛ ma Iziral tɩŋŋaa kala disiniŋ ta, dɩ mɩ joŋo chɛma, bɛɛ wɩaa ma bɩ jɩŋ aŋ ŋaa wɩɩ-la aŋ kɛŋ ma kʋnyɩgaa Wɩɩsʋlʋŋ arɩ wʋbɔŋŋɔɔ joŋo chɛnɩŋ Wɩɩsʋlʋŋ kɩaa kɔ dɩ ma pɩ mɩ-na ma TƖƖNA a tɩŋ wɩɩ-la ma sɩ ŋaa chei. 26Mɩ-na ma TƖƖNA jaŋ joŋ Iziral tɩŋŋaa arɩ nʋhʋɔra-la kala sɩ hɛ ma tʋɔŋ wʋbɔŋŋɔɔ chɛma, bɛɛ wɩaa nɩalɩŋ kala pɛ laa cheeriŋ nɛ wɩɩ-la lɛ.

27Ama dɩ nɩbala nɛ bɩ jɩŋ aŋ ŋaa wɩalɩŋ kʋŋ chei, ʋ maga dɩ ʋ kɛŋ bʋ-keeŋ sɩ yi jɩna a kʋ sʋl wʋbɔŋŋɔɔ joŋo chɛnɩŋ Wɩɩsʋlʋŋ. 28Wɩɩsʋllɩ sɩpaalaara jaŋ pɩɩsɛ nɩɩ-la sɩ bɩ jɩŋ aŋ ŋaa wɩɩ-la chei disiniŋ ta mɩ sɩpaaŋ dɩ mɩ joŋo chɛʋ. 29Dɩ Iziral tɩɩna koo dɩ nʋhʋɔra-la sɩ hɛ ma tʋɔŋ kʋŋ nɛ bɩ jɩŋ aŋ ŋaa wɩalɩŋ kʋŋ chei, wombii-bala-la nɛ maga ma kala to.

30Dɩ Iziral tɩɩna koo dɩ nʋhʋɔra-la kʋŋ nɛ sɛnɛ aŋ chei wɩalɩŋ kʋŋ, ʋ chei mɩ-na ma TƖƖNA yɩrɩŋ nɛ. Ʋ maga dɩ ma keri tɩɩna ta ʋ nɩaa tʋɔŋ, 31bɛɛ wɩaa ʋ gʋʋnɛ mɩ-na ma TƖƖNA wʋbʋlaa nɛ aŋ chei wɩalɩŋ mɩ sɩ daga. Má chaasa keri tɩɩna ta ʋ nɩaa tʋɔŋ, ʋ wʋbɔŋ-la jaŋ nyʋa ʋ nyuŋ lɛ.”

Ba kpʋ baal-la sɩ chei chɛ-wiesii-la wombiiŋ

32Bʋa-la lɛ Iziral tɩŋŋaa sɩ hɛ tintee-hɩlɩɩ-la lɛ, ba kɛŋ baal kʋbala dɩ ʋʋ jaa daasɩŋ chɛ-wiesii-la chɛɛŋ. 33Nɩalɩŋ sɩ naʋ kɛnʋ kaa mʋ Mosis arɩ Arɔŋ arɩ Iziral tɩŋŋaa kala teeŋ. 34Ba kɛnʋ tɔ hɛ dɩa lɛ, bɛɛ wɩaa bʋa-la lɛ ba ha bɩ jɩŋ wɩɩ-la ba sɩ jaŋ ŋaa ʋ lɛ. 35Ŋɩɩ nɛ La TƖƖNA bʋla pɩ Mosis, “Baal-la maga dɩ ma kpʋʋ. Iziral tɩŋŋaa kala maga dɩ ba kɛnʋ lɩɩ ba dɩhɔnʋŋ lɛ a yagʋ kpʋ arɩ tabɩaa.” 36Ŋɩɩ nɛ Iziral tɩŋŋaa kala kɛnʋ lɩɩ ba dɩhɔnʋŋ lɛ a yagʋ kpʋ arɩ tabɩaa, arɩ La TƖƖNA sɩ dagɛ Mosis ŋɩɩ.

Iziral tɩŋŋaa yɛrɛ jʋɔsaa hɛ ba gɛnnɩŋ niipinee lɛ

37La TƖƖNA bɩra bʋla pɩ Mosis, 38“Bʋla pɩ Iziral tɩŋŋaa, ‘Ma doho kala lɛ a kaa mʋ, má kɛŋ ŋmɛŋ-diibelimbine a yɛrɛ jʋɔsaa a hɛ ma gɛnnɩŋ niipinee lɛ. 39Jʋɔsaa deemba nɛ jaŋ liliisima wɩalɩŋ kala mɩ-na ma TƖƖNA sɩ daga, dɩ ma toba aŋ sɩ́ wʋlɩɩlɩŋ arɩ ma tɩtɩa yaraa wʋchɛɛlɛɛ harɩŋ to. 40Dɩ jʋɔsaa deemba nɛ hɛ ma gɛnnɩŋ niipinee lɛ a liliisima wɩalɩŋ mɩ sɩ dagɛma dɩ ma tutoba, ma jaŋ ŋaa tʋɔpʋl tɩmma a ŋaa mɩ nɩaa. 41Mɩ nɛ ma TƖƖNA Wɩa sɩ kɛmma lɩɩ Ijipiti tinteeŋ lɛ dɩ mɩ ŋaa ma Wɩa. Mɩ nɛ ma TƖƖNA Wɩa.’ ”

Currently Selected:

NAMBABA 15: SIS

Highlight

Copy

Compare