Galiisia Nɩaa 4

1Wɩɩ-la mɩ sɩɩ chɛ mɩ bʋl nɛ ŋ-la: Dɩ bie nɛ muuro aŋ dii ʋ nyɩmma dʋa, ba yie ŋɩŋaa wɩaa bile lɛ arɩ ʋ ŋaa yoŋ nɛ, ka ʋ nɛ paala tɩɩ kɩalɩŋ kala ma. 2Nɩaa nɛ yie bibenu a dɩdagʋ wɩaa deeŋ deeŋ, ʋ kʋ waa a mʋ yi bʋa-la lɛ ʋ nyɩmma sɩ daga. 3Ŋɩɩ nɛ la ma fa nagɛ. La fa sɩ bɩ Yesu laa dii, dʋnɩa wʋkɛnɛɛ harɩŋ nɛ la fa tuto. 4Ama bʋa-la tɩtɩa sɩ yie, Wɩa tɩŋ ʋ bie nɛ. Haal nɛ lʋlʋ. Ʋ ma faa to Juu tɩŋŋaa naabalɩmaba wombii-la nɛ, 5dɩ ʋ wuo laa nɩalɩŋ fa sɩɩ to Juu tɩŋŋaa wombii-la a ta, dɩ ba dɩ la kala wuo ŋaa Wɩa biiriŋ. 6A tɩŋ la sɩ ŋaa Wɩa biiriŋ nɛ tɩɩ ʋ joŋ ʋ Bie Dɩŋ-zɔmʋŋ hɛ la lɛ. Dɩŋ-zɔŋ-la sɩ hɛ la tʋɔŋ, ʋ yie ŋaa la kɛŋ Wɩa kaa yɩrɛ “La Nyɩmma.” 7Ŋɩɩ wɩaa ma kʋŋkala bɩra bɩ yoŋ ŋaa. Ma ŋaa Wɩa biiriŋ nɛ. Ma saa sɩ ŋaa ʋ biiriŋ ŋɩɩ, Wɩa jaŋ leŋ dɩ ma dii ʋ dʋa.

Pɔɔl sɩ chɩl Galiisia nɩaa wɩaa ŋɩɩ

8Faafaa-la, ma sɩ bɩ Wɩa jɩŋ, ma faa to vʋɩyaa nɛ a ŋaa ba yosi. 9Ama lɛɛlɛ ma sɩ jɩŋ Wɩa ŋɩɩ, koo mɩ jaŋ bʋl Wɩa sɩ jɩmma ŋɩɩ, bɛɛ nɛ saa tɩɩ ma cho dɩ ma mɩɩrɛ harɩŋ a mʋ tuto dʋnɩa wʋkɛnɛɛ, wɩalɩŋ sɩ bɩ doluŋ kɛnɛ dɩ ba laama ta? Bɛɛ nɛ tɩɩ ma saa cho dɩ ma bɩra tutoba a bɩrɩmɛ ba yosuŋ? 10Ma yie gbigbieli tapʋlaa gbiele, chɛnsɩŋ gbiele, kɩaa duunuŋ arɩ kɩaa ŋaanɩŋ bʋa lɛ gbiele arɩ jɩsɩŋ gbiele. 11Ma leŋe fawʋllʋŋ kɛmmɛ nɛ arɩ tɩntɩmɩɩ-la mɩ sɩ tɩma ma teeŋ ŋaa pɛɩ nɛ.

12Mɩ naambiiriŋ, mɩɩ sʋlma, má nagɛmɛ. Mɩ sɩ nagɛma ŋɩɩ, má ma nagɛmɛ. Ma bɩ wɩɩkala ŋaa cheimi. 13Ma jɩma, bumbuŋ-la mɩ sɩ bʋl Wɩa wʋzɔmɔ-la pɩpɩma, mɩ faa wɩɩlɛ nɛ. 14Mɩ fa sɩɩ wɩɩlʋ ŋɩɩ walɩmɛ ma nɛ, ama ma bɩ mɩ kaa gbesi koo a vɩamɛ ta. Ma kɛmmɛ woruŋ nɛ a nagɛ dɩ mɩ ŋaa Wɩa tɩndaarʋ nɛ. Ma kɛmmɛ woruŋ nɛ a nagɛ dɩ mɩ ŋaa Yesu Kirisito tɩtɩa nɛ. 15Ma sɩ sɛɩ Wɩa wʋzɔmɔ-la, ma tʋɔŋ tɔrɔ nɛ woruŋ. Nɩɩ nɛ ma tʋɔtɔrʋ-la mʋ? Mɩ tɩtɩa jaŋ wuo bʋl wɩɩŋ deeŋ. Dɩ ma nɛ fa wuolo, ma fa jaŋ paala wuo chaarɛ ma sɩaa ma a pɩmɛ. 16Mɩ lɛɛlɛ ŋaa ma dʋndɔŋ nɛ, a tɩŋ mɩ sɩ bʋl wʋtɩtɩɩ-la pɩmaa? 17Nɩalɩŋ sɩɩ dagɛ Juu tɩŋŋaa wombii-la fogo dɩdagɛ arɩ ba tʋɔŋ wɩɩ ma lɛ nɛ woruŋ, ama ba tʋɔbɩɩnaa bɩ zɔŋ. Ba tʋɔbɩɩnaa kala nɛ dɩ ba kɛŋ mɩ dɩ ma pɔrɛ dɔŋɔ lɛ, dɩ ma tʋɔŋ wɩɩ ba lɛ. 18Ʋ ŋaa wʋzɔŋ nɛ dɩ la tʋɔŋ nɩɩ wɩɩ dɔŋɔ lɛ dɩ mɩ nɛ hɛ ma teeŋ koo lee na-kala, ama ʋ maga dɩ ba ŋaa tʋɔ-wɩɩ-zɔmɔ nɛ. 19Mɩ bii chooloo, ma wɩaa ka wɩɩmɛ nɛ woruŋ, a nagɛ haala sɩɩ chɛ dɩ ʋ lʋl ʋ luoruŋ wʋwɩɩ ŋɩɩ. Ma wɩaa jaŋ wɩwɩɩmɛ ŋɩɩ halɩɩ, see dɩ ma bɩrɩma a nagɛ Kirisito sɩ nagɛ ŋɩɩ. 20Mɩ fa cho dɩ mɩ hɛ ma teeŋ nɛ lɛɛlɛ, a wuo jɩŋ wɩɩ-la mɩ sɩ jaŋ bʋl nʋʋkala teeŋ. Ma wɩaa walɩmɛmɛ nɛ woruŋ.

Pɔɔl bʋl Haga arɩ Saara wɩaa

21Ma nɩalɩŋ sɩ cho dɩ ma haa to wɩalɩŋ Mosis sɩ bile, má leŋ dɩ mɩ pɩɛsɛma na, ma bɩ ba bʋbʋɔŋ jɩŋ? 22Wɩa teniŋ tʋɔŋ ba bʋla arɩ Abɩraham fa lʋl hambolibiisiŋ balɩa nɛ, dɔŋɔ ŋaa ʋ haala tɩtɩa bie, ka dɔŋɔ ma fa ŋaa ʋ haal-la sɩ ŋaa yomo bii. 23Abɩraham haal-la sɩ ŋaa yomo a lʋl bile, nuhuobiine wombiiŋ lɛ nɛ ba to a lʋlʋ. Ama Bile Abɩraham haala tɩtɩa sɩ lʋla, Wɩa nɛ hɛ niiŋ ba lʋlʋ. 24Ba kɛŋ wɩɩŋ deeŋ kaa magɩsɛ arɩ haalaa deemba balɩa ŋaa niiriŋ balɩa nɛ Wɩa sɩ bile ʋ dɩ ʋ nɩaa pɛgɛ. Haga nɛ chɩŋ nii-la Wɩa sɩ hɛ peel-la ba sɩɩ yɩrɛ Sɩnaɩ nyuŋ, ʋ biiriŋ ŋaa yosi nɛ. 25Haga nɛ chɩŋ nii-la Wɩa sɩ hɛ Sɩnaɩ peel-la nyuŋ, a hɛ Arebia tinteeŋ lɛ. Ʋ nɛ bɩra chɩŋ jɩnɩŋ tabal-la ba sɩ kaa yɩrɛ Jerusalɛm nyuŋ, ʋ dɩ ʋ biiriŋ kala ŋaa yosi nɛ. 26Ama Jerusalɛm dɔŋɔ nɛ hɛ Wɩa-jaŋ lɛ a tɩɩ ʋ tɩtɩa. Ʋ nɛ ŋaa la naaŋ. 27Wɩa teniŋ tʋɔŋ ba sɩ,

“Hapɩrɩŋ, jʋjʋɔsɛ.

Ŋ-na nɩɩ-la sɩ bɩ bii lʋla.

Faasa ŋaa goŋ arɩ tʋɔtɔrʋŋ,

ŋ-na nɩɩ-la ha sɩ bɩ halʋllɩ luoruŋ wɩɩ na

bɛɛ wɩaa ha-vɩa taalɩŋ jaŋ lʋl biiriŋ yʋgɛ

a kɩɩ haal-la sɩ kɛŋ bala.”

28Mɩ naambiiriŋ, Wɩa fa sɩ hɛ niiŋ ba lʋl Aɩzɩk ŋɩɩ, ŋɩɩ tɩtɩa nɛ Wɩa hɛ niiŋ la ma ŋaa ʋ biiriŋ. 29Abɩraham biiri-la balɩa tʋɔŋ, kʋ-la ba sɩ to nuhuobiine wombiiŋ a lʋl dɔgɩsɛ bile ba sɩ lʋla Wɩa doluŋ lɛ nɛ. Ŋɩɩ tɩtɩa nɛ ba dʋdɔgɩsɛ la ma lɛɛlɛ. 30Bɛɛ nɛ ba bʋl Wɩa teniŋ tʋɔŋ? Ba sɩ, “Kiri yoŋ-la arɩ ʋ bie ta, bɛɛ wɩaa haal-la sɩ ŋaa yomo bie bɩ jaŋ wuo pɛ haal-la sɩ tɩɩ ʋ tɩtɩa bie lɛ dɩ ba dii ba nyɩmma dʋa.” 31Ŋɩɩ wɩaa mɩ naambiiriŋ, la bɩ hayoŋ-la biiriŋ ŋaa. La ŋaa haal-la sɩ tɩɩ ʋ tɩtɩa biiriŋ nɛ.

Currently Selected:

Galiisia Nɩaa 4: SIS

Highlight

Copy

Compare