Galiisia Nɩaa 3

Wɩa laa diiniŋ koo wɩalɩŋ Mosis sɩ bile

1Ma-na Galiisia nɩyaara! Kʋbɛɛ nɛ bugumima? La sɩ kɔ ma teeŋ, mɩ dagɛma woruŋ ŋɩɩ Yesu sɩ sʋʋ daagɛsɛ nyuŋ, ma jɩŋ ʋ bʋbʋɔŋ. 2Má leŋ dɩ mɩ pɩɛsɛma wɩɩŋ deeŋ: Wɩa sɩ joŋ ʋ Dɩŋ-zɔmʋŋ dii zile ma lɛ, ʋ ŋaa ŋɩɩ a tɩŋ ma sɩɩ to wɩalɩŋ Mosis fa sɩ bile dɩ nɩaa tuto nɛ, koo a tɩŋ ma sɩ nɩɩ Wɩa wʋzɔmɔ-la a laaba dii nɛ tɩɩ? 3Bɛɛ nɛ tɩɩ ma yaarɛ kɩŋkɛŋ ŋ-la? Wɩa Dɩŋ-zɔŋ-la lɛ nɛ ma suomi a kɛŋ mɩɩsɩŋ deeŋ Kirisito lɛ. Ma saa chɛ dɩ ma na ʋ dɩdɛrɩŋ nɛ ma tɩtɩa doluŋ lɛɛ? 4Hɛɛ-la kɩŋkɛŋ ma sɩ na ŋaa pɛɩ nɛ ma teeŋ koo? Aɩ, mɩ bɩɩna ʋ bɩ pɛɩ wuo ŋaa. 5Wɩa joŋ ʋ Dɩŋ-zɔŋ-la a dii zile ma lɛ, aŋ pɛ ŋɩŋaa wʋkpuŋkperisiŋ ma teeŋ. Ma bɩɩna ma sɩɩ to wɩalɩŋ Mosis sɩ bile nɛ tɩɩ ʋ wuo ŋɩŋaa ŋɩɩ, koo ma sɩ nɩɩ Wɩa wʋzɔmɔ-la a laaba dii nɛ tɩɩ?

6Má liisi Abɩraham wɩaa. Wɩa teniŋ tʋɔŋ ba sɩ, “Ʋ laa Wɩa wɩaa dii nɛ, ŋɩɩ nɛ tɩɩ Wɩa leŋ ʋ ŋaa tʋɔpʋla tɩɩna ʋ teeŋ.” 7Ŋɩɩ wɩaa, ma jɩŋ arɩ nɩalɩŋ kala sɩ laa Wɩa wɩaa dii ŋaa Abɩraham biiriŋ nɛ. 8Wɩɩŋ deeŋ hɛ Wɩa teniŋ tʋɔŋ faafaa kala nɛ arɩ nɩalɩŋ sɩ bɩ Juu tɩŋŋaa ŋaa, dɩ ba nɛ laa Wɩa dii, ʋ jaŋ leŋ dɩ ba ma kɛŋ tʋɔpʋla. Faafaa kala nɛ Wɩa bʋl wʋzɔmʋŋ deeŋ a pɩ Abɩraham, “Ŋ lɛ nɛ mɩ jaŋ to a pɛ dʋnɩa nɩaa kala lɛ.” 9Abɩraham nɩɩ wɩɩŋ deeŋ nɛ a laa dii. Ŋɩɩ nɛ Wɩa pɛ ʋ lɛ. Nɩalɩŋ ma kala sɩ laa wɩɩŋ deeŋ dii, Wɩa pɛ ba ma lɛ nɛ arɩ ʋ sɩ pɛ Abɩraham lɛ ŋɩɩ.

10Nɩalɩŋ sɩɩ chɛ dɩ ba to wɩalɩŋ Mosis sɩ bile lɛ a kɛŋ tʋɔpʋla, Wɩa ŋmɩɛsa hɛ ba lɛ nɛ, bɛɛ wɩaa Wɩa teniŋ tʋɔŋ ba bʋla arɩ nɩɩ-la kala sɩ bɩ wɩalɩŋ kala Mosis sɩ ŋmʋnsa bil ka to, Wɩa ŋmɩɛsa hɛ ʋ lɛ nɛ. 11Ama lɛɛlɛ Wɩa chaasa dagɛ arɩ nɩɩ-la kala sɩɩ to wɩalɩŋ Mosis sɩ ŋmʋnsa bil bɩ jaŋ wuo kɛŋ tʋɔpʋla ʋ sɩpaaŋ, bɛɛ wɩaa Wɩa teniŋ tʋɔŋ ba bʋla, “Tʋɔpʋl tɩŋŋaa jaŋ kɛŋ mɩɩsɩŋ a tɩŋ ba sɩ laa Wɩa dii.” 12Yarɩda dee ba kaa tuto wɩalɩŋ Mosis sɩ ŋmʋnsa bil dɩ nɩaa tuto. Ba bʋl ŋɩɩ nɛ Wɩa teniŋ tʋɔŋ. Ba sɩ, “Dɩ nʋʋ nɛ to wɩalɩŋ kala Mosis sɩ ŋmʋnsa bil, ʋ jaŋ kɛŋ mɩɩsɩŋ.” 13Ama Wɩa sɩ ŋmɩɛsa hɛ nɩalɩŋ sɩ nɩɩ wɩalɩŋ Mosis sɩ ŋmʋnsa bil aŋ bɩ ba wuo tuto, Kirisito lɩɩsɛla wɩaa deemba lɛ nɛ. Ba kpaasʋ mɛrɛ daagɛsɛ nyuŋ nɛ. Ba sɩ ŋaa ŋɩɩ, Wɩa ŋmɩɛsa hɛ ʋ lɛ a tɩŋ la wɩaa, bɛɛ wɩaa ba ŋmʋnsɛ Wɩa teniŋ tʋɔŋ a bʋl, “Nɩɩ-la kala ba sɩ kpaasa mɛrɛ daaŋ nyuŋ, Wɩa ŋmɩɛsa hɛ ʋ lɛ nɛ.” 14Kirisito ŋaa wɩɩŋ deeŋ pɩ nɩalɩŋ sɩ bɩ Juu tɩŋŋaa ŋaa dɩ ba wuo to ʋ lɛ a na pɛnɛ-la Wɩa sɩ hɛ niiŋ pɩ Abɩraham arɩ ʋ jaŋ joŋo pɩba. Dɩ la nɛ laa Kirisito wɩaa dii, ʋ Dɩŋ-zɔŋ-la ʋ sɩ hɛ niiŋ arɩ ʋ jaŋ joŋo pɩla, la jaŋ wuo laa.

Mosis nii-la bɩ wɩalɩŋ Wɩa fa sɩ bʋla pɩ Abɩraham wuo chei

15Mɩ naambiiriŋ, wʋmagɩsɩɩ nɛ mɩɩ chɛ dɩ mɩ magɩsɛ. Dɩ nɩaa balɩa nɛ vʋʋra dɩ ba ŋaa wɩɩ a ŋmɩɛsa pɩ dɔŋɔ, nʋʋkala bɩ jaŋ wuo chei wɩɩ-la koo a ŋaa wɩɩ pɛ wɩalɩŋ ba sɩ vʋʋra bil lɛ. 16Wɩa ma hɛ niiŋ nɛ a pɩ Abɩraham arɩ ʋ doho nʋʋ. Ʋ bɩ ʋ doho nɩaa kala daga. Nɩbala nɛ ʋ dagɛ. Nɩɩ-la ʋ sɩ daga nɛ ŋaa Kirisito. 17Wɩɩ-la mɩ sɩ bʋla nɛ ŋ-la: Wɩa sɩ hɛ nii-la a pɩ Abɩraham, ʋ ŋaa jɩsɩŋ zɔɔ-banɛsɛ arɩ mara arɩ fii nɛ, aŋ ka Mosis-na bil wɩalɩŋ dɩ nɩaa tuto. Ŋɩɩ wɩaa Mosis sɩ bil wɩalɩŋ bɩ jaŋ wuo chei nii-la Wɩa sɩ laa sɩpaaŋ hɛ. 18Kʋ-la Wɩa sɩ sɩ ʋ jaŋ joŋo pɩ Abɩraham, ʋ bɩ wɩalɩŋ Mosis sɩ bile lɛ lɩa. Dɩ ʋ nɛ lɩɩ wɩalɩŋ Mosis sɩ bile lɛ, ʋ naga arɩ Wɩa bɩ ʋ niiŋ hɛ pɩ Abɩraham. Ama Wɩa sɩ hɛ niiŋ pɩ Abɩraham nɛ tɩɩ ʋ joŋ kʋ-la pʋ.

19Ŋɩɩ-na saa wɩalɩŋ Mosis sɩ bile dɩ nɩaa tuto bʋbʋɔŋ nɛ bɛɛ? Mosis sɩ bil wɩalɩŋ dɩ nɩaa tuto pɛ dagɛ ŋɩɩ wʋbɔmʋŋ sɩ naga nɛ. Wɩalɩŋ hɛ nɩmɛ ŋɩɩ a mʋ yi bʋa-la lɛ Abɩraham doho nɩɩ-la sɩ kɔ. Ʋ lɛ nɛ Wɩa sɩ ʋ jaŋ to a pɛ nɩaa lɛ. Wɩalɩŋ Mosis fa sɩ bile, Wɩa tɩndaaraa nɛ kaa kʋ tuu pʋ. Mosis nɛ saa ŋaa Wɩa arɩ nɩaa sɩpaa-tooro ŋɩɩ. 20Nɩaa balɩa nɛ yie ŋɩŋaa wɩɩ a kɛŋ sɩpaa-tooro. Ama Wɩa ŋaa kʋbala nɛ.

Wɩɩ-la sɩ tɩɩ Mosis bil nii-la pɩla

21Wɩalɩŋ Mosis sɩ bile, ba saa kɛŋ wɩalɩŋ Wɩa sɩ sɩ ʋ jaŋ ŋaa pɩ Abɩraham chei nɛɛ? Aɩ, dɩ wɩalɩŋ Mosis sɩ bile nɛ faa pɩ nɩaa mɩɩsɩŋ, ŋɩɩ-na ʋ fa maga dɩ nɩalɩŋ sɩɩ toba kɛŋ tʋɔpʋla nɛ. 22Ama Wɩa teniŋ tʋɔŋ ba bʋla arɩ dʋnɩa nɩaa kala ŋaa wʋbɔŋŋɔɔ yosi nɛ. Wɩa bʋl ŋɩɩ dɩ ʋ wuo joŋ kʋ-la wɩaa ʋ fa sɩ bʋla a pɩ nɩalɩŋ sɩ laa Yesu wɩaa dii nɛ, a tɩŋ ba sɩ laa Wɩa dii.

23Ka dɩ bʋa-la-na yi dɩ la wuo laa Yesu Kirisito dii, wɩalɩŋ Mosis fa sɩ bile nyagɛla bil nɛ ka Yesu-na kɔ. 24Ŋɩɩ wɩaa wɩalɩŋ Mosis fa sɩ bile nɛ faa pɔla, a kʋ yi bʋa-la lɛ Kirisito sɩ kɔ, dɩ la wuo laaʋ dii a kɛŋ tʋɔpʋla Wɩa sɩpaaŋ. 25Lɛɛlɛ Kirisito sɩ kɔ ŋɩɩ, wɩalɩŋ Mosis fa sɩ bile bɩra dee bɩ laa pɔ. 26A tɩŋ ma sɩ laa Yesu Kirisito dii nɛ tɩɩ ma kala ŋaa Wɩa biiriŋ ŋɩɩ. 27Ma nɩalɩŋ kala ba sɩ fo Wɩɩchʋɔlɛ lɩɩŋ Kirisito yɩrɩŋ lɛ, ma kala nagɛ Kirisito nɛ. 28Lɛɛlɛ, la bɩra bɩ nɩaa kaa pʋpɔrɛ. Dɩ ŋ ŋaa Juu tɩɩna koo dɩ ŋ bɩ ŋaa, dɩ ŋ ŋaa yoŋ koo dɩ ŋ tɩɩ ŋ tɩtɩa, dɩ ŋ ŋaa haal koo baal, ma kala ŋaa kʋbala nɛ Kirisito Yesu teeŋ. 29Dɩ ma dɩ Kirisito nɛ ŋaa kʋbala, ŋɩɩ-na ma ŋaa Abɩraham doho nɩaa nɛ. Wɩa sɩ sɩ ʋ jaŋ ŋaa wɩɩ-la a pɩ Abɩraham, ʋ jaŋ ŋaa pɩ ma ma.

Currently Selected:

Galiisia Nɩaa 3: SIS

Highlight

Copy

Compare