Galiisia Nɩaa 5

Kirisito laala ta nɛ dɩ la tɩɩ la tɩtɩa

1Kirisito laala ta nɛ dɩ la tɩɩ la tɩtɩa. Má saa chɩŋ kpaŋ kpaŋ, a pɔ dɩ nʋʋkala bɩra sɩ́ ma kaa ŋaa yosi. 2Má jegile nɩɩ, mɩ-na Pɔɔl nɛ bʋl wɩɩŋ deeŋ pɩpɩma. Dɩ ma nɛ leŋe dɩ ba keri ma penee a nagɛ Juu tɩŋŋaa wombiiŋ sɩ dagɛ ŋɩɩ, wɩɩ-la Kirisito sɩ ŋaa pɩma ŋaa wʋpɛɩ nɛ. 3Mɩ jaŋ bɩra bʋl, dɩ nʋʋkala nɛ sɛyɛ dɩ ba keri ʋ peniŋ, ʋ maga dɩ tɩɩna tuto wɩalɩŋ kala Mosis fa sɩ bile nɛ. 4Ma nɩalɩŋ sɩɩ to wɩalɩŋ Mosis sɩ bile aa walɩmɛ dɩ ma kɛŋ tʋɔpʋla Wɩa sɩpaaŋ, ma keri ma tɩtɩa ta nɛ Kirisito teeŋ. La Tɩɩna Yesu zile-la nɛ ma vɩa ŋɩɩ. 5Ama Wɩa Dɩŋ-zɔmʋŋ doluŋ lɛ, la-na laa dii a kɛŋ yɩɛlaa arɩ la jaŋ kɛŋ tʋɔpʋla Wɩa sɩpaaŋ. 6Dɩ la dɩ Kirisito nɛ ŋaa kʋbala, dɩ la keri la penee koo dɩ la bɩ kere, ʋ bɩ wɩɩ kɛnɛ. Wɩɩ-la sɩ ŋaa sɩɩfɩaŋ wɩɩ nɛ, dɩ la laa Wɩa wɩaa dii a cho dɔŋɔ. 7Ma faa ŋaa woruŋ nɛ. Kʋbɛɛ nɛ saa nyɩsɛma dɩ ma sɩ́ wʋtɩtɩɩ-la to? 8Wɩa nɛ yɩrɛma, ʋ dee bɩ ma nyɩsa dɩ ma leŋ wʋtɩtɩɩ-la tonuŋ. 9Sɩ-bʋrʋŋ mʋapɩlɩɩ nɛ ba yie joŋo hɛ boroboro munuŋ sɩ yʋga lɛ, aŋ ka ʋ kala sii pʋɔrɛ. 10La dɩ ma kala sɩ ŋaa kʋbala ŋɩɩ Kirisito teeŋ, mɩ ha laa dii arɩ ma bɩ jaŋ to wombii-tanɩɩ. Mɩ saa laa dii arɩ Wɩa jaŋ dɔgɩsɛ nʋʋ na-kala sɩɩ walɩmɛma. 11Mɩ naambiiriŋ, dɩ mɩ nɛ haa bʋl arɩ ʋ maga dɩ ma keri ma penee nɛ, aŋ ka dɩ Wɩa-na laama ta, bɛɛ nɛ tɩɩ ba ha to naasɩŋ dʋdɔgɩsɛmɛ? Dɩ mɩ nɛ fa sɩ dɩ nʋʋkala maga dɩ ʋ keri ʋ peniŋ, ŋɩɩ-na mɩ fa bɩ jaŋ na hɛɛŋ a tɩŋ mɩ sɩɩ bʋl Yesu sɩ sʋʋ daagɛsɛ-la nyuŋ wɩaa. 12Nɩalɩŋ kala sɩɩ walɩmɛma, mɩ fa jaŋ cho dɩ ba lɩɩ ma tʋɔŋ a mʋ feri ba tɩtɩa.

13Ka ma-na mɩ naambiiriŋ, Wɩa yɩrɛma nɛ dɩ ma tɩɩ ma tɩtɩa. Ma saa sɩ tɩɩ ma tɩtɩa ŋɩɩ, má sɩ́ ŋɩɩ joŋ a to ma tɩtɩa tʋɔtɔrɛ wʋŋaalaa lɛ. Ama má cho dɔŋɔ a tɩma pɩpa dɔŋɔ. 14Má ŋaa ŋɩɩ, bɛɛ wɩaa wɩalɩŋ Mosis fa sɩ bile dɩ nɩaa tuto, ba tʋɔŋ wʋnyuŋ nɛ ŋ-la: “Cho ŋ dɔŋɔ tɩɩna arɩ ŋ sɩ cho ŋ tɩtɩa ŋɩɩ.” 15Ama dɩ ma wʋŋaalaa nɛ nagɛ baga kɩaa dɩ ma gʋra kɛŋ dɔŋɔ didii, má pɔ ma tɩtɩa lɛ, dɩ ŋɩɩ dee ma jaŋ kpʋ dɔŋɔ dɛrɛ.

Má to Wɩa Dɩŋ-zɔmʋŋ lɛ a kɛŋ mɩɩsɩŋ

16Ama wɩɩ-la mɩ sɩɩ chɛ dɩ mɩ bʋla pɩma nɛ ŋ-la: Má to Wɩa Dɩŋ-zɔmʋŋ niiŋ lɛ aŋ vɩa ma tɩtɩa tʋɔtɔrɛ wʋŋaalaa, 17bɛɛ wɩaa la tʋɔtɔrɛ wʋŋaalaa arɩ Wɩa Dɩŋ-zɔŋ-la wʋŋaalaa bɩ dɔŋɔɔ to. La tʋɔtɔrɛ wʋŋaalaa arɩ Wɩa Dɩŋ-zɔŋ-la saa ŋaa dʋndɔmɔ nɛ, ŋɩɩ wɩaa, wɩɩ-la la sɩɩ chɛ la ŋaa, la bɩ ʋ wuo ŋaa. 18Ama dɩ ma nɩɩ to Wɩa Dɩŋ-zɔŋ-la niiŋ lɛ, wɩalɩŋ Mosis fa sɩ bile dɩ nɩaa tuto bɩra bɩ doluŋ kɛnɛ ma lɛ. 19La tʋɔtɔrɛ wʋŋaalaa bɩ wʋfaalɩa ŋaa. Dɩ nʋʋ nɛ toba, ʋ yie ŋɩŋaa wʋlɩɩlɩŋ, a ŋɩŋaa disiniŋ, a ŋɩŋaa hɩɩsɩ wɩaa, 20aa kpaarɛ vʋɩyaa, a ŋɩŋaa hɩl wɩaa, a bɛrɛ nɩaa, a hɩhɛ yuosuŋ, a kɛŋ yarɩ-bieriŋ, a kɛŋ baanɩŋ, a chɩl ʋ dʋndʋŋa wɩaa, a kɛŋ dɔŋɔ pʋpɔrɛ, a lɩlɩɩ dɔŋɔ harɩŋ, 21a kɛŋ tʋɔbɔmʋŋ, a nyʋa sɩnɩŋ a bubugi. Dɩ ba nɛ kʋ hilimi na-kala, ba nyʋa sɩnɩŋ bugi a ŋɩŋaa wʋtɔɔnʋŋ. Mɩ laa sɩpaaŋ kpʋrɩsɛ ma dɩgɩlaa nɛ. Mɩ saa bɩraa kpʋrɩsɛ ma dɩgɩlaa nɛ arɩ nɩalɩŋ sɩɩ ŋaa wɩaa deemba bɩ jaŋ wuo jʋʋ Wɩa kuorii-la tʋɔŋ. 22Ama dɩ Wɩa Dɩŋ-zɔmʋŋ nɛ hɛ nʋʋ lɛ, ʋ yie ŋaa ʋ cho nɩaa nɛ, a kɛŋ tʋɔtɔrʋŋ, a fɩɛla hɔŋ sɔm, a kɛŋ kenyiri, a kɛŋ zile, a ŋɩŋaa wʋzɔŋŋɔɔ, a kɛŋ wʋtɩtɩɩ, 23a kɛŋ sɩɩ-fɩɛlaa, a jɩŋ ʋ tɩtɩa kɛnɩŋ woruŋ. Wʋzɔŋ kala bɩra tuo a lɩɩ wɩaa deemba harɩŋ. 24Ŋɩɩ wɩaa, nɩalɩŋ sɩ laa Kirisito wɩaa dii, ba kpʋ ba tɩtɩa tʋɔtɔrɛ wʋŋaalaa ta nɛ. Ba bɩra bɩ wɩalɩŋ ba sɩɩ hɩɛnʋ arɩ ba tʋɔtɔrɛ wʋŋaalaa lɛ ka to. 25Wɩa Dɩŋ-zɔŋ-la sɩ hɛ la lɛ, ʋ maga dɩ la tuto ʋ niiŋ lɛ nɛ. 26Má sɩ́ leŋe dɩ la cho dɩ la bibigisi la tɩtɩa lɛ, a sɩ́ leŋe dɩ la ŋaa dɩ la dɔnsʋŋ tɩŋŋaa baanɩŋ sisii, a sɩ́ yarɩ-bieriŋ kɛŋ dɔŋɔ lɛ.

Currently Selected:

Galiisia Nɩaa 5: SIS

Highlight

Copy

Compare