Galiisia Nɩaa 2

Yesu nanzɔɔba-la sɛɩ Pɔɔl sɩ bʋl Wɩa wɩaa a pɩ nɩalɩŋ sɩ bɩ Juu tɩŋŋaa ŋaa teeŋ

1Jɩsɩŋ fii arɩ banɛsɛ sɩ kiele, mɩ dɩ Banabas bɩra mɩɩra mʋ Jerusalɛm. Mɩ pɛ kɛŋ Taatɩs to la harɩŋ mʋ nɛ. 2Mɩ sɩ mʋ lee-la, Wɩa nɛ dagɛmɛ mɩ mʋ. La sɩ mʋa, mɩ dɩ nɩalɩŋ sɩ laa Yesu wɩaa dii kʋhɩasɩŋ dʋndʋŋa nɛ hilime. Ŋɩɩ nɛ mɩ bʋla pɩba wɩalɩŋ mɩ fa sɩ bʋla pɩpɩ nɩalɩŋ sɩ bɩ Juu tɩŋŋaa ŋaa a tɩgɛ Wɩa wʋzɔmɔ-la lɛ. Mɩ bʋl ŋɩɩ pɩba dɩ tɩntɩmɩɩ-la mɩ fa sɩ tɩma aŋ haa tɩŋ sɩ́ pɛɩ ŋaa. 3Taatɩs sɩɩ to mɩ harɩŋ fa ŋaa Giriik tɩɩna nɛ, ama ba bɩ ʋ fʋga dɩ ʋ keri ʋ peniŋ. 4Arɩ ŋɩɩ kala, nɩaa dɔnsʋŋ fa bʋla arɩ Taatɩs maga ʋ keri ʋ peniŋ nɛ. Nɩaa deemba fa fugo arɩ ba ma laa Yesu wɩaa dii nɛ a ŋaa la naambiiriŋ. Ba fa kʋ guoli la tʋɔŋ dɩ ba na arɩ laa to Juu tɩŋŋaa naabalɩmaba wombii-la nɛ koo la bɩbaa to. La sɩ laa Yesu Kirisito wɩaa dii ŋɩɩ, ba faa chɛ dɩ ba na ŋɩɩ la sɩ lɩɩsɛ la tɩtɩa Juu tɩŋŋaa naabalɩmaba wombiiŋ lɛ nɛ. Ba fa cho dɩ la to Juu tɩŋŋaa naabalɩmaba wombii-la nɛ a ŋaa yosi ʋ lɛ. 5Ama la bɩ sɛyɛ pɩba mʋapɩlɩɩ ma, dɩ wʋtɩtɩɩ-la Wɩa wʋzɔmɔ-la sɩ daga sɩ́ lɛl ma teeŋ. 6Mɩ jaŋ bʋl arɩ nɩalɩŋ sɩ ŋaa nɩhɩasɩŋ Wɩa nɩaa tʋɔŋ bɩ wɩɩ bʋla dɩ mɩ dagɛ a pɛ Wɩa wʋzɔmɔ-la lɛ mɩ sɩ jɩma. Ama nɩaa deemba dɩchɩnɩŋ bɩ wɩɩ ŋaa mɩ teeŋ, bɛɛ wɩaa Wɩa bɩ nuhuobiine yaraa lɛ nɩɩ beŋ. 7Nɩhɩasɩŋ deemba na arɩ Wɩa lɩɩsɛmɛ dɩ mɩ bʋl ʋ wʋzɔmɔ-la a pɩ nɩalɩŋ sɩ bɩ Juu tɩŋŋaa ŋaa nɛ, ka dɩ Pɩɩta ma bʋl wʋzɔmɔ-la a pɩ Juu tɩŋŋaa. 8Wɩa nɛ lɩɩsɛ Pɩɩta a pʋ doluŋ dɩ ʋ bʋl wʋzɔmɔ-la a pɩ Juu tɩŋŋaa. Ŋɩɩ tɩtɩa nɛ ʋ yɩrɛmɛ ma dɩ mɩ bʋl ʋ wɩaa a pɩ nɩalɩŋ sɩ bɩ Juu tɩŋŋaa ŋaa. 9Jeems arɩ Pɩɩta arɩ Jɔɔŋ sɩ ŋaa Wɩa nɩaa tʋɔŋ nɩhɩasɩ-la na arɩ wʋtɩtɩɩ, Wɩa nɛ lɩɩsɛmɛ dɩ mɩ tɩŋ tɩntɩŋ-fɩɛmɩŋ deeŋ. Ŋɩɩ nɛ ba kɛŋ mɩ dɩ Banabas hɛ ba tʋɔŋ, la kala kɛŋ nii-bala. Ba bʋla arɩ la dɩ Banabas jaŋ mʋ bʋl Wɩa wʋzɔmɔ-la nɩalɩŋ sɩ bɩ Juu tɩŋŋaa ŋaa teeŋ, ka ba ma bʋl wʋzɔmɔ-la Juu tɩŋŋaa teeŋ. 10Wɩɩ-la ba sɩ bʋla pɩla dʋndʋŋa nɛ, dɩ la sɩ́ summo-la sɩ hɛ ba tʋɔŋ wɩaa yʋ. Wɩɩ-la mɩ ma fa sɩ paala cho dɩ mɩ ŋaa nɛ ŋɩɩ.

Pɔɔl bʋl Pɩɩta teeŋ

11Ama bʋa kʋbala Pɩɩta sii kɔ Antɩɔk. Ʋ sɩ kɔ, mɩ chaasa bʋl ʋ teeŋ nɩaa tʋɔŋ arɩ ʋ cheye nɛ. Wɩɩ-la sɩ tɩɩ mɩ bʋl ʋ cheye nɛ ŋ-la: 12Ʋ sɩ hɛ Antɩɔk lɛ, Jeems tɩŋ nɩaa ba ma kɔ Antɩɔk. Ba sɩ kɔ, ba na arɩ Pɩɩta arɩ nɩalɩŋ sɩ bɩ Juu tɩŋŋaa ŋaa aŋ laa Yesu wɩaa dii, dɩ ba kala nɛ pɛ dɔŋɔ lɛ a didii kɩaa. Pɩɩta sɩ na nɩalɩŋ Jeems sɩ tɩma, ʋ lɩɩsɛ ʋ nɩsɩŋ nɩalɩŋ sɩ bɩ Juu tɩŋŋaa ŋaa lɛ, ʋ dɩ ba bɩra bɩ kɩaa ka dii. Pɩɩta faa fá nɩalɩŋ sɩ sɩ ʋ maga dɩ ba keri nɩalɩŋ sɩ bɩ Juu tɩŋŋaa ŋaa aŋ laa Yesu wɩaa dii penee nɛ. Ŋɩɩ nɛ tɩɩ ʋ ŋaa ŋɩɩ. 13Ŋɩɩ nɛ Juu tɩmma-la kʋkaana-la ma paala to ba fawʋllʋ wɩaa, arɩ Pɩɩta sɩ ŋaa ŋɩɩ. Banabas ma paala to ba fawʋllʋ wʋŋaalɩa-la lɛ. 14Mɩ sɩ na arɩ ba bɩ wʋtɩtɩɩ-la Wɩa wʋzɔmɔ-la sɩ daga ka to, ŋɩɩ nɛ mɩ bʋla pɩ Pɩɩta ba kala sɩpaaŋ, “Ŋ ŋaa Juu tɩɩna nɛ, aŋ ka ŋ wʋŋaalaa nagɛ nɩɩ-la sɩ bɩ Juu tɩɩna ŋaa. Ɛɛ nɛ saa ŋ jaŋ wuo ŋaa a fʋgɛ nɩalɩŋ sɩ bɩ Juu tɩŋŋaa ŋaa dɩ ba tuto Juu tɩŋŋaa naabarɩŋ?”

Wɩa laa diiniŋ dʋndʋŋa nɛ jaŋ leŋ dɩ la kɛŋ tʋɔpʋla Wɩa teeŋ

15Wʋtɩtɩɩ nɛ, ba sɩ lʋlla, la ŋaa Juu tɩmma nɛ. Nɩalɩŋ sɩ bɩ Juu tɩŋŋaa ŋaa sɩ ŋaa wʋbɔmɔ-la, la bɩ baa ŋaa. 16La jɩma arɩ nʋʋ nɩɩ to wɩalɩŋ Mosis fa sɩ bile dɩ nɩaa tuto, ʋ ŋɩɩ bɩ jaŋ wuo leŋ dɩ tɩɩna ŋaa tʋɔpʋl tɩɩna Wɩa sɩpaaŋ. Ama dɩ nʋʋ nɛ laa Yesu Kirisito wɩaa dii, ʋ dʋndʋŋa nɛ jaŋ wuo leŋ dɩ ʋ tɩɩna ŋaa tʋɔpʋl tɩɩna Wɩa teeŋ. Ŋɩɩ tɩtɩa nɛ la ma laa Yesu Kirisito wɩaa dii, dɩ Wɩa leŋ dɩ la ŋaa tʋɔpʋl tɩmma ʋ teeŋ, a tɩŋ ŋɩɩ la sɩ laa Kirisito dii. Dɩ nʋʋ nɩɩ to wɩalɩŋ Mosis sɩ bile, ʋ ŋɩɩ bɩ jaŋ wuo leŋ dɩ ʋ kɛŋ tʋɔpʋla Wɩa teeŋ. 17La sɩɩ chɛ dɩ la to Kirisito lɛ dɩ Wɩa leŋ dɩ la ŋaa tʋɔpʋl tɩmma, la na arɩ la nagɛ wʋbɔŋ ŋaara nɛ. Ma saa bɩɩna arɩ Kirisito nɛ leŋe la ŋɩŋaa wʋbɔŋŋɔɔ? Aɩ, ʋ dee!

18Wɩalɩŋ Mosis fa sɩ bile dɩ la tuto, dɩ mɩ nɛ vɩaba ta aŋ bɩra suomo tutoba, ʋ ŋɩɩ daga arɩ mɩ ŋaa wʋbɔŋ ŋaarʋ nɛ. 19Wɩalɩŋ Mosis fa sɩ bile dɩ la tuto, ba tɩtɩa nɛ leŋe mɩ sʋʋ. Ama ʋ ŋɩɩ ŋaa mɩ sʋʋ Mosis wɩalɩŋ lɛ nɛ a wuo kɛŋ mɩɩsɩŋ Wɩa teeŋ. 20Mɩ dɩ Kirisito kala nɛ ba kpaasa mɛrɛ daagɛsɛ nyuŋ. Mɩɩsɩ-la mɩ sɩ kɛnɛ, ʋ bɩ mɩ teeŋ lɩa, ʋ lɩɩ Kirisito teeŋ nɛ. Mɩ sɩ laa Wɩa Bie wɩaa dii nɛ tɩɩ mɩ wuo kɛŋ mɩɩsɩŋ deeŋ mɩ sɩ kɛnɛ dʋnɩa deeŋ lɛ. Wɩa Bie Yesu nɛ chomi, a joŋ ʋ mɩɩsɩŋ a yɔɔ sʋʋŋ mɩ wɩaa. 21Mɩ bɩ lahɔrɩmɔ-la Wɩa sɩ kɛnɛ la teeŋ vɩa. Ama dɩ nʋʋ nɛ jaŋ wuo to wɩalɩŋ Mosis fa sɩ bile lɛ a kɛŋ tʋɔpʋla ʋ teeŋ, sʋʋ-la Kirisito sɩ sʋba ŋaa pɛɩ nɛ.

Currently Selected:

Galiisia Nɩaa 2: SIS

Highlight

Copy

Compare