Ahẹ Isoromọnị 2
2
Ozi ọnẹẹ ọnọọ kà
1Mị sị mẹẹ anka ododo ana yà ịnị avị ịzị aā hị́ Ịsarọnị avọọ nị.
Ododo ozoza ana yà ịnozi mị vị̀ nị.
Ozi Ọnọrụ ọnọọ kà
2Anka ododo zoza mẹ yà ịnị akakana ikeyi avọọ,
avọọ ọnẹẹ ọnị mị sì ịrẹyị anị hu aanị mẹ yà ịnị akakana ọnyẹnẹẹ ana vọ nị.
Ozi ọnẹẹ ọnọọ kà
3Ọchị anaā tụ́ ẹtụtụ ana aā hị́ apụrụ mẹ vị irenyi tu ini iruku avọọ,
avọọ ọnọrụ ọnị mị sì ịrẹyị anị hu kere-kere aanị mẹ vị irenyi tụ ịnị akakana anọrụ ana vọ nị.
Miī sì ka ma yaatụ ịnị uhuhu anị nị.
Ẹtụtụ anị vi eneē hine mi ẹtẹẹtẹrẹ.
4Ọnọrụ ọnọnị ộ sị mị va ngụ ịzị ọ́ mẹ̀ ịsa va gwẹtẹ,
dị ọ sị zụ̀ mị ẹtẹẹtẹrẹ ka ọnị oo sì ịrẹyị amị nị.
5Dà ịsọyịrị yị mi, dị ma varẹma nyị ụkata.
Sị apụrụ mị ma rị ọ, dị ẹngụ amị ò hi ahị, agụvị ka mme sì ịrẹyị awụ pooro,
ọ sị vara ẹngụ aa zị mị.
6Àa yẹ ọ̀ sị ụvọha anị pè mi ịrẹsụ,
dị ọ̀ sị ụvọrị anị zá mị ku ayị.
7Ẹwụ nịnị anyẹnẹẹ Anijerusarẹmị,
kà a mị nịnị, dị wa sị uye ana aā hị́ ùnè ọnịrị akọnọ hị́ eku
ka wẹ́ yị va kụ awụ nịnị vee zigi yi.
Ahẹ ọhụva
Ozi ọnẹẹ ọnọọ kà
8Maa wụ ọngwẹ ọza ọnị mị si.
Ee zwee jịnẹ atabaa vẹ.
9Ọza ọnị mị sì ịrẹyị aanị vị ana sị mẹẹ anka ẹdọ avọọ.
Vị ọ sị mẹẹ anka ozi ùnè araka avọọ nị.
Ọnị ọ jẹẹ vaka ugene ịzọọ avọọ nị.
Aa dà eyi gee zị oze ini ozokete
ọnịrị oze ini enyusẹ ana a sị họ̀ oze.
10Ọza ọnị mị sì ịrẹyị anị aanị ộ kà mị ka.
Ọnọrụ ọnọọ
Ẹwụ ọnị mị si, kwẹẹtẹ,
waa dụ mị vẹ de
11Ụmẹ ịrẹsụ ọ sị para hu; orihi ẹ̀ yị kụkụ zụ̀.
12Ododo e si nyima aa ha;
o si tu ụmẹ ka aa jị ahẹ.
Aza aa wụ́ arivadi nịnị maa jị ahẹ ịnị aarẹ.
13Ihwigi e si nyima ee ví;
ọchị ịvayịnị maa jị ododo avaba aha aa dagụ kwẹ̀ẹ̀.
Ẹhẹẹ, ọnị mị si, waa dụ mịị vẹ;
ọnị mị si, vẹ ya zị.
Ozi Ọnọrụ ọnọọ kà
14Vị ụ sị mẹẹ anka arivadi ana tẹ
ịnị anaha ịrẹta avọọ nị.
Jẹẹ me re eyirẹsụ awụ ọyịza-ọyịza ọnọnị,
dị ma wụ́ ọngwẹ awụ ana vavọọ hine avọọ.
Ezi Anẹẹ Anijerusarẹmị
15Jintu za ahaka eweyi-eweyi ẹnẹnị
dị e ve du ịvayịnị ayị anaa jị ododo aanịị ha.
Ozi ọnẹẹ ọnọọ kà
16Ọza oni mi sì aanị vị aamị, dị ẹmịrị vị aanị nị.
Ịnị akakana ododo ọyịza-ọyịza ọọ̄ kụ ịsụpa anịị rị nị.
17Avọọ ọ mẹẹ̄ yà ịzọọ pooro na ngụ ịjị ahị etumeyọnị aa tụ,
dị ẹtẹ ee hweyi nị.
Ẹwụ ọnị mị si, waa vaavẹ anka ẹdọ avọọ.
Waa vẹ anka ùnè araka ana yà ịrẹsụ ataba ịzị aā hị́ Ịbẹta avọọ.
Currently Selected:
Ahẹ Isoromọnị 2: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
