Ahẹ Isoromọnị 3
3
Ụra Ọza ene sì ịrẹyị ọza
Ozi ọnẹẹ ọnọọ kà
1Ịrahụ-ịrahụ maa sụ ara ịrẹsụ ịvẹẹdị
vị ọnị mịị̄ rá ụraa re ọza ọnị mị maanị sì ịrẹyị anị.
Mê sì ọ, ama mé yi rè e.
Mâ hị́ ọ ama é yi tụ́ ohi.
2Maa kwẹẹtẹ ọgọnị di ma naa ngụ ịnị ẹkụraa zị.
Mị vaa vàa tụra oze ene hi ịnị ẹkụra, dị maa ngụ ohuu zịịzị
nee si ọza ọnị mị maanị sì ịrẹyị anị.
Mê ve sì ọ, ama mé yi re e.
3Oserẹtẹ nịnị maa ngụ ịnị ẹkụraa zị, ê ré mị,
dị mị họ̀ wa ka, aarịhịnị, wéé re ọza ọnị mị maanị sì ịrẹyị anị kẹ?
4Ẹmịrị wa mẹ maanị yị para ẹngụ hu kẹnẹ, dị mị na gẹrị ọza ọnị mị maanị sì ịrẹyị anị nị.
Mâ ta a ku, mẹ yị kụkụ zẹ ka ọ̀ na.
Dị mị sị́ ọ va ngụ ịnị aku ọnyị amị
ịzị a ya ma mị nị.
5Ẹwụ nịnị anyẹnẹẹ Anijerusarẹmị, kà a mị nịnị,
dị wa sị ùnè ọnịrị ẹdọ hị́ eku nịnị
ka wẹ́ yị vaa kụ́ zigi yị nịnị ịjị yaa mẹrị ẹngụ.
Ahẹ Ọhụta
Ọnẹẹ Anijerusarẹmị
6Sị ẹ́ hụụnị ụnọmị aa hịrẹẹ vẹ anka areyi ọbanyị anaa dá avọọ kẹ?
Avaba ẹngụ anị aa dagụ kwẹ̀ẹ̀ yị eturare ana aā hị́ ihwirankisesi ọnịrị ịmaya
ana á hị́ hụụnị ụvọ osohu nịnị avọọ
7Isoromọnị aa vẹ; a sị́ ọnịrị aga ohinọyị tụra okeehe aa vẹ anị nọ.
Ẹnị isoja Anisirẹrị nịnị ene hu kere-kere ee sere e nị.
Ẹnị ẹbẹẹta ẹ́ vị̀ nị.
8Avaba ẹnịnị vị ana yara sị ụhwọ kụ̀ ịrẹkụ ẹtẹẹtẹrẹ.
Ohirẹkụ obobooro ẹ́ vị̀ nị.
Ọzọza vị ana za ụhwọ
ee zí ka àa nyị ịsị ẹ kwẹẹtẹ tu ẹnị ịrahụ.
9A sị́ Isoromọnị ọnịrị aga ohinọyị tụra okeehe aa vẹ.
Ọchị ene zoza hu kere-kere hụrị ẹtẹ Ịrẹbanọnị Isoromọnị sị mẹ̀ aga ohinọyị anị nị.
10Ọchị ahụ aga anị vị ana a wụ́ isiriva ku,
dị a và ịta ana a sị igooru mẹ̀ ụkọrọ hi ku ọ nị.
Otimitimi anị vị ana a và ịta anangẹrẹ ana anyẹnẹẹ Anijerusarẹmị hí ọyịza-ọyịza ku.
Ozi ọnẹẹ ọnọọ kà
11Ẹwụ nịnị anyẹnẹẹ Anịzayọnị, jịnẹ vẹ, dị we ve re ohinọyị Isoromọnị nịnị.
Ve re o me ku amu ohinọyị ọnị ọnyị anị si ku ọ
ịhị ana aa nyị ọnẹẹ.
Ịhị ọnọọ ọ vị ẹkụhị ayohine anị hu kere-kere nị.
Currently Selected:
Ahẹ Isoromọnị 3: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
