Ahẹ Ụgama 96
96
Ohomorihi ọ vị ohinọyị ene hu keekere nị
(1 Ịtọ 16.23-33)
1Waā jị ahẹ ọwọọwaa gono Ẹnẹyịmavara nịnị,
mị ka avaba ẹwụ nịnị anẹhẹ ọ̀ọ jị ahẹ gono Ẹnẹyịmavara.
2Waa jị ahẹ gono Ẹnẹyịmavara, dị waa kụ́ ọ avọ nịnị.
Waa kà a nịnị eyinị-eyinị ka ọnị ọọ̄ dọ ọzaa ha nị.
3Wàa yà ịnị akakana anẹhẹ waa kà ịrẹyị ụbanyị anị nịnị ọnịrị ịta mā ta pa ọnị ọọ̄ mẹ.
4Ẹnẹyịmavara ộ banyị, ọnị a vọrọ ka àa kụ́ avọ nị.
Ọnị a vọrọ ka aza ẹ̀ẹ sị ụbanyịị yị huna avaba ori nị.
5Avaba ori anẹkụra nịnị vị ọchị kẹnẹ ana bẹ, ama Ẹnẹyịmavara ọ mẹ ẹbẹẹba nị.
6Ẹnẹyịmavara vị ana nyayịnẹ nyị ụbanyị,
avọọ ọ mẹ rẹ nyị ụbanyị ọnịrị ụkata ini irehi anị nị.
7 #
Ahẹ 29.1,2 Ẹwụ nịnị aza, waa sị ụbanyịị yị Ẹnẹyịmavara,
dị waa kà a ọ mẹmẹ nyị ụkata nịnị.
8Waa sị ụbanyị ana vọrọ tụra Ẹnẹyịmavara yọ nịnị.
Sị ịsa va mẹ̀ ẹ ẹyịza ini ohweje anị nịnị.
9Tana tụra ẹtẹ dị waa kụ́ Ẹnẹyịmavara nịnị anka ọ mẹmẹ nyị ụbanyị
Ẹwụ nịnị avaba anẹhẹ òo hí angwa anị ẹtẹẹtẹrẹ.
10Waa kà a yị aza nịnị ka Ẹnẹyịmavara ọ vị ohinọyị nị.
Ọ raà sị ẹhẹ jẹẹ nganganga, o yi zụ henyi
Àa mẹ̀ ọkarẹyị aza, ọ yị vaa mẹ eyida.
11Ẹwụ nịnị ẹbẹẹba ọnịrị ẹtẹ ọ̀ọ jẹ.
Òkū ọnịrị avaba ịsa ene hi ịnị anị èe nowu ịrajẹ.
12Ụnọmị ọnịrị avaba ịsị e hi ịnị ẹ̀ẹ mẹrị
dị avaba ọchị ene hi ini iriku ẹnị ẹ̀ rẹ ẹ jị ahẹ ịrajẹ.
13Ẹnịnị vavọọ vaa jị ahẹ kụ́ Ẹnẹyịmavara, agụvị ka aa vẹ dị ọ̀va mẹ̀ ọkarẹyị anẹhẹ.
Ịzẹyịza ọ vaa sị mẹ̀ ọkarẹyị ana vọrọọ yị anẹhẹ ọnịrị aza nịnị.
Currently Selected:
Ahẹ Ụgama 96: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
