Ahẹ Ụgama 94
94
Ohomorihi ọ vị ọmọkarẹyị nị
1Ẹnẹyịmavara, ẹwa vị Ohomorihi ene eē sí atọ ịrẹyị nọ, navọ aza ẹ̀ yẹ ka ayịị̄ kụ́ wụ.
2Ẹwụ Ohomorihi ana aā mẹ̀ ọkarẹyị anẹhẹ,
navọ ahịka ebira odivi ana aza edivi aa mẹ u si si wa atọ nị.
Ịsa ene e sì ọ vị ọnọọ nị.
3Ẹnẹyịmavara, aanị ụ wáá mẹ̀ vaa navọ aza edivi ka ẹ̀ẹ jẹ ịrajẹ pooro nị?
4Avaba aza edivi vị ana aā kà ịrẹyị oni irenu ẹnịnị è yi tù, di e yee wo oto irenyi-irenyi.
5Ẹnẹyịmavara, wéē re aza edivi mẹ̀ za aza awụ dị ẹ yaa mẹ ẹchakaa yị wa.
6Aza edivi ẹnẹẹ ệ za osoku ọnịrị azọga ne beri ozi oku dị ẹ wụ̀ wa va ha nị.
7Ê ro o ka Ẹnẹyịmavara o yi re ẹnị
ẹ ka Ohomorihi oni Ijekọvụụ̄ hẹkẹ o yi vee tụ́ ohi.
8Ẹwụ nịnị ọnụra ẹnẹ ẹ̀ yị yẹ ịrẹyị ene hi ịnị akakana aza ẹnẹẹ, na sị mẹ hẹẹ nịnị.
Ye re ụmẹ ẹnị ẹwụ nịnị vaa sị yẹ ịrẹyị aanị?
9Wéé zụ ro ka ọza ana mẹ ụtọ yị aza ọnị ọ yị vaa wụ́ ịrẹyị?
À vi u ro ka ọza ana mẹ eyi yi aza o yi vee re ẹtẹ nị?
10Ohomorihi ọọ̄ pa aza ene hi ịnị ẹhẹ nị, wéé ro ka ọ yị vaa sị ụyaa rị wa?
Ọnị ọ rẹẹ̄ sị ịsaa zụ̀ aza anị, ọza óó zụ ro ka ọnị ọ yị yẹ ịrẹyị?
11 #
1 Ịkọ 3.20
Ẹnẹyịmavara ộ yẹ ịrẹyị ana azaā ro ịnị ayị ẹnịnị.
Ộ yẹ ka ịrẹyị kẹnẹ-kẹnẹ eē ro nị.
12Ẹnẹyịmavara, ọza oni u wèe nyị iyi tụ́ ohuvọ dị waa sị ọda awụụ zụ ọ nị,
ọ̀ nyarị ịrẹsụ ọyịza.
13Wa raà mẹ ka aza ẹnẹẹ ẹ̀ zụ nyị ẹngwọọrọ ịnị ụmẹ ọnị ịrẹyị odivi ọ̀ọ vẹ.
Avọọ ẹngụ ẹnịnị mẹ̀ vaa rọ pooro dị à chị ụsị ọnị ọnịvị vee horo ngụ nị.
14Mâ yẹ ka Ẹnẹyịmavara o yi vee yi aza anịị tịtẹ,
ọ yị vaa hụrẹ aza anịị ụvọ.
15Ụmẹ aa vẹ ana a vanaa sị ịzẹyịzaa mẹ̀ ọkarẹyị.
Aza ana aa mẹ ịzẹyịza vaa jẹẹ pè e.
16Ẹ̀nị ẹ vaa jẹẹ mị ịrẹma dị ya kà a yị aza edivi ana aā mẹ̀ ebira odivi ka sị aa hị́ avọọ?
17À yị vị Ẹnẹyịmavara ana aa gụ mị ụvọ, mị yaanị wusu dà.
18Mê ro ka m maa hyẹdụ aanị nọ,
ama Ẹnẹyịmavara ộ sị ọtụ kà mị ịrẹma agụvị ô sì ịrẹyị amị.
19Ịjị ayị amị kụ́ vazi, Ohomorihi ô sị ayị amị hunẹnẹ, dị mị kụkụ aa jẹ nị.
20Ẹnẹyịmavara ẹ yị nyị ụvọ awụ rị tụ́ ịnị ịrẹyị aza ana aa sị irechee mẹ̀ ọkarẹyị,
aza ene èe re ịrẹyị ẹnẹ ẹ̀ yị vọrọ, dị ẹ ka ộ vọrọ.
21Ệ va iruvo bẹ ẹ yaa gẹ eyi aza ana aa mẹ̀ ebira ana vọrọ,
ẹ̀ẹ za ọza ẹnẹ ẹ̀ yị nyị ịsị ọ mẹ, dị ẹ ka à na wụ ọ.
22A ma ịda Ẹnẹyịmavara mị na tẹ̀ tụ́ dị à yị nyị ịsị ẹ zụ mẹ mị nị,
Ọnị ọ vị Ohomorihi amị nị.
Ọnị ee sere mi ka asị a nyị ịsị ẹ zụ kanyị mị nị.
23Ohomorihi vee si aza edivi atọ ebira odivi ẹnị ẹ yaa mẹ.
Mị ka Ẹnẹyịmavara ana vị Ohomorihi ayị ọ vaa wụ̀ waa ha nị.
Currently Selected:
Ahẹ Ụgama 94: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
