Ahẹ Ụgama 89
89
Ẹnẹyịmavara ô sì ịrẹyị ọza
(Ahẹ Etaanị Anezira ana a sịị zụ̀ ọza ịsa).
1Ẹnẹyịmavara vị ana nyayịnẹ ẹ sì ịrẹyị ọza
Ọnọọ vị ọnị mị vaa sị jị ahẹ pooro
Mị vaa si irenu amịị kà a yị aza pooro nị ka wa rụra sị ayị tụra.
2Mị ka mị vaa kà a nị ka ịzẹyịza awụ vị ana jẹẹ pooro aanịka ihinẹba.
3Ụ ka wa raà kà a ka â nyị ịsị ụ vaa mẹẹ yị ọza ọnị ụ sị nyị,
wâ vavọọ raà hị́ eku yi Idevidi ana vị ozi ahụ awụ.
4 #
2 Ịsa 7.12-16; 1 Ịtọ 17.11-14; Ahẹ 132.11; Ụkọ 2.30 Ụ ka ụ vaa sị ahụ amịị jẹẹ pooro,
dị ụ rẹ mẹ ka asị a nyị ọza ana zụ dọ ọ ohinọyị pooro.
5Ẹnẹyịmavara, ihinẹba vị ana aa kụ́ wụ agụvị ịsa ẹbanyị-ẹbanyị ọnị ụ mẹ
Aza awụ ẹ̀ẹ kụ́ gụ, dị ẹnị raa kà a ka wa rụra sị ayị tụra.
6Ịnị avaba ịsa ene hi ẹbẹẹba, ye re ana a zụ sị ọnịrị Ẹnẹyịmavara juwe ẹngụ?
Ye re ana ka ọnịrị Ẹnẹyịmavara ộ vị ọpa ịnị avaba aza ene hi ẹbẹẹba?
7Ịzị aza Ohomorihi ẹ̀ẹ kụ́ gụ hị́, ẹnịnị vị ene ee hí angwa Ohomorihi.
Ịnị avaba aza ana kara Ohomorihi, Ohomorihi ọnị ịnya aza eehí angwa anịị hu nị.
8Ẹnẹyịmavara, ana vi Ohomorihi Ochẹtẹẹngụ, ẹnị ẹ ka ọnịrị ẹwụ ộ vị ọpa?
Ẹnẹyịmavara, mâ nyị ụkata, ịzẹyịza ụ sịị̄ mẹ avaba ịsa nị.
9Òkū ana aa dà vụ̀ụ́vụụ, ẹwa nyị ọda tụra a nị.
Òo si nyima aa jị ayị, dị ụ rẹ kà a yọ ka ọ̀ mẹ hẹẹ.
10Wâ za Ịrahabị dị ụ gara a ha, dị ọ kụkụ tịtẹ anka eku avọọ nị.
Wa raà sị ụkata gara ọnịvị awụ ha.
11Ẹwa nyị ẹbẹẹba ọnịrị ẹtẹ nị.
Ẹwa sị ẹhẹ ọnịrị avaba ịsa ene hi ịnị anị hị́ ẹtẹ nị.
12Ẹwa mẹ oze ẹbẹẹba ọnịrị ụvẹtẹ nị,
Átaba Ịtabọ ọnịrị Ihamọnị mẹ̀ wụ́ ịrẹta awụ dị ẹ yaa jẹ, dị ẹ yaa jị ahẹ nị.
13Wâ nyị ụkata ana banyị,
ọza ọ yị zụ sị irenu kà a ịzị ụ nyị ụkata na za.
14Ịsa ana vọrọ ọnịrị ịzẹyịza ụ jẹẹ ịrẹsụ anị aa mẹ ohinọyị nị.
Ọza vị oni ụụ̄ sì ịrẹyị anị, wẹ mā mẹ ọza apẹ.
15Aza ana sị yẹ ka ẹnị aa jị ahẹ kụ́ wụ ẹ̀ nyarị ịrẹsụ ọyịza.
Ẹnẹyịmavara, mị ka aza ana ayamva awụ yà ịrẹsụ anị ẹ̀ nyarị ịrẹsụ ọyịza.
16Ẹngụ aza ẹnẹẹ vị ana vaa jẹ agụvị awụ eyinị-eyinị,
dị ẹ yaa mẹ ịnẹ ohine agụvị ka ụụ̄ mẹ̀ ịsa ana vọrọ.
17Ẹwaa sị ụbanyị ọnịrị ụkataa yị wa nị.
Wê nyị yi iyi, dị ụ sị ụkata yị nị.
18Mị ka Ẹnẹyịmavara ee sere yị ka asị a nyị ịsị e tù yi nị.
Ọnị Ohomorihi ana Anisirẹrị aa hẹkẹ ọ vị ohinọyị ayị nị.
19Wa mẹ ka aza awụ ana nyị ayị ọnya è re ẹtẹ ịnị ụmẹ ọnya da.
Dị ụ kà a yị wa ka â nyị ọnịrẹkụ ọnya ọnị ụ raà sị ụkata yị.
Ụ ka wa raà si ozwọọmụha ọnya hụụnị aza ẹnẹẹ ka wa kà a hịrẹ.
20 #
1 Ịsa 13.14; Ụkọ 13.22;
1 Ịsa 16.12
Ụ ka wê re Idevidi ozi ahụ awụ, dị ụ sị angwẹ awụ nyị ọ ka ọ̀vị ohinọyị nị.
21Ụ rẹ ka ụ vaa gụ ọ ụvọ dị ụ sị ụkata yọ.
22Nyị ọnịvị anị ana va zụụ gẹ ẹ ịrẹvụ,
mị ka ẹ yị nyị aza edivi ana va zụụ mẹ ehunaa yọ.
23Avaba ọnịvị anị ana ka sị ẹnị ee re e a mẹ vị ọnị ụ ka ụ vaa gara a ha éyi anị.
24Ụ rẹ ka ụ vee sì ịrẹyị anị dị ụụ sị ayị yọ.
Dị ụ rẹ mẹ ka ọ̀ nyị ẹbẹẹba ọnịvị anị.
25Mị vaa mẹ ka ọ̀ vị ohinọyị tụ́ ịrẹsụ ẹtẹ ene hi ini òkū ọnịrị ẹtẹ ịzị okuha nịnị hi.
26Ụ rẹ ka ọ vaa hị́ wụ dị ọ ka ẹwa vị Ada anị nị
Dị ọ ka ẹwa vị Ohomorihi ịzị ọnị na tẹ̀ tụ́ dị à yị nyị ịsị ẹ mẹ̀ ọnị nị.
Dị ọ rẹ ka ẹwaa dọ ọnịị tụ́ nị.
27 #
Ẹtẹ 1.5
Ụ rẹ ka ụ vaa mẹ̀ ẹ ozi ọzọkụ awụ,
dị ahịka ọnị o huna avaba ohinọyị ẹhẹ ana vọ nị.
28Dị ụ rẹ ka vi u vee sì ịrẹyị anị pooro nị,
ka ịsị ụ kà tịtẹ ka ụ vaa mẹẹ yọ, ẹ yị nyị ịsị ẹẹ̄ vara a.
29Wa rẹ kà a ka ovwoovu anị vị ọnị ụ vaa sị jẹẹ pooro,
dị ahịka ọnị ọ vị ohinọyị pooro zịna-zịna nị.
30Wa rẹ kị kà a ka ezi anị ẹ̀ẹ na jịnẹ ọda awụụ, dị ẹ̀ yị kụkụ saasa ịrẹyị awụ,
31dị ẹ yaa mẹ̀ ịsa ọnị ụ ka asị ẹ mẹ, dị ẹ̀ yị sị eyi pè ọda awụ nịnị,
32Ụ ka u vee tụ́ wa inori dị ẹ̀ rị ụya ebira odivi ọnị ẹ yaa mẹ.
33Ụ ka ama vi u vee sii sì ịrẹyị ẹnịnị nị,
dị waa vịị vayị ẹnịnị.
34Ụ ka ịrẹyị ọnị ụ ra kà tịtẹ ka ụ vaa mẹ vị ọnị ụ vaa mịị mẹ
ka ịsa ọnị ụ raà sị irenu awụ kà, wẹ yị vàa hụụnị anị.
35Wa kà a ka wa raà hị́ eku tụ́ ọ ka ụ mẹ kị kà a avọọ, ọ vị nị,
ka we yi vee cheeche yi Idevidi.
36Ụ ka ovwoovu anị o yi vee vú pàá.
Ọnị ọ vaa vị ohinọyị pooro zịna-zịna nị.
37Ụ ka avọọ ọ mẹ̀ vaa yà pooro anka ụhwẹ mẹ̀ yà ẹbẹẹba dị aa dọ ivenu.
38Ama we ve reè hí ayị, we si yi ne ta.
Ụ kụkụ vaa kụ́ ayịị hi ọza ọnị ụ sị nyị.
39Wa raà và hụụnị ịrẹyị ọnị ụ si kà tịtẹ,
dị ụ sị amu ohinọyị anị, di u ne e ngụ ụdọ nị.
40Wâ za ọvọ ana kara ẹkụra anị we si o wu va hà,
wa rẹ sị ịzị ẹẹ̄ naa tẹ gara hà.
41Avaba aza ana aa parahu kụkụ aa kụ́ ịsa ene hi ịnị anị,
dị anokokooro anị ẹnị ee nyị ọ unyi nị.
42Wa raà mẹ ka ọnịvị anị è hu ọ ẹtẹ, dị ẹnịnị kụkụ aa jẹ nị.
43Wâ mẹ ka ẹnya ịrẹkụ ẹ vị ịyẹyẹ,
wẹ yị gụ ọ ụvọ ịnị ịrẹkụ.
44Wẹ yị kụkụ zẹẹ ka ọ̀ nyị ụbanyị ọnyọọnyị,
dị ụ vara udi ohinọyị anị eteesu nị.
45Wâ mẹ ka unobo ò tù ọ, ọ́ mẹ̀ vị vi ozweyi,
dị ụ mẹ̀ ụhị nyị ọ nị
46Te Ẹnẹyịmavara we yị kụkụ daba kana eyi ayị vụrụ-vụrụ?
Aanị ụ wáá mẹ̀ vaa kụ́ ayịị hi yi pooro nị?
47Asị ayị hi wu o, ka ẹ yị nyị ẹhẹ amị yà.
Wáā yẹ ka avaba aza vi ene vee sú.
48Ẹ̀nị ẹ ka ọnị mẹ̀ vẹ ẹhẹ anị o yi vee sú?
Mị ka ẹnị ẹ ka ọnị ọ yị vaa nọ ini ikuta?
49Ẹnẹyịmavara, ịrẹyị ayị ọnị ụ vịdị maanị nyayịnẹ sì yọ?
Avaba ịsa ọnị ụ hị́ eku ka ịzẹyịza ụ vaa mẹẹ yị Idevidi, ịzị ẹ yà?
50Ẹnẹyịmavara, tamayị o, ka aza ee nyị ozi ahụ awụ unyi.
Avaba anẹkụra aa kụ̀ mị ụhụ, dị mị sị ẹngụ dọ ọ nị.
51Ẹnẹyịmavara mâ vavọọ sị ẹngụ dọ avaba ụhụ ọnị ọnịvị awụ aa kụ̀ mị.
Avaba ahụ ọnị ọza ọnị ụ nyị òo hu vị ẹnị ẹ vaa sị kụ̀ ọ ụhụ.
52Ẹnẹyịmavara ẹwụ mị vaa kụ́ avọ pooro nị.
Aamị, mị ka aamị.
Currently Selected:
Ahẹ Ụgama 89: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
