Ahẹ Ụgama 88
88
Ọza ene ee nowu ka Ohomorihi ọ̀ ba ọnị owu
(Ahẹ ezi Ikora ana yị ịnị ụvọ ọga ọjahẹ, ọngwẹ anị vị ọngwẹ Imaharati. Ahẹ ọnị Ihemani Anezira sịị sị ịsaa zụ̀ ọza)
1Ẹnẹyịmavara, ẹwụ Ohomorihi ana dọ mị tụ́
ẹwụ maa hị́ pooro ọọdụ ọnịrị ịrahụ nị.
2Aarịhịnị navọ we batọ dị wa wụ́ orere ọnị maa jị ka wa gụ mị ụvọ.
3Ịrẹyị ene tù mị ọ sị rụrụ, ọ sị vọ chee me wusu.
4Mẹ yị kụkụ nyị ụkata vụrụ-vụrụ, aza ệ hyakụ sị ọ ro ka mê wusu.
5A kụkụ reè hi ayị amị anka ọza ene wusu avọọ.
Ịrẹyị amị vị ana kụkụ sị mẹẹ anka oku ana a raà sị tụ́ ini ikuta.
Ẹngụ oku ẹnẹẹ wẹ yị kụkụ tamayị ẹnịnị,
ẹ yị kụkụ nyị ịzị ịrẹyị ẹnịnị gẹ wụ.
6Ịnị ụsị ana nyịnẹ hu, dị o re hozi hu ụ sị mị na tụ́ nị.
7Ọyịkụ awụ ô chi mị ẹngụ, mẹ yị zụ sị ịrẹsụ dọ ọ.
8Wa kụ́ ọta amị ana gụrị ẹmị hu, dụ hụrị ẹmị ẹngụ,
mị kụkụ aa nyị wa ịhyẹrẹ.
A sị mị kara tụ́ aha ọnya, me yi re oze zwe.
9Mâ rị ụya pooro eyi amị e ku gu.
Ẹnẹyịmavara, eyinị-eyinị m maa sịị tụ́ ụvọọ hị́ wụ nị.
10Aza ene wusu éé kuku zụ re ụkọrọ ọbanyị ọnị waa mẹ?
Ẹnịnị ẹ́ẹ́ zụ kwẹẹtẹ dị ẹ̀ẹ kụ́ wụ avọ?
11Aza ene hi ini ikuta ẹ yị zụ kà a ú memee sì ịrẹyị ọza.
Mị ka aza ene wusu ẹ yị kụkụ zụ kà a ụ mẹmẹ nyị ịzẹyịza.
12Aza ene hi ini etohozi ẹ yị yẹ ụkọrọ ịvọpa ọnị waa mẹ
Aza ana ahịka ê hi ịzị e reè hi ayị ẹnịnị tụ́ e yi zụ re ẹngụ ụkọrọ ẹnẹẹ.
13Ẹnẹyịmavara, ẹwụ m mee nowu hị́ ka ọ̀ gụ mị ụvọ nọ, ẹnẹnẹ vị ọnị maa dá ịpẹẹ wụ.
14Ẹnẹyịmavara, sị ẹ vẹ dị ụ yị mị tịtẹ, dị ụ kụkụ và ịrẹma kà mị.
15M mẹ̀ hụrẹ vị ozweyi mị hụrẹ rị ụya di mee vee sú nị.
Ụya ọnị waa sịị rị mị ọ sị chi mi ẹngụ.
16Ọyịkụ awụ o si chi mi ẹngụ, wa raà sị̀ ụya wụ̀ mị.
17Eyinị-eyinị vị ọnị mị yà ịnị akakana ụya anka ọza ene horo ngụ adagu avọọ,
Ọ sị mị mụnẹ saka-saka
18Wa raà mẹ ka ọta amị ana gụrị mi hu, di e sì ịrẹyị amị ẹ̀ hụrẹ mị ẹngụ.
Ịrahụ ẹmịrịị kụkụ aa mẹ ụ̀nà nị.
Currently Selected:
Ahẹ Ụgama 88: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
