Ahẹ Ụgama 103
103
Ịzị Ohomorihi mẹhị sì ịrẹyị ọza ne tù
1Vị a vọrọ ka maā sị avaba ayị amịị kụ́ Ẹnẹyịmavara nị,
â vọrọ ka maa kụ́ ọ avọ.
2Â vọrọ ka maa kụ́ Ẹnẹyịmavara, dị maa tamayị avaba ịsa ọnị ọ mẹ mị.
3Ọnị ọ và hụụnị avaba ebira odivi ọnị mị mẹ yị mị, dị ọ mẹ avaba ịhị ana za mị nị.
4Ọnị ọ dọ mị tụ́ ka asị mi sú, di o sì ịrẹyị amị dị aa vayị amị nị.
5Ịsa ozoza oni mee sì vị ọnị ọ kụ́ mị dị ọ hụ̄ mị,
dị mị kụkụ yà anka ozweyi avọọ, dị mị rẹ nyị ụkata anka ukokoro nị.
6Ẹnẹyịmavara ọ ma mẹ eyida, ọọ̄ mẹ̀ ịsa ana vọrọọ yị aza ana aza aa mẹ ehunaa yị.
7Ọnị ọ sị ịsa ọnị ọ vaa mẹẹ zụ̀ Imosiisi, dị ọ rẹ sị ụkọrọ anị zụ̀ Anisirẹrị nị.
8 #
Ije 5.11
Ẹnẹyịmavara vị anaā vayị ọza ẹtẹẹtẹrẹ, ọ mā hụra kụ́ ayị,
ama oō sì ịrẹyị ọza ẹtẹẹtẹrẹ.
9Ọ mā tụ́ ọza ohuvọ kù, ọ mā rẹ kụ́ ayị gọdọ.
10Ọ mā kà a ka ọnị aa mẹ ebiraa hi yi anka ebira odivi ẹnị ẹ yaa mẹ.
Ọ yị kà ka ọnị aa sị ịvị ayịị sị yị ụta.
11We re ịzị ihinẹba noze rịrị ẹhẹ dẹngụ ne tù, avọọ o mè sì ịrẹyị ọza ene hí angwa anị nị.
12Anka ịzị ọyị zịị hụrẹ mẹ̀ noze rịrị ịzị ọ zịị naa ngụ ẹtẹ,
avọọ Ẹnẹyịmavara mẹ̀ sị ebira odivi ayị noze rịrị ẹyị nị.
13Anka ada ozi mẹ̀ẹ vayị ozi anị avọọ,
avọọ Ẹnẹyịmavara mẹ̀ẹ vayị ọza ene hí angwa anị nị.
14Ẹnẹyịmavara ộ yẹ ọ mẹmẹ mẹ yị, Ộ yẹ ka ezi kẹnẹ ị vị nị.
15Ẹhẹ ọza vị ana si mẹẹ anka ododo ịnị avị avọọ.
Ịsọnị-ịsọnị dị ọ yara hi ẹtẹ,
16dị ahị maanị tụ́ kú ọ, dị ọ rẹ ta. Dị ayị wụsẹ hi ka â nyị ịzị ẹ vịdị vavọọ nyị ododo.
17Ama Ẹnẹyịmavara vi eneē sì ịrẹyị aza eneē hí angwa anị pooro zịna-zịna.
Ịsa ana vọrọ ọọ̄ mẹ yị ezi ẹnịnị ịrẹma-ịrẹma nị. 18Avọọ ọ mẹ̀ vaa mẹ yị aza ana jẹẹ pè ịrẹyị anị, dị e tamayị ka ẹnị aa saasa ọda ọnị mẹ nị.
19Ẹnẹyịmavara ọ raà rị ohinọyị tụ́ ẹbẹẹba
ọnị aa mẹ ohinọyịị tụra avaba anẹhẹ nị.
20Ẹwụ nịnị anggẹẹrị anị ana nyị ụkata ana aa mẹ̀ ịsa ọnị ọ kà waā ga ọ nịnị.
21Avaba, ẹwụ nịnị ene hi ẹbẹẹba ana vi ezi ahụ Ẹnẹyịmavara, dị waa mẹ̀ ịsa oni o sì, waa kụ́ ọ nịnị.
22Ẹwụ nịnị avaba ịsa ẹnị Ẹnẹyịmavara mẹ hi ịzị ọ rị ohinọyị tụ́, waā kụ́ ọ nịnị,
vị a vọrọ ka maā kụ́ Ẹnẹyịmavara avọ nị.
Currently Selected:
Ahẹ Ụgama 103: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
