Ahẹ Ụgama 104
104
Ahẹ ana a sị gono Ohomorihi ana tụ́ ẹhẹ
1Vị a vọrọ ka maa kụ́ Ẹnẹyịmavara nị.
Ẹnẹyịmavara ana vị Ohomorihi amị, wâ da nyị ụbanyị kẹnẹ.
Ụbanyị vị ọnị ụ sị mẹ awuru chire.
2Wâ sị ẹtohweyi dị ụ sị mẹ awuru chire nị,
dị ụ maanị gana ẹhẹ jẹẹ anka ọza òó rere jị ajẹngụ avọọ nị.
3Ohine irehi awụ vị ọnị ụ sị jẹẹ tụ́ ịnị enyi.
Wâ sị eguhi mẹ umaata, dị ahịka ahị ụ waa tụraa zị nị.
4 #
Ihib 1.7
Ahị ọnịrị ịra ana aa dà ụ sị mẹ ọnụtụ awụ nị.
5Wa raà sị ẹhẹ jẹẹ geri-geri o yi zụ henyi,
6di u si enyi ana nyịnẹ chire e awuru nị.
Enyi ọnọọ vị ana mụnẹ ataba nịnị.
7Ụ mẹ̀ kara eyi hi enyi nịnị, ẹnịnị ệ và tụ́ echi.
Ẹ mẹ̀ wụ́ ka waa kà ịrẹyị e kú zwe.
8Enyi ẹnẹẹ ê sì kú ataba ịrẹsụ, dị ẹ vavọọ na gu ini ozi ịzị ụ tenyi oze tụ́ yị wa nị.
9Wâ tẹ ẹhwị yị wa, ẹnịnị ẹ yị zụ para ịzọọ hu dị ẹ̀ na kụ́ avaba ẹhẹ.
10Ẹwụ Ohomorihi ộ mẹ̀ ka enyi ẹ̀ẹ vàa hi ini orosi, di oo sì ịnị akakana ataba.
11Avaba uye ịnị avị ee hú enyi ọnọọ, dị ịkẹrịkẹtẹ ịnị avị ẹnị raa nọ ịzọọ nee hú enyi nị.
12Inomi nịnị ệ mẹ ịrẹngwẹ gụrị enyi ọnọọ, di e hi ịnị avọ́ ọchị dị ẹ yaa jị ahẹ nị.
13Wâ zụ̀ orihi hụrẹ ẹbẹẹba hi ịnị ataba.
Avaba anẹhẹ vị ọnị ụ mẹ ka ò zee yị.
14Wâ mẹ ka avị è nyị dị ịsụpa ẹ̀ẹ rị ọ, dị aza ee chire ịsa, dị ẹtẹ ẹ̀ẹ mẹ̀ ịsa ẹnị ẹ vaa rị.
15Wâ mẹ ka ẹ̀ nyị eche ẹnị e vee hú dị ayị ẹnịnị òo hine,
di ẹ̀ rẹ nyị angwẹ ene e ve sii sisi eyi, di eyi ẹnịnị ọ̀ọ swa.
Ẹ rẹ nyị ịsọyịrị ana vaa sị ụkataa yị wa.
16Ọchị ẹbanyị ene hi Ịrẹbanọnị ẹnị Ẹnẹyịmavara chire vị ana nyayịnẹ ee re enyi hú.
17Inomi irenyi-irenyi vị ana mẹ ịrẹngwẹ hi ịnị ọchị ene hi ịzọọ.
18Akọnọ nịnị vi ene hi ịrẹsụ ataba ịzọọ, di epeni nini re hi ịnị anaha ịrẹta ịzọọ nị.
19Wâ mẹ ụhwẹ ka à sịị yẹ ụmẹ, ọyị ọnị ọ rẹ yẹ ụmẹ ana a vọrọ ka ọ̀ sị na ngụ ẹtẹ.
20Ẹwa mẹ ịrahụ, dị avaba uye nịnị aa jịnẹẹ hi ẹhẹ ẹtẹ òo si hozi nị.
21Idu nịnị ẹ̀ẹ sì uye, di e yee nowu, di e yee sì ịsọyịrị oni Ohomorihi vaa sị yị wa.
22Ọ yị aa hụrẹ, di e si zwe, dị ẹ na hụtụ ịnị ụsị ẹnịnị.
23Dị aza ẹnị jịnẹ dị ẹ naa mẹ̀ ụkọrọ ẹnịnị pooro di oruva ò tù.
24Ẹnẹyịmavara, ụkọrọ awụ ộ dà rụrụ kẹnẹ,
ịrẹyọyẹ ụ vavọọ sị mẹ avaba anị nị.
Ẹwa mẹ avaba ịsa ene hi ẹhẹ nị.
25Òkū ọnị vị ana rẹ yà ịzọọ, dị ọ nya ẹtẹ ha kẹnẹ.
Ịsa irenyi-irenyi ọnị ọza ọ̀ yị yẹ ịrịka anị vị ana gwẹtẹ hi ịnị anị.
Ẹnyị ệ banyị, dị ẹnyị vị oweyi nị.
26 #
Ijov 41.1; Ahẹ 74.14; Ayị 27.1 Ẹpa nịnị aa vàa chi vàa hịrẹ ịnị anị, dị agụgụ ẹnị rẹ gwẹtẹ ana aa mẹ aahẹ ịnị anị nị.
27Avaba ẹsẹnị vi ene ee zii zi ka wa sị ịsa ẹnị ẹnị vaa rị yị ẹnị ịjị ụmẹ òo si tù.
28Wàa sị ịsa yị wa, dị ẹ kụ́ ọ, wàa maanị há ụvọ awụ kẹnẹ,
dị ẹ rẹ nyị avaba ịsa ozoza-ozoza dị ọ hụ wa.
29Wàa maanị và eyi hụrẹ wa ẹngụ, dị angwahi kụ́ ngụ wa ẹngụ.
Ịhị wàa dọ wa ụhwẹ, di e sú, dị ẹ varẹma nọ ini eteesu.
30Wâ tụ́ ụhwẹ tụ́ wa ẹngụ, dị ụ sị mẹ wa nị,
dị ụ mẹ ka ẹhẹ anẹhẹ ẹ̀ vara ọwọọwa nị.
31Ụbanyị Ẹnẹyịmavara vị ana vaa yà ịzọọ, dị aa jẹ ịrajẹ agụvị ụkọrọ ọnị ọ mẹ.
32Wâ kana eyi re ẹhẹ, dị aa banyị nị.
Ụ mẹ̀ kanyị ataba, dị aa tụ́ areyi nị.
33Mị vaa jị ahẹ kụ́ Ẹnẹyịmavara pooro ịnị ẹhẹ amị nị.
Mị ka mị vaa jị ahẹ kụ́ ọ pooro màa yị yàra nị.
34Maa jẹ ịrajẹ agụvị ịsa ẹnị Ẹnẹyịmavara mẹ,
navọ ahịka ịrẹyị ene zee wu eyi m mee ro ịnị ayị amị nị.
35Navọ ahịka vị ọnịvị ve vú ẹtẹ hụrẹ ẹhẹ nị, dị asị a kụkụ nyị aza edivi.
Vị a vọrọ ka maa kụ́ Ẹnẹyịmavara nị.
À vẹ yaa kụ́ Ẹnẹyịmavara.
Currently Selected:
Ahẹ Ụgama 104: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
