Ahẹ Ụgama 102
102
Ịpọda ọza ọnị ụya aa rị
1Ẹnẹyịmavara, navọ wa wụ́ ịpẹ ọnị maa dá.
Navọ kwogwo wa wụ́ owu ọnị maa na ka wa ba mi owu.
2Navọ asị ụ hụrẹ mị ụvọ, màa yà ịnị ẹngụkata.
Navọ kwogwo màa hị́ wụ we jintu tụ́ mi ohi.
3Nyị ẹhẹ amị yà, ịsọnị-ịsọnị dị ộ ta anka eguhi avọọ.
Avaba ẹngụ amị ọ sị jịnẹ ịra.
4Ê tụ́ mi pooro, mị kụkụ tịtẹ anka avị ana sị wụ avọọ,
mẹ yị hyakụ kụkụ zụ rị ịsa.
5M mè nowu pooro, mâ ta kwọrọ na za agịga.
6Mị kụkụ sị mẹẹ anka inomi odivi ana aa ngụ ini eburuu zị avọọ nị.
7Mị kụkụ hụtụ anka inomi ịrịnya anaā yà ịrẹsụ irehi avọọ.
8Ọnịnị amị vị ana aa kụ̀ mị ụhụ pooro kẹnẹ.
Ẹnị ana aa mẹ mị isiya vị anaā kà a yị ọza ka o du ọ kù anka a mè du mi kù.
9-10Ụ mẹ̀ kụ́ ayị hi mi pooro wê chema mị wê ne mi ta.
Dị mị kụkụ aa ká atịtọọ rị, di mee hú ẹgọ ọnịrị enyi nị.
11Ẹhẹ amị vị ana yà chee anka ụmọmọ ọnị ọzaā re oruva avọọ,
ịsọnị-ịsọnị dị ộ ta anka avị avọọ.
12Ẹnẹyịmavara ẹwa vị ohinọyị pooro zịna-zịna nị,
aza vị ana vaa tamayị awụ pooro zịna-zịna.
13Mâ yẹ ka ụ vaa kwẹẹtẹ dị wa vayị Anịzayọnị ụmẹ ọnị ụ nyị ka wa sị vayị anị òo si tụ́.
14Ezi ahụ awụ vị ana nyayịnẹ sì ịrẹyị Anịzayọnị.
Ọ̀ọ daka zee e eyi ọ sị jị eburu, ẹnịnị vị ana aa vịị vayị Anịzayọnị
15Avaba anẹhẹ vee hí angwa Ẹnẹyịmavara,
dị avaba ohinọyị anẹhẹ aa sị ụbanyịị yọ.
16Ẹnẹyịmavara o reè tenyi dà, ọ vaa sị zụ̀ ka ọnị ộ nyị ụbanyị.
17Ọ vaa wụ́ ịpẹ oni oniruwa nịnị aa dá, ọ yị vaa si eyii wụ̀ wa.
18Maanị chẹrẹ ẹ tịtẹ nịnị yị ezirẹma,
di aza ọnị ọza ọ̀ yị ma ẹ̀ va zụ kụ́ Ẹnẹyịmavara.
19-20Chẹrẹ ẹ ka Ẹnẹyịmavara mẹ̀ yà ini eehi anị ẹbẹẹba ộ kana eyi vachi.
Ọ̀ mẹ̀ kana eyi vachi di o re ẹhẹ, ộ wụ́ aza ana a za hi ini ẹngwa mèe nowu.
Dị ọ kụ́ avaba aza ẹnẹẹ ana a raà mẹ̀ ọkarẹyị isu yị hụụnị ẹngwa nị.
21A vaa kà ịrẹkụkụ Ẹnẹyịmavara yị Anịzayọnị, dị Anijerusarẹmị aa kụ́ ọ avọ.
22Anẹkụra ọza ẹ̀ẹ maanị sị wara gụ dị ẹ yaa tanaa tụra ẹtẹẹ yọ nị.
23Ịjị mị ta jẹẹ ịnị ụmẹ, Ẹnẹyịmavara ộ dọ mị ụkata anị, dị ọza ẹhẹ amị dị ọ dà a ẹjịjị nị.
24Dị mị va ka Ohomorihi amị, asị ụ yị sị mị hụụnị ẹhẹ dê,
wáā yẹ ka ẹwụ vị ana yà ịzọọ pooro zịna-zịna
25 #
Ihib 1.10-12
Dị mị rẹ ka hụrẹ ụmọrụmọ ọnị ọ sị ẹhẹ ọnọnị jẹẹ hị́,
ọnị ọ rẹ mẹ ẹbẹẹba nị.
26-27Ẹhẹ ọnịrị ihinẹba vee bo anka awuru avọọ, dị ọ vara wa dị ẹ ta,
ama ọnị Ohomorihi vị ana vaa yà ịzọọ pooro.
28Ezi eyi vee hi ịda awụ di wee sere wa,
dị ụ mẹ ka ezi ẹnịnị ẹ nyị ahụ jẹẹ ịda awụ.
Currently Selected:
Ahẹ Ụgama 102: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
