Ụhịrẹyị 25

Ụhịrẹyị Isoromọnị ana vọ

1Â nyị ụmẹ ọnya aanị ọnị Ihezekaya sị vị ohinọyị ẹtẹ Ijuda. Ịnị ụmẹ ọnọọ, ẹnị ọchẹrịsa ohinọyị nịnị ệ chẹrẹ ụhịrẹyị ọrụrụ-ọrụrụ Isoromọnị ana vọ tịtẹ nị. 2Ẹyị azaā sị ụbanyị yị Ohomorihi agụvị ka ọnị oō mẹ̀ ịsa ọnị ọza ẹ yị yẹ uruvo anị nị. Dị aza rẹ sị ụbanyị yị ohinọyị nịnị agụvị ka ẹnị ẹẹ̄ mẹ̀ ẹhahi ịrẹyị zụ aza nị. 3Ọza ẹ yị zụ yẹ ịsị ẹ ya ịnị ayị ohinọyị. Ẹbẹẹba me noze, dị eteesu ọnị rẹ nyịnẹ, avọọ aro ohinọyị mẹ noze rịrị aza nị. 4Aa raa sị ịra hụ akịka hụụnị enyusẹ anaā hị́ isiriva, dị ọ vị ịsa ọkụmị-ọkụmị ana a nyẹngụ sị tu ịsa ene ozoza. 5Aa kụ anajuwe odivi kwooze yị ohinọyị, ọ vaa sị ịzẹyịzaa mẹ ịjọva. 6#Irk 14.8-10Asị ụ sị zụ ka aa nyị ịsị ụ vị ọvịdị ohinọyị. Asị ụ vene ẹngụ awụ o. 7Navọ a hi wụ na yaatụ aha ụbanyị, ọnọọ ọ mẹ̀ hụ ka a dụ wụ kwẹẹtẹ yị ọza ẹnẹsa ka ọ yaatụ aha ọnọọ nị. 8Asị ọza ha eyi sị ịrẹyị nọ ikootu, onivenu ọ̀ọ na kụ ịrẹka za wụ. Ụ́ụ́ ma mẹ̀ ụhị ọnọọ? 9Ẹwụrị ọza ọ̀ nyị ịrẹyị, mẹ̀ ọkarẹyị anị yị ẹngụ awụ nịnị dị asị ụ kụ ọ iruvo hi ẹhẹ. 10Ụhị ọ vaa vị yị ụ nị, a sị ụ yẹ ka irenu awụ ọọ̄ ma tịtẹ. 11Ịrẹyị ọnị e tenyi tụ irenu kà sị mẹ anka igooru ana sị dọ achẹrẹ tụra ịrẹsụ isiriva avọọ nị. 12Ịrẹyị ọnị ọyẹrẹyị ka yị ọza ana nyị ụtọ sị mẹ anka àa sị ọmọ mẹ ọza ẹyịza. 13Ọnụtụ obooro vị anaa sị ayị ọza ana tụ ọ ụtụ nẹtẹ anka ọza o hú enyi ohunẹnẹ ịnị ụmẹ ẹtẹ ọngụra avọọ. 14Ọza anaa ka ịrẹyị, dị ọ yị mẹ̀ ẹ sị mẹ anka eguhi osusu avọọ nị. 15Ayọnẹtẹ aa sị dọ ohinọyị ayị nị. Ịrẹyị anaa sị ụmẹnụmẹnẹ ka ọzaa sẹdẹ yị nị. 16Wẹ̀ẹ re ẹhụ, rèé ẹ̀hụ awụ anị, ẹ̀ẹ vị avọọ ụ aa hẹrẹ ẹ nị. 17Waa sị irehi ọnọhụva anị jị ọwụ, vị ịrẹyị awụ ee du ọ eyi, dị ọ kụkụ a nyị ịhyẹrẹ awụ nị. 18Ọza anaa dọ ivenu ireche ku ọta anị sị mẹẹ anka ọza o che ọza ọpa, a vị ọza ọ̀ ka ọza ụhwọ, a vị ọza o hu ọza arubebe avọọ nị. 19Ọyị sị ayị tụra ọza ẹnẹ ẹ yị wụra sị ayị tụra sị mẹẹ anka ọza ana anyị aa zị ana aa rị uye, a vị oswahụ ana ka ọnị a zị ụsẹ avọọ nị. 20Ọyị jị ahẹ zụ ọza ana yị ịnị ayodu sị mẹẹ anka ọza ọ̀ọ ka anọ hị́ ọza ịtahụ, a vị ikere aa rị ọza achị, a vị ukukurumi aa rị ọchị avọọ nị. 21#Iro 12.20Ụngwẹ àa kụ ọnịvị awụ, dị ịsa yọ vị ọ rị ọ, onyi àa kụ ọ, ka enyi yọ dị o hu ọ. 22Ụhị u waa mẹ̀ nyị ọ nị. Ẹnẹyịmavara vee sị wụ ụta anị. 23Ireche vị ana mẹ̀ ọzaa kụ ayị anka ahị ana hụrẹ eyi ẹbẹẹba mẹẹ̄ zụ orihi avọọ. 24Ọ́ọ sị ka ọnị ọza vaa sị ọnẹẹ ọnịrẹyị tụ ịnị eehi, ọ vana vị ọnịnya tụ oboka ọ mẹ hu nị. 25Enube ọyịza ana hụrẹ aha ẹnẹẹnẹ vẹ sị mẹ anka ọza ọ sị enyi ohunẹnẹ yị ọza ene enyi aa kụ ịnị ọhahị avọọ nị. 26Ọnịzẹyịza anaa dọ yị ọza ọhịmị sị mẹ anka ikangga ọnị enyi anị ẹ yị rụra hu avọọ nị. 27Ọza mẹẹ rị ẹhụ baaba dị a zama, avọọ ọza enee si ka aa ga ọnị mẹẹ nyị ẹngụkata nị. 28Ọza ọ̀ọ ya dị ọ̀yị ma zụ sị ụvọ za ẹngụ anị nị, vị ọza ọnọọ sị mẹ anka ẹkụra ọnị ọza ọ̀ yị jị ọvọ kara, dị ọ tịtẹ chaha avọọ nị.

Currently Selected:

Ụhịrẹyị 25: EBTP

Highlight

Copy

Compare